រាជធានីភ្នំពេញ ៖ ស្នងការដ្ឋាននគរបាលរាជធានីភ្នំពេញ បានសម្រេចចាត់តាំងលោកវរសេនីយ៍ឯក សំ វិច្ឆិកា នាយការិយាល័យផ្សព្វផ្សាយអប់រំ ជាអ្នកនាំពាក្យរបស់ស្នងការដ្ឋាននគរបាលរាជធានីភ្នំពេញ ។ សេចក្តីសម្រេច…
រាជធានីភ្នំពេញ ៖ ស្នងការដ្ឋាននគរបាលរាជធានីភ្នំពេញ បានសម្រេចចាត់តាំងលោកវរសេនីយ៍ឯក សំ វិច្ឆិកា នាយការិយាល័យផ្សព្វផ្សាយអប់រំ ជាអ្នកនាំពាក្យរបស់ស្នងការដ្ឋាននគរបាលរាជធានីភ្នំពេញ ។
សេចក្តីសម្រេច ចាត់តាំងអ្នកនាំពាក្យរបស់ស្នងការដ្ឋាននគរបាលរាជធានីភ្នំពេញ ៖
ប្រការ១ ៖ ត្រូវបានចាត់តាំង លោកវរសេនីយ៍ឯក សំ វិច្ឆិកា អត្តលេខ ៦០២៦៥ ឋានៈ នាយការិយាល័យផ្សព្វផ្សាយអប់រំ ជាអ្នកនាំពាក្យ របស់ស្នងការដ្ឋាននគរបាលរាជធានីភ្នំពេញ ។
ប្រការ២ ៖ ភារកិច្ច អ្នកនាំពាក្យ របស់ស្នងការដ្ឋាននគរបាលរាជធានីភ្នំពេញ
-ប្រមូលរាល់ព័ត៌មាន ពីគ្រប់មជ្ឈដ្ឋានជាតិ អន្តរជាតិ លើកឡើងពាក់ព័ន្ធបាតុភាពអសកម្ម ក្នុងការអនុវត្ត តួនាទី ភារកិច្ច របស់កងកម្លាំងនគរបាល នៃស្នងការដ្ឋាននគរបាលរាជធានីភ្នំពេញ ដើម្បីឆ្លើយតប ប្រសិទ្ធភាព ទាន់ពេលវេលា ដោយមានវិជ្ជាជីវៈ និងសុជីវធម៌ ។
-សហការសម្របសម្រួលជាមួយគ្រប់ផែនការងារជំនាញទាំង១៣ ការិយាល័យជំនាញពាក់ព័ន្ធ អធិការដ្ឋាន នគរបាលខណ្ឌទាំង១៤ ដើម្បីប្រមូលផ្ដុំព័ត៌មានបានគ្រប់ជ្រុងជ្រោយ សម្រាប់ជាមូលដ្ឋានក្នុងការបកស្រាយ ជូនសាធារណៈជន ។
-រាល់ព័ត៌មាន មុនបកស្រាយបំភ្លឺក្នុងផេកផ្លូវការ និងគេហទំព័រ របស់ស្នងការដ្ឋាននគរបាលរាជធានីភ្នំពេញ ត្រូវសុំគោលការណ៍ណែនាំពីអគ្គស្នងការរង និងជាស្នងការនគរបាលរាជធានីភ្នំពេញ ។
-មានភារកិច្ចទទួលបន្ទុកអនុវត្តការងារមួយចំនួនទៀត ដែលថ្នាក់ដឹកនាំប្រគល់ជូន ។
ប្រការ៣ ៖ ត្រូវបានទុកជា និរាករណ៍ សេចក្តីសម្រេចមុន របស់ស្នងការដ្ឋាននគរបាលរាជធានីភ្នំពេញ ។
ប្រការ៤ ៖ លោក លោកស្រីស្នងការរងទាំងអស់ លោក លោកស្រីនាយការិយាល័យជំនាញ លោកអធិការនគរបាលខណ្ឌ ទាំង១៤ និងលោកវរសេនីយ៍ឯក សំ វិច្ឆិកា ត្រូវអនុវត្តតាមសេចក្តីសម្រេចនេះ ឲ្យមានប្រសិទ្ធភាពខ្ពស់ ចាប់ពីថ្ងៃចុះហត្ថលេខាតទៅ ៕
ចែករំលែកព័តមាននេះ