ADផ្ទាំងផ្សព្វផ្សាយពាណិជ្ជកម្ម

Picture

អ្នក​ប្រើប្រាស់​មួយ​ចំនួន​ត្អូញត្អែរ​ពី​គុណវិបត្តិ​មួយ​របស់ iPhone 15 Pro / Pro Max

9 ខែ មុន

អន្តរជាតិ ៖ អ្នក​ប្រើប្រាស់​ទូរស័ព្ទ iPhone 15 Pro និង Pro Max មួយ​ចំនួន​កំពុង​តែ​ត្អូញត្អែរ​ថា ទូរស័ព្ទ​

អន្តរជាតិ ៖ អ្នក​ប្រើប្រាស់​ទូរស័ព្ទ iPhone 15 Pro និង Pro Max មួយ​ចំនួន​កំពុង​តែ​ត្អូញត្អែរ​ថា ទូរស័ព្ទ​ទាំង​២​ម៉ូ​ដែល​នេះ ឡើង​កំ​ដៅ​ខ្លាំង​ពេក អំឡុង​ពេល​ប្រើប្រាស់ ឬ​កំពុង​សាក​ថ្ម ដែល​ការ​ត្អូញត្អែរ​នេះ កំពុង​ធ្វើ​ឱ្យ​ធ្លាក់​ចុះ​សក្តានុពល​សម្រាប់​ផលិតផល​ស្មា​ត​ហ្វូ​ន​ក្រុមហ៊ុន​យក្ស Apple របស់​សហរដ្ឋ​អាមេរិក​។ នេះ​បើ​យោង​តាម​ប្រភព​ពី The Straits Times ចេញផ្សាយ​នៅ​ថ្ងៃ​ទី​២៨ ខែកញ្ញា ឆ្នាំ​២០២៣​។

ការ​ត្អូញត្អែរ​បាន​រាលដាល​ពេញ​វេទិកា​អន​ឡាញ​របស់ Apple និង​បណ្តាញ​ទំនាក់ទំនង​សង្គម​រួម​ទាំង Reddit និង X (Twitter) ដោយ​អតិថិជន​មួយ​ចំនួន​លើក​ឡើង​ថា ផ្នែក​ខាងក្រោយ ឬ​ចំហៀង​ទូរស័ព្ទ iPhone 15 Pro និង Pro Max នឹង​ក្តៅ​ខ្លាំង​ពេល​ប៉ះ អំឡុង​កំពុង​លេង​ហ្គេ​ម ការ​ហៅ​ទូរ​សព្ទ ឬ​ជជែក​គ្នា​តាម​វី​ដេ​អូ ឬ FaceTime ។ អ្នក​ប្រើប្រាស់​មួយ​ចំនួន​ទៀត លើក​ឡើង​ពី​បញ្ហា​ដូច​គ្នា​នេះ នៅ​ពេល​សាក​ថ្ម​។

បុគ្គលិក​ជំនួយ​ផ្នែក​បច្ចេកទេស​របស់ Apple ក៏​កំពុងធ្វើការ​ហៅ​ទូរស័ព្ទ​អំពី​បញ្ហា​នេះ​ផង​ដែរ​។ ពួក​គេ​បាន​ណែនាំ​អតិថិជន​ជាមួយ​អត្ថបទ​ជំនួយ​ចាស់​មួយ​អំពី​របៀប​ដោះស្រាយ​បញ្ហា iPhone ក្តៅ​ពេក ឬ​ត្រជាក់​ពេក ដោយ​ពន្យល់​ថា ការ​ឡើង​កំ​ដៅ​ខ្លាំង​អាច​កើតឡើង នៅ​ពេល​ប្រើ​កម្មវិធី​ដែល​ពឹងផ្អែក​ម៉ាស៊ីន​ខ្លាំង ការ​សាក​ថ្ម ឬ​ដំឡើង​ឧបករណ៍​ថ្មី (Device) លើក​ដំបូង​។ ពាក់ព័ន្ធ​ជុំវិញ​បញ្ហា​នេះ អ្នកតំណាង​ក្រុមហ៊ុន Apple ដែល​មាន​មូលដ្ឋាន​នៅ​ទីក្រុង Cupertino រដ្ឋ​កាលី​ហ្វ័​រ​ញ៉ា មិន​បាន​ឆ្លើយ​តប​នឹង​សំណើសុំ​ការ​អត្ថាធិប្បាយ​ទេ​។

