អាកាសយានដ្ឋានអន្តរជាតិថ្មី ដែលមានតម្លៃសរុប ១.១០០ លានដុល្លារ នឹងក្លាយជានិម្មិតរូបថ្មី នៃផែនការទំនើបកម្មហេដ្ឋារចនាសម្ព័ន្ធរបស់កម្ពុជា ជំនួសអោយហេដ្ឋារចនាសម្ព័ន្ធដែលជា កេរដំណែលបន្សល់ទុកតាំងពីសម័យមុន ។ អាកាសយានដ្ឋាននេះ នឹង
អាកាសយានដ្ឋានអន្តរជាតិថ្មី ដែលមានតម្លៃសរុប ១.១០០ លានដុល្លារ នឹងក្លាយជានិម្មិតរូបថ្មី នៃផែនការទំនើបកម្មហេដ្ឋារចនាសម្ព័ន្ធរបស់កម្ពុជា ជំនួសអោយហេដ្ឋារចនាសម្ព័ន្ធដែលជា កេរដំណែលបន្សល់ទុកតាំងពីសម័យមុន ។ អាកាសយានដ្ឋាននេះ នឹងចាប់ផ្តើមរកស៊ីនៅពាក់កណ្តាលខែតុលា។
តាមការប្រកាសរបស់រដ្ឋលេខាធិការដ្ឋានអាកាសចរស៊ីវិល កាលពីថ្ងៃទី០២ ខែតុលា ឆ្នាំ២០២៣ បានឲ្យដឹងថា ទាំងក្រុមហ៊ុន និងរដ្ឋលេខាធិការដ្ឋានផ្ទាល់ គឺកំពុងតែបេ្តជ្ញាចិត្តធ្វើកិច្ចការដែលនៅសេសសល់ឱ្យបានមុនថ្ងៃទី១៦ ខែតុលា ឆ្នាំ២០២៣។ ដោយមកដល់ពេលនេះ អាកាសយានដ្ឋានអន្តរជាតិសៀមរាបអង្គរ បានទទួលនូវវិញ្ញាបនបត្រជាបន្តបន្ទាប់ ដើម្បីបើកប្រតិបត្តិការដឹកជញ្ជូនផ្លូវអាកាសនៅអាកាសយានដ្ឋានថ្មីនេះ ជំនួសអាកាសយានដ្ឋានចាស់ ដែលបន្សល់ទុកតាំងពីសម័យសង្គមរាស្ត្រនិយមមក។
ការទទួលបានវិញ្ញាបនបត្រទាំងនេះ គឺដើម្បីបញ្ជាក់ពីការទទួលស្គាល់សមត្ថភាព និងគុណភាព សេវាកម្មចរាចរណ៍ដែនអាកាស ដែលត្រូវឈរលើគុណសម្បត្តិមួយចំនួនដូចជា ៖ ការពិនិត្យលើគុណភាពរបស់ឧបករណ៍បំពាក់សម្រាប់ផ្តល់សេវាកម្ម, ការពិនិត្យលើធនធានមនុស្ស, ការពិនិត្យមើលលើឯកសារគាំទ្រការធ្វើសេវាកម្ម ។
អាកាសយានដ្ឋានសៀមរាបអង្គរ ជាអាកាសយានដ្ឋានលំដាប់អន្តរជាតិមួយ មានលំដាប់ថ្នាក់ 4E ដែលអាចទទួលយន្តហោះប្រភេទ (Code E) ធ្វើប្រតិបត្តិការបាន។ អាកាសយានដ្ឋានសៀមរាបអង្គរ មានចំណតយន្តហោះចំនួន៣៨ចំណត ក្នុងនោះមានចំណត Code E ចំនួន១១ចំណត និងចំណត Code C ចំនួន២៧ចំណត, អគារប៉មបញ្ជា ហោះហើរមួយមានកម្ពស់ ៨០ម៉ែត្រ និងមានស្ថានីយអ្នកដំណើរមួយ ដែលអាចទទួលបានភ្ញៀវចំនួន៧លាននាក់ក្នុង១ឆ្នាំ ហើយអាចនឹងពង្រីកដល់១២លាននាក់ ចាប់ពីឆ្នាំ២០៤០ ឡើងទៅ។
ក្រៅពីសេវាកម្មដឹកអ្នកដំណើរ អាកាសយាន្តដ្ឋានថ្មីនេះ ក៏អាចនឹងទទួលសេវាកម្មដឹកជញ្ជូន ផ្លូវអាកាសប្រមាណជា ១០.០០០ តោន ចាប់ពីឆ្នាំ២០២៣ នេះ និងដល់ ២៦.០០០ ចាប់ពីឆ្នាំ២០៤០ ជាមួយនឹងជើងហោះហើរសរុបពី ៦៥.៨០០ ជើង នៅឆ្នាំ២០២៣ ដល់ទៅ ១១២.៧០០ ជើង នៅក្នុងមួយឆ្នាំ នាឆ្នាំ២០៤០ខាងមុខ ។
