រាជធានីភ្នំពេញ ៖ បុរស៣នាក់ជាបងប្អូនជីដូនមួយនឹងគ្នា ត្រូវបានមិត្ដភក្ដិហៅទៅហូបការនៅភូមិខ្សុំ ឃុំខ្សុំខាងលិច ស្រុកពារាំង ខេត្ដព្រៃវែង ខណៈពេលជិះម៉ូតូត្រឡប់មកវិញត្រូវគេលបវាយដោយចាក់នឹងផ្លែដែកឆាបបណ្ដាលឱ្យម្នាក់រងរបួសធ្លាយប្លោកនោម ម្នាក់ចាក់ចំកណ្ដាលដើមទ្រូង និងម្នាក់ទៀតត្រូវគេវាយនឹងដំបងចំក្បាលផ្នែក
រាជធានីភ្នំពេញ ៖ បុរស៣នាក់ជាបងប្អូនជីដូនមួយនឹងគ្នា ត្រូវបានមិត្ដភក្ដិហៅទៅហូបការនៅភូមិខ្សុំ ឃុំខ្សុំខាងលិច ស្រុកពារាំង ខេត្ដព្រៃវែង ខណៈពេលជិះម៉ូតូត្រឡប់មកវិញត្រូវគេលបវាយដោយចាក់នឹងផ្លែដែកឆាបបណ្ដាលឱ្យម្នាក់រងរបួសធ្លាយប្លោកនោម ម្នាក់ចាក់ចំកណ្ដាលដើមទ្រូង និងម្នាក់ទៀតត្រូវគេវាយនឹងដំបងចំក្បាលផ្នែកខាងក្រោយរងរបួសយ៉ាងធ្ងន់ធ្ងរ។ ហេតុការណ៍នេះ បានកើតឡើងកាលពីវេលាម៉ោង១០យប់ ថ្ងៃទី១៥ ឧសភា ហើយក្រោយពេលកើតហេតុជនរងគ្រោះទាំង៣នាក់ត្រូវបានបញ្ជូនមកព្យាបាលនៅមន្ទីរពេទ្យព្រះកុសុមៈ ។
៣នាក់បងប្អូនជីដូនមួយដែលត្រូវគេព្រួតលបវាយប្រហារនេះ ១-ឈ្មោះរ៉ន រ៉ុន ភេទប្រុស អាយុ៣៣ឆ្នាំ ២-ឈ្មោះកើម ឆាន ភេទប្រុស អាយុ២៥ឆ្នាំ និង៣-ឈ្មោះឆុន ឈឿត ភេទប្រុស អាយុ២២ឆ្នាំ ។ ពួកគេទាំង៣នាក់មានទីលំនៅក្នុងភូមិតាំងរលាង ឃុំកំពង់អំពិល ស្រុកពារាំង ខេត្តព្រៃវែង។
ទាក់ទិននឹងហេតុការណ៍នេះ ជនរងគ្រោះឈ្មោះរ៉ន រ៉ុន ដែលត្រូវជាបងគេបានរៀបរាប់ឱ្យដឹងថា នៅថ្ងៃកើតហេតុខាងលើពួកខ្លួនបានជិះម៉ូតូម៉ាកគុបជ្រុង ស៊េរី៩០ ពណ៌សំបកឪឡឹកទៅហូបការមិត្ដភក្ដិនៅភូមិខ្សុំ ឃុំខ្សុំខាងលិច ស្រុកពារាំង ដែលមានចម្ងាយពីផ្ទះប្រមាណ១គីឡូម៉ែត្រ ។ ខណៈពេលទៅដល់រោងការបានចូលហូបការនៅវេលាម៉ោង៦ល្ងាច ដោយបានអង្គុយរួមតុជាមួយមនុស្សចាស់ក្មេង ក្នុងនោះមានស្រីស្អាត៥នាក់អង្គុយជាមួយគ្នា។ ពេលហូបបណ្ដើរនិយាយគ្នាលេងបណ្ដើរជាធម្មតា លុះហូបរួចដល់ម៉ោងគេឡើងរាំប្អូនប្រុសឈ្មោះឆុន ឈឿត បានសុំស្រីស្អាតដែលអង្គុយជាមួយឡើងរាំ ។
បន្ទាប់ពីរាំដល់ម៉ោងប្រមាណ១០យប់ក៏បបួលគ្នាជិះម៉ូតូត្រឡប់ទៅផ្ទះវិញ លុះជិះម៉ូតូជិតដល់ផ្ទះនៅសល់ប្រមាណ៣០០ម៉ែត្រទៀត ជាកន្លែងផ្លូវបំបែកលូទឹក ស្រាប់តែត្រូវមនុស្ស៣នាក់លបវាយនឹងដំបងពីក្រោយបណ្ដាលឱ្យធ្លាក់ឈ្មោះឆុន ឈឿត ដែលអង្គុយខាងក្រោយ រួចពួកគេយកផ្លែដែកឆាបចាក់បន្ថែមបណ្តាលឱ្យធ្លាយបោ្លកនោម។ ពេលនោះឈ្មោះកើម ឆាន បានងាកមើលឃើញបំរុងជួយក៏ត្រូវពួកគេចាក់នឹងផ្លែដែកឆាបចំកណ្ដាលដើមទ្រូងទៀត។ ឃើញដូច្នេះខ្លួនបានផ្ដួលម៉ូតូចោលចូលទៅជួយក៏ត្រូវជនដៃដល់វាយនឹងដំបងត្រូវក្បាលផ្នែកខាងក្រោយ បណ្តាលឱ្យរបួសធ្ងន់ទាំង៣នាក់បងប្អូន។
តាមការបំភ្លឺពីឈ្មោះឆុន ឈឿត បានឱ្យដឹងថា ខ្លួនធ្លាប់ស្គាល់ជនដៃដល់ទាំង៣នាក់នេះ ពេលខ្លួនបួសជាសង្ឃនៅវត្ដខ្សុំខាងលិច។ ពេលសម្រាកព្យាបាលបានធូរស្រាលត្រឡប់ទៅផ្ទះវិញ ខ្លួននឹងដាក់ពាក្យប្ដឹងទៅអាជ្ញាធរមូលដ្ឋានឱ្យជួយតាមចាប់ជនដៃដល់ទាំងបីនាក់នោះមកផ្ដន្ទាទោសតាមច្បាប់ ។ ទាំង៣នាក់បងប្អូនដែលរងរបួសកំពុងសម្រាកព្យាបាលនៅមន្ទីរពេទ្យព្រះកុសុមៈ ហើយគ្រូពេទ្យបានមានប្រសាសន៍ថា ក្នុងចំណោមជនរងគ្រោះទាំង៣ឈ្មោះឆុន ឈឿត ដែលធ្លាយប្លោកនោមនោះត្រូវធ្វើការវះកាត់ជាបន្ទាន់់៕
ចែករំលែកព័តមាននេះ