រាជធានីភ្នំពេញ ៖ អង្គភាពប្រឆាំងអំពើពុករលួយ (ACU) បានឲ្យលោក សួរ ភ័ក្រលំពង្ស ស្មៀនសង្កាត់ចោមចៅទី១ នៃខណ្ឌពោធិ៍សែនជ័យ បំភ្លឺករណីទារប្រាក់ថ្លៃសេវាលើគ្រប់ឯកសារ…
រាជធានីភ្នំពេញ ៖ អង្គភាពប្រឆាំងអំពើពុករលួយ (ACU) បានឲ្យលោក សួរ ភ័ក្រលំពង្ស ស្មៀនសង្កាត់ចោមចៅទី១ នៃខណ្ឌពោធិ៍សែនជ័យ បំភ្លឺករណីទារប្រាក់ថ្លៃសេវាលើគ្រប់ឯកសារ ដែលប្រជាពលរដ្ឋស្នើសុំចុះហត្ថលេខា និងបោះត្រា និងករណីមិនបានបើកប្រាក់លើកទឹកចិត្តសម្រាប់មន្ត្រីជាង ២០០លានរៀល ។
យោងតាមលិខិតរបស់អង្គភាពប្រឆាំងអំពើពុករលួយ ចុះថ្ងៃទី១៩ ខែកញ្ញា ឆ្នាំ២០២៣ បានបញ្ជាក់ថា ACU បានទទួល និងពិនិត្យលើពាក្យប្ដឹង ដែលបានលើកឡើងថា លោក សួរ ភ័ក្រលំពង្ស ស្មៀនសង្កាត់ចោមចៅទី១ និងលោក កង វង ចៅសង្កាត់ចោមចៅទី១ ខណ្ឌពោធិ៍សែនជ័យ រាជធានីភ្នំពេញ បានទារប្រាក់ថ្លៃសេវាតាមតែអំពើចិត្ត លើគ្រប់ឯកសារ នៅពេលប្រជាពលរដ្ឋទៅស្នើសុំចុះហត្ថលេខា និងបោះត្រា ដោយមិនអនុវត្តតាមតារាងតម្លៃសេវាច្រកចេញចូលតែមួយ ហើយចំពោះការស្នើសុំ ជួសជុល ឬសាងសង់ បើសិនគ្មានប្រាក់បង់ជូនទេ លោក និងលោក កង វង តែងតែគំរាមដកហូតសម្ភារៈសាងសង់ របស់ប្រជាពលរដ្ឋ។ ជាងនេះទៀត រូបលោក សួរ ភ័ក្រសំពង្ស និងលោក កង វង មិនបានបើកប្រាក់រង្វាន់លើកទឹកចិត្ត ជាង ២០០លានរៀល ចាប់តាំងពីឆ្នាំ២០១៩ ដល់ឆ្នាំ២០២០ ជូនដល់មន្ត្រីឡើយ ។
ACU បានអោយលោកស្មៀនសង្កាត់ចោមចៅទី១ បំភ្លឺករណីនេះឲ្យបានឆាប់ ហើយការបំភ្លឺរបស់លោក សួរ ភ័ក្រលំពង្ស គឺជាមូលដ្ឋានសម្រាប់ ACU ពិចារណាថា ត្រូវសម្រេចបញ្ចប់នីតិវិធី ឬត្រូវបន្តលើពាក្យប្ដឹងនេះ ។
ពាក់ព័ន្ធករណីខាងលើនេះ យោងតាមសារព័ត៌មានក្នុងស្រុកបានផ្សព្វផ្សាយថា ប្រាក់រង្វាន់សម្រាប់ផ្ដល់ជូនដល់បុគ្គលិក មន្ត្រីរាជការ សាលាសង្កាត់ចោមចៅទី១ នៃខណ្ឌពោធិ៍សែនជ័យ ដែលបានមកពីវិស័យពន្ធដារ និងសូរិយោដី នៅក្នុងឆ្នាំ២០១៩ និងឆ្នាំ២០២០ កន្លងទៅនេះ
បានបាត់អស់ជាង២០០លានរៀល ។
