របបរបស់មេដឹកនាំផ្តាច់ការលីប៊ី លោកមូអាម៉ា កាដាហ្វី កាលពីថ្ងៃទី១៦ ឧសភា បានស្ម័គ្រចិត្តផ្តល់បទឈប់បាញ់គ្នាមួយដើម្បីជាថ្នូរនឹងការបញ្ឈប់ជាបន្ទាន់នូវការទម្លាក់គ្រាប់បែករបស់អង្គការអូតង់ប្រឆាំងខ្លួនខណៈពេលតុលាការឧក្រិដ្ឋកម្មអន្តរជាតិកំពុងពិចារណាមើលពីការចេញដីកាចាប់ខ្លួន ពីបទរំលោភបំពានសិទ្ធិមនុស្សនៅលីប៊ី ។ នាយករដ្ឋមន្ត្រីរបស់លោកកាដាហ្វី កាលពីថ្ងៃទី១៦ ឧសភា កន្លងមក បានស្នើឱ្យមានបទឈប់បាញ់មួយចំពោះបេសកជនពិសេសអង្គការសហប្រជាជាតិដែលកំពុងបំពេញទស្សនកិច្ចនៅ ក្នុងប្រទេសនេះ លោក Abdul-Ilah-al-Khatib នៅពេលការធ្វើបដិវត្តន៍ប្រឆាំងរបបរបស់លោកកាដាហ្វី ចូលដល់ខែទី៤ ។ នាយករដ្ឋមន្ត្រីរូបនេះលោក Baghdadi Mahmudi ត្រូវបានដកស្រង់សម្តីដោយទីភ្នាក់ងារព័ត៌មាន JANA ដែលថ្លែងក្រោយពីជួបពិភាក្សាជាមួយលោក Khatib ថា លីប៊ីចង់ឱ្យមានបទឈប់បាញ់ដែលកើតឡើងជួនពេលគ្នាជាមួយនឹងការបញ្ឈប់ទម្លាក់គ្រាប់បែករបស់អង្គការអូតង់ ហើយទទួលយកអ្នកសង្កេតការណ៍អន្តរជាតិ ។
លោក Mahmudi បានចោទប្រកាន់អង្គការអូតង់ដែលកំពុងអនុវត្តតំបន់ហាមហោះហើរផ្តល់អាណត្តិដោយអង្គការសហប្រជាជាតិនៅលីប៊ីពីបទរំលោភបំពានក្នុងនោះមានដូចជាការសម្លាប់អ្នកនយោបាយ និងការឡោមព័ទ្ធតំបន់ដែនទឹករបស់លីប៊ីដោយខុសច្បាប់។
អ្នកនាំពាក្យអង្គការសហប្រជាជាតិ លោក Martin Nesirky ថ្លែងនៅក្នុងទីក្រុងញូវយ៉កថា ក្នុងអំឡុងពេលនៃជំនួបពិភាក្សានោះ លោក Khatib បានលើកឡើងពីសេចក្តីត្រូវការឱ្យមានបទឈប់បាញ់គ្នាមួយ និងសិទ្ធិទៅកាន់ទីក្រុងនានាដែលរងការវាយប្រហារ។
ដោយឡែកកាលពីថ្ងៃទី១៦ ឧសភា នោះដែរ អគ្គលេខាធិការអង្គការសហប្រជាជាតិលោកបាន គីមូន បានសន្ទនាតាមទូរស័ព្ទជាមួយលោក Mahmudi ប៉ុន្តែសេចក្តីលម្អិតអំពីការពិភាក្សានោះមិនត្រូវបានលាតត្រដាងឱ្យដឹងនោះទេ។ ប្រមុខ អ.ស.ប បានធ្វើការអំពាវនាវម្តងទៀតឱ្យមានបទឈប់បាញ់នៅលីប៊ី ៕
ចែករំលែកព័តមាននេះ