បើតាមប្រភពនៅរដ្ឋលេខាធិការដ្ឋានអាកាសចរស៊ីវិល បានឲ្យដឹងថា មកដល់ថ្ងៃទី០២ ខែ កញ្ញា ក្រុមហ៊ុនបានទទួលសេវាកម្មផ្ទៃដីចំនួន៩ ហើយ ប៉ុន្តែនៅសល់ចំនួន២សេវាកម្មទៀត ដែលកំពុងដំណើរការស្នើសុំ គឺសេវាកម្មតំហែទាំយន្តហោះ និងសេវាកម្មម្ហូបអាហារនៅលើ យន្តហោះ ។
វិញ្ញាបនបត្រទាំងនេះ ជាតម្រូវការចាំបាច់មិនអាចខ្វះបាន សម្រាប់ធ្វើប្រតិបត្តិការគ្រប់គ្រងអាកាសយានដ្ឋាន។ រដ្ឋលេខាធិការដ្ឋានអាកាសចរណ៍ស៊ីវិល ចេញវិញ្ញាបនបត្រនេះ ដោយអនុលោមតាមស្តង់ដា និងអនុសាសន៍ពីអាជ្ញាធរអាកាសចរណ៍ស៊ីវិលអន្តរជាតិ និងនិយតកម្ម ក្នុងស្រុក។
ដើម្បីទទួលបានការបញ្ជាក់ថា ជាប្រតិបត្តិករអាកាសយានដ្ឋានបាន ក្រុមហ៊ុនអាកាស យានដ្ឋានកម្ពុជា ត្រូវបង្ហាញអនុលោមភាពរបស់ខ្លួនឱ្យត្រូវតាមស្តង់ដាអន្តរជាតិទាំងអស់ ដែលសំដៅ ជាពិសេសលើការផ្តល់សេវាសុវត្ថិភាព និងនីតិវិធីគ្រប់គ្រងដ៏ប្រសើរបំផុត។
ប្រភពដដែលបានបន្តថា ក្រុមហ៊ុននឹងខិតខំបញ្ចប់បញ្ហាដែលនៅសេសសល់អោយបានមុន ថ្ងៃទី១៦ ខែតុលា ឆ្នាំ២០២៣ ខាងមុខនេះ។
ពាក់ព័ន្ធនឹងបញ្ហានេះដែរ អាកាសយានដ្ឋានថ្មីនេះ នឹងដំណើរការហោះហើរសាកល្បងនៅថ្ងៃទី០៥ ខែតុលា ខាងមុខ ហើយប្តេជ្ញាថា នឹងបើកទទួលប្រតិបត្តិការយន្តហោះពាណិជ្ជកម្ម នៅថ្ងៃទី១៦ ខែតុលា ប៉ុន្តែពិធីសម្ភោធផ្លូវការគ្រោងនឹងរៀបចំឡើងនៅថ្ងៃទី០១ ខែធ្នូ ឆ្នាំ២០២៣ នៅក្រោមអធិបតីភាពរបស់សម្តេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា រួមជាមួយនឹងមេដឹកនាំចិន ប៉ុន្តែគេនៅមិនទាន់បញ្ជាក់ថា ជាមេដឹកនាំរូបណា កម្រិតណា អោយពិតប្រាកដ នៅឡើយទេ ។
សរុបមកវិញ អាកាសយានដ្ឋានសៀមរាបអង្គរថ្មី នឹងក្លាយនិមិត្តរូបថ្មីនៃការខិតខំធ្វើទំនើប កម្មវិស័យហេដ្ឋារចនាសម្ព័ន្ធនៅកម្ពុជា ដែលនៅពេលនេះ ផ្លូវគមនាគមន៍កំពុងតែខិតខំប្រែសម្រួលពីបរិមាណមកគុណភាព ហើយក៏ត្រូវពង្រីកពី២គន្លងទៅ ៤គន្លង ទៅពីរមកពីរ ក៏ដូចជាការស្វះស្វែងកសាងផ្លូវរថភ្លើងល្បឿនលឿន បន្ថែមលើផ្លូវល្បឿនលឿនដែលដំណើរការនិងកំពុងសាងសង់។
ដោយ ៖ ហេង ចេស្តារ
ចែករំលែកព័តមាននេះ