សម្រាប់ប្រាក់រង្វាន់ ដែលបានមកពីផ្នែកពន្ធដារនៅក្នុងឆ្នាំ២០១៩ ប្រាក់នោះដែលបានដកចេញពីធនាគារមកចែកជូនដល់បុគ្គលិក មន្ត្រីរាជការសាលាសង្កាត់ចោមចៅទី១ មានចំនួន ១៦២,៧៥៨,០០០រៀល។ ប៉ុន្តែលោកចៅសង្កាត់ បានយកមកចែកដល់បុគ្គលិក មន្ត្រីរាជការតែ ចំនួន៧៨,៦៣៩,០០០រៀល តែប៉ុណ្ណោះ រីឯប្រាក់នៅសល់ចំនួន៨៤,១១៩,០០០រៀលទៀត បាត់គ្មានមូលហេតុ ។
ដោយឡែក នៅក្នុងឆ្នាំ២០២០ ប្រាក់ដែលដកចេញពីធនាគារចំនួន ១៥១,១៣៧,៨០០រៀល ប៉ុន្តែចែកដល់បុគ្គលិក មន្ត្រីរាជការតែចំនួន ១១០,០៨៧,៨០០រៀលប៉ុណ្ណោះ។ ចំណែកប្រាក់នៅសល់ចំនួន ៤៩,៤៥៨,០៥៤រៀលទៀត ពុំដឹងយកទៅណាឡើយ ហើយសរុបឆ្នាំ២០១៩-២០២០ ប្រាក់ដែលបាត់អត់ឃើញចែកដល់បុគ្គលិកមន្ត្រីរាជការចំនួន ១៣៣,៥៧៧,០៥៤រៀល ។
ប្រាក់រង្វាន់ដែលបានមកពីផ្នែកសូរិយោដី នៅក្នុងឆ្នាំ២០១៩ ចំនួន១៤៧,៥០៦,០០០រៀល ចែកជូនបុគ្គលិកមន្ត្រីរាជការអស់តែចំនួន៨៦,៧៥៦៥០០រៀលប៉ុណ្ណោះ នៅសល់ចំនួន៦០,៧៤៩,៥០០រៀលទៀតអត់ចែក។ នៅក្នុងឆ្នាំ២០២០ ប្រាក់រង្វាន់សរុប ចំនួន៥២,៣៨៤,៩០០រៀល ប៉ុន្តែចែកជូនបុគ្គលិកមន្ត្រីរាជការអស់តែចំនួន៤០,៨១៤,៧០០រៀលតែប៉ុណ្ណោះ ចំណែកប្រាក់នៅសល់ចំនួន១១,៥៧០,២០០រៀលទៀតអត់ចែក ហើយបាត់សូន្យឈឹងសរុបទាំងឆ្នាំ២០១៩ និង២០២០ ប្រាក់ដែលបាត់ចំនួន៩៦,២៥៨,៦៦០រៀល។ ដូច្នេះប្រាក់រង្វាន់ដែលបាត់ទាំងផ្នែកពន្ធដារ និងសូរិយោដី ក្នុងឆ្នាំ២០១៩ និង២០២០ សរុបចំនួន២២៩,៨៣៥,៧១៤រៀល ។
ប្រភពព័ត៌មានពីមន្ត្រីសាលាសង្កាត់អះអាងថា ប្រាក់ទាំងនោះទាល់តែមានការចុះហត្ថលេខាពីលោកចៅសង្កាត់ ទើបបើកពីធនាគារបាន ហើយស្មៀនជាអ្នកទៅបើក ប៉ុន្តែពុំដឹងថា មូលហេតុអី ទើបបាត់ដល់ទៅជាង ២០០លានរៀល បែបនេះទេ ។
លោក កង វង ចៅសង្កាត់ចោមចៅទី១ ក៏ធ្លាប់បានបញ្ជាក់ប្រាប់ដែរថា លោកអត់បានដឹងព័ត៌មានទាំងអស់នេះឡើយ ព្រោះស្មៀនជាអ្នកទៅបើកយកមកបែងចែកជូនដល់មន្ត្រី ហើយបាត់ ឬយ៉ាងណានោះ លោកអត់បានដឹងទេ ៕
ចែករំលែកព័តមាននេះ