ខេត្តកំពង់ចាម ៖ ពិតជាគួរឱ្យកោតសរសើរដោយតាំងពីកុមារ រហូតដល់អាយុ១៧ឆ្នាំ ប្អូនស្រីកៅ ម៉េងហ័ង គឺជាសិស្សដែលរៀនពូកែបានជាប់ចំណាត់ថ្នាក់លេខ១ តាំងពីនៅបឋមរហូតដល់ថ្នាក់ទី១២ នៅវិទ្យាល័យហ៊ុន សែន…
ខេត្តកំពង់ចាម ៖ ពិតជាគួរឱ្យកោតសរសើរដោយតាំងពីកុមារ រហូតដល់អាយុ១៧ឆ្នាំ ប្អូនស្រីកៅ ម៉េងហ័ង គឺជាសិស្សដែលរៀនពូកែបានជាប់ចំណាត់ថ្នាក់លេខ១ តាំងពីនៅបឋមរហូតដល់ថ្នាក់ទី១២ នៅវិទ្យាល័យហ៊ុន សែន ពាមជីកង ស្ថិតក្នុងឃុំពាមជីកង ស្រុកកងមាស ។ ដោយទទួលបាននិទ្ទេសល្អគ្រប់មុខវិជ្ជាទាំងអស់ ហើយក៏មានភាពលេចធ្លោក្នុងការប្រកួតប្រជែងចេញទៅបរទេសជាប់ចំណាត់ថ្នាក់ល្អផ្នែកអាយធីទៀតផង ។
អ្នកស្រី ហ៊ុយ គឹមស្រ៊ន់ អាយុ៤៤ឆ្នាំ ត្រូវជាម្ដាយបង្កើតរបស់ម៉េងហ័ងបានរៀបរាប់ឲ្យដឹង កាលពីព្រឹកថ្ងៃទី២៨ កញ្ញា នេះថា គាត់បានរៀបការជាមួយប្ដីឈ្មោះកៅ សង្ហា សព្វថ្ងៃអាយុ៥៥ឆ្នាំ ជាគ្រូបង្រៀនថ្នាក់ទី១២ នៅវិទ្យាល័យហ៊ុន សែន ពាមជីកង ។ សព្វថ្ងៃគាត់មានកូនចំនួនពីរនាក់ក្នុងនោះ កូនប្រុសបងគេឈ្មោះកៅ ម៉េងហុង អាយុ២០ឆ្នាំជានិស្សិតឆ្នាំទី១ រៀនផ្នែកអាយធីនៅវិទ្យាស្ថានជាតិគ្រប់គ្រង នារាជធានីភ្នំពេញ ។ ចំណែកម៉េង ហ៊ង់ គឺជាកូនទី២ ដែលនឹងត្រៀមប្រលងចេញពីវិទ្យាល័យនាឆ្នាំនេះ ។
អ្នកស្រី គឹម ស្រ៊ន់ បានរៀបរាប់បន្តឱ្យដឹងទៀតថា កូនស្រីពៅរបស់គាត់រូបនេះ តាំងពីរៀននៅសាលាបឋម គឺទទួលបានចំណាត់ថ្នាក់លេខ១រាល់ខែ ហើយជាក្មេងម្នាក់សុភាពរាបសារចេះគោរពចាស់ទុំ ។ ជានិច្ចកាល កូនស្រីរូបនេះ គឺចូលចិត្តរៀនសូត្រណាស់ ដោយឪពុកម្ដាយមិននឿយហត់ក្នុងការប្រៀនប្រដៅនោះឡើយ។ ពេលរៀនដល់កម្រិតអនុវិទ្យាល័យថ្នាក់ទី៩ គឺកូនស្រីរបស់គាត់បានចូលចិត្តស្រឡាញ់ និងប្រើប្រាស់កុំព្យូទ័រ រហូតមកដល់ថ្នាក់ទី១២ ដែលជាឆ្នាំត្រូវត្រៀមប្រលងទៅថ្នាក់ឧត្តមសិក្សា ។
