ខេត្តបាត់ដំបង ៖ បុរសម្នាក់ដែលគេនិយាយតៗគ្នា ស្រវឹងមិនសូវមានពេលស្វាង ត្រូវបានកម្លាំងនគរបាលឡើងទៅចាប់វាយខ្នោះអូស.កចុះពីលើផ្ទះ ក្រោយពីធ្វើសកម្មភាពដ៏ព្រហើនលីកាំភ្លើងខ្យល់ឡើងទៅបាញ់ម្ដាយ និងកូនស្រីដល់លើផ្ទះបណ្ដាលឲ្យរងរបួស កាលពីព្រលប់ថ្ងៃទី២២ កញ្ញា នៅចំណុចភូមិអូរស្រឡៅ…
ខេត្តបាត់ដំបង ៖ បុរសម្នាក់ដែលគេនិយាយតៗគ្នា ស្រវឹងមិនសូវមានពេលស្វាង ត្រូវបានកម្លាំងនគរបាលឡើងទៅចាប់វាយខ្នោះអូស.កចុះពីលើផ្ទះ ក្រោយពីធ្វើសកម្មភាពដ៏ព្រហើនលីកាំភ្លើងខ្យល់ឡើងទៅបាញ់ម្ដាយ និងកូនស្រីដល់លើផ្ទះបណ្ដាលឲ្យរងរបួស កាលពីព្រលប់ថ្ងៃទី២២ កញ្ញា នៅចំណុចភូមិអូរស្រឡៅ ឃុំវត្តតាមិម ស្រុកសង្កែ មិនតែប៉ុណ្ណោះ ជននេះថែមទាំងវាយបំផ្លាញទ្រព្យសម្បត្តិជនរងគ្រោះនៅលើផ្ទះទៀងផង។
តាមរយៈរបាយការណ៍ លោក យុត តុងហូ អធិការស្រុកសង្កែបានឲ្យដឹងថា ជនសង្ស័យឈ្មោះ ឆាយ បញ្ញា ភេទប្រុស អាយុ២៨ឆ្នាំ នៅភូមិឃុំកើតហេតុ រីឯជនរងគ្រោះពីរនាក់ម្ដាយនិងកូនស្រី មានឈ្មោះ អឿ ជន អាយុ៥៣ឆ្នាំ (ម្ដាយ) របួសដៃ និងកូនស្រីឈ្មោះ រួម ចំរើន អាយុ២៦ឆ្នាំ របួសដៃឆ្វេង ។ ជនរងគ្រោះ និងជនសង្ស័យ មានផ្ទះនៅក្បែរគ្នា ។
លោក តុងហូ បាននិយាយថា ជនដៃដល់ដ៏ព្រហើយនេះ មិនត្រឹមតែបាញ់ម្ដាយនិងកូនស្រីឲ្យរងរបួសប៉ុណ្ណោះទេ ជននេះថែមទាំងបានវាយកំផ្លាញទូរទឹកកក០១ និងទូដាក់ខោអាវ០១ នៅក្នុងផ្ទះបណ្ដាលឱ្យខូចខាតអស់គ្មានសល់ទៀតផង ។ បើតាមជនរងគ្រោះ ម្ដាយនិងកូនស្រី បាននិយាយប្រាប់សមត្ថកិច្ចថា ជនប្រមឹកខួបនេះ ធ្លាប់មានគំនុំជនមួយប្ដីរបស់គាត់ ដែលកើតឡើងយូរដែរហើយ តែជននេះនៅតែតាមចងចាំតាមបង្កហេតុជាមួយគ្រួសារគាត់មិនឈប់ឈរឡើយ ។
គាត់និយាយថា នេះមិនមែនជាលើកទីមួយទេ ដែលជនម្នាក់នេះ តែងបង្កបញ្ញាទៅលើគ្រួសារគាត់។ ពេលខ្លះគប់ដំបូលផ្ទះ ស្រែកជេរបញ្ចោរ ឬ ព្យាយាមបង្កបញ្ហាផ្សេងៗ ពេលខ្លួនស្រវឹងម្ដងៗ។ ប៉ុន្តែគាត់បញ្ជាក់ប្រាប់សមត្ថកិច្ចថា នៅថ្ងៃកើតហេតុពេលគាត់និងកូនស្រីកំពុងនៅលើផ្ទះ ស្រាប់តែជនអន្ធពាលនេះ បានលីកាំភ្លើងខ្យល់កែច្នៃ ឡើងទៅលើផ្ទះគាត់រួចបាញ់តម្រង់គាត់និងកូនស្រីបណ្ដាលឲ្យរងរបួសទាំង០២នាក់តែម្ដង ។
ក្រោយពីបាញ់គាត់និងកូនស្រីរបួស ជនប្រមឹកនេះ បានវាយកំទេចទូរទឹកកក និង ទូកញ្ចក់ដាក់ខោអាវបណ្ដាលឲ្យបែកបាក់ខូចខាតអស់គ្មានសល់់ ខណៈពេលនោះដែលប្ដីគាត់មិនបាននៅ តែគាត់បានទាក់ទងហៅប្ដី និងរាយការណ៍ប្រាប់សមត្ថកិច្ចឲ្យជួយអន្តាគមន៍ភ្លាមៗ ។ លោក យុត តុងហូ អធិការស្រុកសង្កែ បានប្រាប់កោះសន្តិភាពថា ប្រហែលជាង០១ម៉ោងក្រោយកើតហេតុ កម្លាំងរបស់លោក និងកម្លាំងប៉ុស្ដ៏រដ្ឋបាល វត្តតាមិម បានចុះទៅកាន់កន្លែងកើតហេតុ និងបានឃាត់ខ្លួនជនសង្ស័យឈ្មោះ ឆាយ បញ្ញា នេះ ភ្លាមៗដែរ ពេលជននេះកំពុងសំងំលាក់ខ្លួននៅលើផ្ទះរបស់ខ្លួន ។
ជាមួយនឹងការឃាត់ខ្លួននេះ មន្ត្រីជំនាញបានដកហូតកាំភ្លើងកែច្នៃមួយដើម ដែលជននេះបានប្រើប្រាស់បាញ់ទៅលើជនរងគ្រោះពីរនាក់ម្ដាយកូន ។ លោកអធិការរូបនេះបានបញ្ជាក់ថា បើតាមការពិនិត្យកាំភ្លើងខ្យល់កែច្នៃនេះ គឺជនសង្ស័យបានយកដែកគោលទំហំ០៦លី កាត់ជាកំណាត់ៗតូចៗ ធ្វើជាគ្រាប់សម្រាប់បាញ់ជនរងគ្រោះ។ ពេលនេះ កំពុងត្រូវបានមន្ត្រីជំនាញ សួរនាំដើម្បីចាត់ការតាមនីតិវិធីហើយ ៕
ចែករំលែកព័តមាននេះ