ពាក់កណ្តាល​នៃ​ប្រាក់​ចំណូល​របស់ Apple បាន​មក​ពី​ការ​លក់​ទូរស័ព្ទ iPhone ហើយ​ម៉ូ​ដែល​ថ្មី​ចុង​ក្រោយ ត្រូវ​បាន​ពិនិត្យ​យ៉ាង​ដិត​ដល់​បំផុត ចំពោះ​កំហុស​ដែល​អាច​កើត​មាន​។ ពេល​ខ្លះ​បញ្ហា​កើតឡើង ដែល​ត្រូវ​ដោះស្រាយ​ដោយ Apple ជាមួយនឹង​ការ​ធ្វើ​បច្ចុប្បន្នភាព​កម្មវិធី (Update) ឬ​ការ​ជួសជុល​ផ្សេង​ទៀត​។ ជាមួយ​គ្នា​នោះ ក្រុមហ៊ុន​ក៏​មាន​ដំណើរការ​សាកល្បង​យ៉ាង​ម៉ត់ចត់ ដែល​មាន​គោលបំណង​ចាប់កំហុស​នានា​មុន​ពេល iPhone ចូល​ក្នុង​ការ​ផលិត​ទ្រង់ទ្រាយ​ធំ​។

យ៉ាងណាមិញ សំណួរ​លើក​នេះ​សួរ​ថា តើ​បញ្ហា​ឡើង​កំ​ដៅ​នៅ​តែ​បន្ត​កើត​មាន និង​លើស​ពី​អ្វី​ដែល​អ្នក​ប្រើ​គិត​ថា អាច​ទទួលយក​បាន​ដែរ​ឬទេ? ជុំវិញ​លើ​បញ្ហា​នេះ អាច​បណ្តាល​មក​ពី​ដំណើរការ​ដំឡើង​ក្នុង iPhone​។ ជាក់ស្តែង នៅ​ពេល​អ្នក​ប្រើប្រាស់​ទទួល​បាន​ទូរស័ព្ទ​ថ្មី ការ​ទាញ​យក​កម្មវិធី ទិន្នន័យ និង​រូបថត​ទាំងអស់​របស់​ពួក​គេ​ឡើង​វិញ​ពី iCloud អាច​ជា​ប្រ​តិ​ប​តិ្ត​ការ​ដ៏​ច្រើន ហើយ​ក៏​ជា​ដំណើរការ​ដែល​ពឹងផ្អែក​លើ​ម៉ាស៊ីន​ខ្លាំង​។ អ្នក​ប្រើប្រាស់​មួយ​ចំនួន​លើក​ឡើង​ថា ពួក​គេ​ជឿ​ថា​បញ្ហា​នេះ ក៏​អាច​បណ្តាល​មក​ពី​កម្មវិធី​មួយ​ចំនួន​ដូច​ជា Instagram ឬ Uber ជាដើម​។

ជា​ធម្មតា​ឧបករណ៍​របស់ Apple តែងតែ​បិទ​ម្តងម្កាល នៅ​ពេល​ឡើង​កំ​ដៅ​ខ្លាំង ឬ​ត្រូវ​កំ​ដៅ​ថ្ងៃ​យូរ​ពេក​។ iPhone 15 Pro និង Pro Max រួម​បញ្ចូល​នូវ​បន្ទះ​ឈី​ប A17 ថ្មី​ជាមួយនឹង​ម៉ាស៊ីន​ក្រាហ្វិក​ដ៏​មាន​ឥទ្ធិពល​។ សមាស​ភាគ​នេះ ដើម្បី​ជួយ​កែ​លម្អ​ដំណើរការ​លេង​ហ្គេ​ម ដែល​អាច​ជា​កត្តា​រួមចំណែក នៃ​ការ​ឡើង​កំ​ដៅ​។ ម៉ូ​ដែល iPhone ចុង​ក្រោយបង្អស់​ក៏​មាន​សារធាតុ​ថ្មី ស៊ុម​ទី​តានី​ញ៉ូ​ម ដែល​ផ្លាស់​ប្តូរ​ពី​ការ​រចនា​ដែក​អ៊ី​ណុ​ក ដែល​ប្រើ​តាំងពី​ឆ្នាំ ២០១៧៕

អត្ថបទសរសេរ ដោយ

កែសម្រួលដោយ