រាល់ថ្ងៃកូនស្រីម្នាក់នេះ បានបម្រើការងារឱ្យអង្គការក្រៅរដ្ឋាភិបាលយូនីសេហ្វ និងអង្គការមួយទៀត ហើយឧស្សាហ៍ឡើងចុះរាជធានីភ្នំពេញទៀតផង។ សាលារៀនជំនាន់ថ្មី គឺមានការបង្រៀនដិតដល់ទាំងព្រឹកល្ងាច គួបផ្សំនិងកូនស្រីខិតខំរៀនសូត្របន្ថែមនៅឯផ្ទះពេលយប់បន្ថែមដោយក្នុងចិត្តរបស់កូនតែងតែលើកឡើងថា គឺប្តេជ្ញាប្រឹងប្រែងរៀនសូត្រមិនឲ្យចាញ់គេនោះទេ។
ជាក់ស្ដែង លទ្ធផលចំណាត់ថ្នាក់ប្រចាំខែតុលាកន្លងទៅ គឺគ្រប់មុខវិជ្ជាទទួលបានពិន្ទុនិទ្ទេសA គ្រប់មុខវិជ្ជាតែម្ដង ។ ហើយមិត្តភក្តិបស់កូនស្រីគឺជាមនុស្សដែលសុទ្ធតែអ្នកចូលចិត្តរៀនសូត្រដូចកូនរបស់គាត់ដែរ។ នៅសាលារៀនកូនស្រីបានយកចិត្តទុកដាក់លើជំនាញវិទ្យាសាស្ត្រដោយទទួលបានលទ្ធផលល្អ ហើយក៏បានចេញទៅប្រឡងប្រណាំងយកជ័យលាភីនៅលើទឹកដីសហរដ្ឋអាមេរិកដោយមានមកពីចម្រុះជាតិសាសន៍ជាច្រើនប្រទេស គឺកូនស្រីគាត់ទទួលបានលទ្ធផលល្អ ។
កូនស្រីជាសិស្សឆ្នើមម្នាក់ធ្លាប់បានទៅធ្វើទស្សនកិច្ចក្នុងនោះមាននៅប្រទេសឥណ្ឌូនេស៊ី ស៊ុយអែតសហរដ្ឋអាមេរិក និងចុងក្រោយទៅទីក្រុងតូក្យូប្រទេសជប៉ុនកន្លងទៅថ្មីៗ ។ ហើយនៅដាក់កណ្ដាលខែតុលា ឆ្នាំ២០២៣ កូនស្រីត្រៀមចេញទៅចូលរួមប្រជុំអាស៊ាននៅប្រទេសឥណ្ឌូនេស៊ី ពេលត្រឡប់មកវិញកូនស្រីគាត់បានសន្យាមិនទៅកាន់ប្រទេសណាទៀតទេ ដោយប្រឹងប្រែងរៀនសូត្រខ្លាចមិនទទួលបានពិន្ទុល្អ។
ឯកឧត្តមបណ្ឌិតសភាចារ្យ ហង់ ជួនណារ៉ុន ឧបនាយករដ្ឋមន្ត្រីរដ្ឋមន្ត្រីក្រសួងអប់រំយុវជននិងកីឡា ក៏មានប្រសាសន៍កោតសរសើរលើសិស្សស្រី ឈ្មោះម៉េង ហ័ង គឺជាសិស្សពូកែម្នាក់នៅស្រុកកងមាស និងបានចេញទៅទស្សនកិច្ច និងការប្រកួតប្រជែងនៅបរទេសតាមបណ្ដាប្រទេសជាច្រើនលើសាកលលោក ។
ការលើកឡើងបែបនេះ ក្នុងឱកាសដែលឯកឧត្តមអញ្ជើញជាអធិបតីក្នុងកម្មវិធីសិក្ខាសាលាស្ដីពីការដាក់ឲ្យអនុវត្តជំហានដំបូងនៅប្រព័ន្ធព័ត៌មានវិទ្យាគ្រប់គ្រងសាលារៀនចំនួន៤៨សាលា ធ្វើឡើង កាលពីព្រឹកថ្ងៃទី២៧ កញ្ញា ឆ្នាំ២០២៣ នៅសាលសន្និសីទសាលាខេត្តកំពង់ចាម។
ចែករំលែកព័តមាននេះ