ខេត្តកំពង់ចាម ៖ រថយន្តកាមរីចង្កូតស្តាំចំនួន២គ្រឿង និងរថយន្តម៉ាកឡង់គ្រីស្ស័រ១គ្រឿង ពាក់ស្លាកលេខ ខេមរភូមិន្ទ 2-9264 ដែលដឹកឈើគ្រញូងចេញមកពីខេត្តកំពង់ធំ ក្នុងគោលបំណងយកទៅលក់នៅព្រំដែនជាប់ប្រទេសវៀតណាមនោះ ត្រូវបានជាប់អន្ទាក់របស់រដ្ឋបាលព្រៃឈើត្រើយស្តាំ ជាបន្តបន្ទាប់ កាលពីព្រឹកថ្ងៃទី១២ ឧសភា និងព្រឹកថ្ងៃទី១៦ ឧសភា
ខេត្តកំពង់ចាម ៖ រថយន្តកាមរីចង្កូតស្តាំចំនួន២គ្រឿង និងរថយន្តម៉ាកឡង់គ្រីស្ស័រ១គ្រឿង ពាក់ស្លាកលេខ ខេមរភូមិន្ទ 2-9264 ដែលដឹកឈើគ្រញូងចេញមកពីខេត្តកំពង់ធំ ក្នុងគោលបំណងយកទៅលក់នៅព្រំដែនជាប់ប្រទេសវៀតណាមនោះ ត្រូវបានជាប់អន្ទាក់របស់រដ្ឋបាលព្រៃឈើត្រើយស្តាំ ជាបន្តបន្ទាប់ កាលពីព្រឹកថ្ងៃទី១២ ឧសភា និងព្រឹកថ្ងៃទី១៦ ឧសភា ឆ្នាំ២០១១ ហើយបានបញ្ជូនមករក្សាទុកនៅខណ្ឌរដ្ឋបាលព្រៃឈើកំពង់ចាម ជាបណ្តោះអាសន្នដើម្បីស្រាវជ្រាវរកម្ចាស់។
តាមព័ត៌មានពីលោកហេង ចន្ត្រា នាយរងផ្នែករដ្ឋបាលព្រៃឈើត្រើយស្តាំ បានឱ្យដឹងថា កម្លាំងសម្ងាត់បានរាយការណ៍មកថា មានរថយន្តប្រភេទកាមរីគូទប៉ោងចំនួន២គ្រឿង ក្នុងនោះពណ៌ស១គ្រឿង និងពណ៌ខ្មៅ១គ្រឿង បានបើកចេញមកពីខេត្តកំពង់ធំចូលមកទឹកដីស្រុកចំការលើ ។ គ្រាន់តែទទួលបាននូវព័ត៌មាននេះ ភ្លាមរូបលោកបានសុំគោលការណ៍ពីលោកប្រាក់ ណូម៉ា នាយខណ្ឌរដ្ឋបាលព្រៃឈើកំពង់ចាម ដើម្បីមានវិធានការចុះបង្ក្រាបជាបន្ទាន់ ។ ប្រភពបន្តថា នៅម៉ោង១១ព្រឹកថ្ងៃទី១២ ឧសភា លោកបានត្រៀមកម្លាំងរង់ចាំជាស្រេចនៅត្រង់ភូមិថ្នល់បែកលិច ឃុំស្វាយទាប ស្រុកចំការលើ រួមជាមួយនឹងកម្លាំងទាហាន ស្រាប់តែបានប្រទះឃើញរថយន្តចំនួន២គ្រឿង ដែលមានភិនភាគដូចព័ត៌មាននោះមែនកំពុងតែបើកមក ហើយបានស្ទាក់ចាប់បានទាំង២គ្រឿងតែម្តង ។
ប៉ុន្តែអ្នកបើកបររថយន្តបានបើកទ្វាររត់គេចខ្លួនបាត់ ហើយរថយន្តដឹកឈើគ្រញូងត្រូវបាននាំមករក្សាទុកនៅខណ្ឌរដ្ឋបាលព្រៃឈើកំពង់ចាម ដែលមានចំនួន១,៥០ម៉ែត្រគូប រហូតមកដល់ព្រឹកថ្ងៃទី១៦ ឧសភា នេះមិនទាន់មានមុខឈ្មួញណាម្នាក់ចេញមកដោះស្រាយនៅឡើយទេ តែលេចឮថាជារបស់គ្រូបង្រៀន ម្នាក់។ ដោយឡែកនៅវេលាម៉ោង៩ព្រឹកថ្ងៃទី១៦ ឧសភា នៅកន្លែងលាងរថយន្តមួយកន្លែង ក្បែរផ្សារព្រៃទទឹង ក្នុងឃុំជ្រៃវៀន ស្រុកព្រៃឈរ មានរថយន្តម៉ាកឡង់គ្រីស្ស័រ ពាក់ស្លាកលេខ ខេមរភូមិន្ទ ខាងលើ កំពុងតែលាងប្រឡាក់សុទ្ធតែភក់ ដែលមើលទៅខុសពីធម្មតា មានការសង្ស័យទើបមន្ត្រីរដ្ឋបាលព្រៃឈើក្រោមឱវាទបានរាយការណ៍មកកាន់រូបលោក (ហេង ចន្ត្រា) ដើម្បីសុំត្រួតពិនិត្យមើលក៏ប្រទះឃើញសុទ្ធតែឈើគ្រញូងជាច្រើនដែលមានទម្ងន់ចំនួន៨០០គីឡូក្រាម។
លោកហេង ចន្ត្រា នាយរងផ្នែករដ្ឋបាលព្រៃឈើ បានបន្ថែមថា គ្រាន់តែឃើញក្រុមមន្ត្រីរដ្ឋបាលព្រៃឈើទៅមើលរថយន្តឡង់គ្រីស្ស័រនោះ ភ្លាម អ្នកបើកបររថយន្តដែលស្លៀកពាក់ជាឯកសណ្ឋានទាហាន និង២នាក់ទៀតពាក់ឯកសណ្ឋានអង្គរក្ស បាននាំគ្នាគេចខ្លួនបាត់បន្សល់ទុកតែរថយន្ត ហើយសមត្ថកិច្ចនាំយកមករក្សាទុកនៅខណ្ឌរដ្ឋបាលព្រៃឈើចាត់ការតាមច្បាប់តែម្តង។
មានការកត់សម្គាល់ស្របពេលដែលទីផ្សារគ្រញូងកាន់តែថ្លៃរហូតដល់១ម៉ែត្រគូបជាង១ម៉ឺនដុល្លារ នៅទីផ្សារវៀតណាម គេសង្កេតឃើញក្រុមឈ្មួញទុច្ចរិតបានប្រើប្រាស់នូវរូបភាពគ្រប់បែបយ៉ាង មានពេលខ្លះដាក់បង្កប់នៅក្រោមដំឡូងមី រថយន្តបែនដឹកដីធ្លាប់ក្រឡាប់ក្អួតចេញសុទ្ធតែឈើគ្រញូងនាពេលកន្លងមកនៅរង្វង់មូលក្រែកជីមាន់ ស្រុកពញាក្រែក ឬក៏រថយន្តបែបទំនើបៗផងដែរ ៕
ចែករំលែកព័តមាននេះ