ខេត្តប៉ៃលិន ៖ រហូតមកដល់ថ្ងៃទី១៥ ខែកុម្ភៈ ឆ្នាំ២០២៦នេះ គេសង្កេតឃើញមានប្រជាពលរដ្ឋ និងភ្ញៀវទេសចរជាតិ ដែលបានធ្វើដំណើរពីតាមបណ្តាខេត្តនានា ដូចជាខេត្តបាត់ដំបង ខេត្តបន្ទាយមានជ័យ…
ខេត្តប៉ៃលិន ៖ រហូតមកដល់ថ្ងៃទី១៥ ខែកុម្ភៈ ឆ្នាំ២០២៦នេះ គេសង្កេតឃើញមានប្រជាពលរដ្ឋ និងភ្ញៀវទេសចរជាតិ ដែលបានធ្វើដំណើរពីតាមបណ្តាខេត្តនានា ដូចជាខេត្តបាត់ដំបង ខេត្តបន្ទាយមានជ័យ ខេត្តពោធិ៍សាត់ ចូលមកលេងខេត្តប៉ៃលិនយ៉ាងច្រើនកុះករ ខណៈដែលអ្នកលក់ដូរនៅទីតាំងសួនកុមារ ទល់មុខសាលាខេត្តប៉ៃលិន មានការសប្បាយរីករាយក្នុងចិត្តយ៉ាងខ្លាំង ដោយលក់ដូរដាច់ជាងរាល់ថ្ងៃ គឺមានអ្នកចូលទិញច្រើនជាងសព្វមួយដង។
បើតាមប្រភពព័ត៌មានពីអ្នកលក់ដូរម្នាក់ ឈ្មោះ ម៉ៅ ភេទប្រុស បានរៀបរាប់ឱ្យភ្នាក់ងារយើងដឹងថា ៖ ជារៀងរាល់ថ្ងៃ គ្រួសាររបស់គាត់ បាននាំគ្នា លក់សាច់គោ សាច់ជ្រូក សាច់មាន់អាំង និងបាយប្រអប់ នៅលើសួនកុមារទល់មុខសាលាខេត្ត ដើម្បីបានថវិកា យកទៅផ្គត់ផ្គង់ជីវភាពប្រចាំថ្ងៃ។
លោកបន្តទៀតថា ប៉ុន្តែ នៅពេលរដូវបុណ្យចូលឆ្នាំថ្មីប្រពៃណីជាតិចិន និងវៀតណាម ខិតចូលមកដល់ ការលក់ដូររបស់គាត់ ពិតជាដាច់ខ្លាំងជាងរាល់ថ្ងៃ ដោយឃើញមានប្រជាពលរដ្ឋនៅក្នុងខេត្ត និងភ្ញៀវទេសចរជាតិ ដែលធ្វើដំណើរមកពីតាមបណ្តាខេត្តនានា ចូលមកទិញម្ហូបអាហារ ស្ទើរតែអាំងលក់មិនទាន់នោះឡើយ។ លោកបន្តទៀតថា នាឱកាសបុណ្យមួយនេះ ពួកគាត់មិនហ៊ានឈប់សម្រាកលក់ដូរនោះទេ គឺនៅតែបន្តខិតខំប្រឹងប្រែងលក់ដូរជារៀងរាល់យប់ ដោយរៀបចំឥវ៉ាន់ដាក់លក់តាំងពីម៉ោង៤និង០០នាទីរសៀល រហូតដល់ម៉ោង៩ និង៣០នាទីយប់ ទើបនាំគ្នាទុកដាក់សម្ភារៈក្នុងរទេះធ្វើដំណើរទៅផ្ទះវិញ។ គាត់បញ្ជាក់ថា នៅថ្ងៃនេះ ការលក់ដូរដាច់ខ្លាំង ប្រហែលជាដល់យប់ជ្រៅ លោកអាចនឹងលក់អស់សាច់ ឆាប់បានទៅសម្រាកមុនម៉ោងផងដែរ។
បើតាមការរៀបរាប់ពីភ្ញៀវទេសចរម្នាក់ ឈ្មោះ សាយ សុខមាន ភេទស្រី រស់នៅខេត្តបាត់ដំបង បានឱ្យដឹងដែរថា គាត់បាននាំក្រុមគ្រួសារចូលមកលេងក្នុងទឹកដីខេត្តប៉ៃលិន ដោយស្នាក់នៅផ្ទះបងប្អូន ក្នុងក្រុង ពោលគឺធ្វើដំណើរមកលេងប្រហែល២ទៅ៣ថ្ងៃ ទើបនាំគ្នាវិលត្រឡប់ទៅផ្ទះវិញ។ គាត់បន្តទៀតថា ទេសភាពនៅក្នុងក្រុងប៉ៃលិន បច្ចុប្បន្នពិតជាមានសភាពប្លែកភ្នែកជាងពីមុនឆ្ងាយ ដោយសារតែអាជ្ញាធរខេត្តបានធ្វើការអភិវឌ្ឍខេត្តមួយនេះ ជាពិសេសដាក់ភ្លើងបំភ្លឺយ៉ាងត្រចះត្រចង់នាពេលយប់ គឺភ្លឺគ្រប់ទីកន្លែងដូចជាពេលថ្ងៃ ដែលធ្វើឱ្យពួកគាត់មិនព្រួយបារម្ភក្នុងការដើរលេងកម្សាន្តនាពេលរាត្រី។
គាត់បញ្ជាក់ថា យប់យប់នេះ ក្រុមគ្រួសាររបស់ខ្លួន មិនទទួលទានអាហារនៅផ្ទះឡើយ គឺនាំគ្នាមកទិញនំចំណី និងអាហារនៅសួនកុមារទទួលទាន ដោយក្រោយពេលដើរលេងនាពេលយប់បន្តិច នឹងត្រឡប់ទៅផ្ទះវិញ រហូតដល់ព្រឹកថ្ងៃស្អែក នឹងនាំគ្នាដើរលេងនៅតាមរមណីយដ្ឋាននានាក្នុងខេត្តប៉សលិន៕
ចែករំលែកព័តមាននេះ