រាជធានីភ្នំពេញ ៖ នគរបាលការិយាល័យស៊ើបការណ៍នៃនាយកដ្ឋានព្រហ្មទណ្ឌក្រសួងមហាផ្ទៃ កាលពីថ្ងៃទី១៤ ឧសភា កន្លងមក បានចាប់បញ្ជូនយុវជនម្នាក់ដែលជាប់ចោទនាំនាងជាកូនក្រមុំរត់ចេញពីរោងការទៅបង្ខាំងទុកក្នុងផ្ទះជួលមួយកន្លែង ហើយបានរំលោ.ភសេពសន្ថវៈបំផ្លាញអនាគតរបស់នាង
រាជធានីភ្នំពេញ ៖ នគរបាលការិយាល័យស៊ើបការណ៍នៃនាយកដ្ឋានព្រហ្មទណ្ឌក្រសួងមហាផ្ទៃ កាលពីថ្ងៃទី១៤ ឧសភា កន្លងមក បានចាប់បញ្ជូនយុវជនម្នាក់ដែលជាប់ចោទនាំនាងជាកូនក្រមុំរត់ចេញពីរោងការទៅបង្ខាំងទុកក្នុងផ្ទះជួលមួយកន្លែង ហើយបានរំលោភសេពសន្ថវៈបំផ្លាញអនាគតរបស់នាង ។
យុវជនជាប់ចោទជាព្រានរូបនេះឈ្មោះទូច នៅ អាយុ៣១ឆ្នាំ មានស្រុកកំណើតនៅភូមិព្រៃដងទឹក ឃុំព្រះនិព្វាន ស្រុកគងពិសី ខេត្តកំពង់ស្ពឺ មុខរបរបុគ្គលិក មណ្ឌលសុខភាពរកាកោះ បានជាប់ចោទពីករណីពង្រត់មនុស្ស និងប្លន់យកទ្រព្យសម្បត្តិ ។ ចំណែកនារីរងគ្រោះអាយុ១៨ឆ្នាំ មានអាសយដ្ឋានស្នាក់នៅស្រុកសំរោងទង ខេត្តកំពង់ស្ពឺ ។
ទាក់ទិននឹងការចាប់ខ្លួនយុវជនរូបនេះ ត្រូវបានមន្ត្រីនគរបាលការិយាល័យស៊ើបការណ៍ឱ្យដឹងថា កាលពីថ្ងៃទី២៣ មករា ២០១១ កន្លងទៅ នារីឈ្មោះ ត.គ.ហ គឺជាកូនក្រមុំត្រៀមរៀបមង្គលការ ហើយនៅយប់ថ្ងៃចូលរោងការ ឈ្មោះទូច នៅ បានទូរស័ព្ទទាក់ទងទៅនាងកុំឱ្យរួមដំណេក ជាមួយបុរស ដែលត្រូវជាស្វាមីនោះ ។ ទូច នៅ ថែមទាំងគំរាមថា បើមិនធ្វើតាមទេ គេនឹងសម្លាប់គ្រួសារនាងមួយពូជ ព្រមទាំងដុតផ្ទះចោលទៀតផង ។ មន្ត្រីនគរបាលក្រសួងមហាផ្ទៃបានបន្តថា ទូច នៅ បានទូរស័ព្ទគំរាមនាងមិនអស់ចិត្ត គេបានណាត់ទៅជួបនាងទាំងយប់នៅខាងក្រោយភូមិក្នុងថ្ងៃពិធីមង្គលការទៀត។ ទង្វើនេះហាក់ដូចជាមានការព្រមព្រៀងគ្នាណាមួយ បានជាហ៊ានទៅជួបគ្នាស្ងាត់ទាំងយប់បែបនេះ ។ ពេលជួបគ្នានោះនាងត្រូវឈ្មោះទូច នៅ គំរាមចាប់បង្ខំឱ្យឡើងជិះម៉ូតូ ហើយបាននាំមកកាន់រាជធានីភ្នំពេញ ចោលរោងការ ធ្វើឱ្យសាច់ញាតិខាងប្រុសរួមទាំងខាងស្រីផងឆោឡោទាំងកណ្តាលយប់ ព្រោះបាត់កូនក្រមុំ ។
ពេលរំដោះនាងចេញផុតពីរោងការហើយ ទូច នៅ បានយកនាងទៅឃុំទុកផ្ទះជួលមួយម្តុំផ្សារដើមថ្កូវ ខណ្ឌចំការមន ដោយមាននារី២នាក់ជួយមើលថែរក្សាផង។ ពេញ១យប់ដែលគេចាប់ពង្រាត់នាងចេញពីរោងការ ទូច នៅ បានចាប់បង្ខំរំលោភនាងរហូតបានសម្រេច បន្តបន្ទាប់ជាច្រើនដងទៀតផង តែនារីរងគ្រោះមិនហ៊ានប្រកែកទេ ព្រោះខ្លាចគេសម្លាប់ ។
ការស្នាក់នៅផ្ទះជួលជាមួយជនត្រូវចោទឈ្មោះទូច នៅ និងជនរងគ្រោះ មានរយៈពេលជិតពាក់កណ្តាលខែមេសា ។ មុនថ្ងៃបុណ្យចូលឆ្នាំប្រពៃណីខ្មែរ២ថ្ងៃ ជនរងគ្រោះត្រូវបានគេឌុបយកទៅទម្លាក់ចោលក្បែរស្ពានមួយជិតផ្ទះនាងទាំងយប់ សរុបទៅការរស់នៅក្នុងស្ថានភាពបង្ខាំងនេះ មានរយៈពេលជាង៣ខែ។ ក្នុងចន្លោះពេលនោះហើយដែលឪពុកម្តាយទាំងសងខាងជ្រួលច្របល់ដាក់ពាក្យបណ្តឹងទៅសមត្ថកិច្ចផង និងចែកផ្លូវគ្នាតាមស្វែងរកនារីរងគ្រោះផង ដោយចំណាយប្រាក់អស់សន្ធឹកសន្ធាប់ តែរកមិនឃើញទាល់តែសោះ រហូតម្នាក់ៗអស់សង្ឃឹមទីបំផុតនាងដើរចូលផ្ទះវិញ ទាំងទឹកភ្នែកហូរជោកជាំ ។
ក្រោយពីចូលផ្ទះហើយ រយៈពេល១ខែ ក៏មានការប្តឹងមកសមត្ថកិច្ចនគរបាលការិយាល័យស៊ើបការណ៍នៃនាយកដ្ឋានព្រហ្មទណ្ឌក្រសួង ដើម្បីឱ្យជួយចាត់ការរឿងរបស់នាងដែលប្រុសព្រានចាប់ពង្រត់ពីរោងការនាំទៅបង្ខាំងទុករំលោភសេពសន្ថវៈក្នុងផ្ទះជួល ឯរាជធានីភ្នំពេញ ។ មន្ត្រីនគរបាលបានឱ្យដឹងទៀតថា យោងលើពាក្យបណ្តឹងនារីរងគ្រោះនោះហើយបានជារហូតដល់ថ្ងៃទី១៤ ឧសភា ទើបមានការស្រាវជ្រាវចាប់ខ្លួនបុរសជាប់ចោទតាមដីការបស់សាលាដំបូងខេត្តកំពង់ស្ពឺ ថែមទាំងបាននាំខ្លួនជនរូបនោះទៅដាក់ពន្ធនាគារជាបណ្តោះអាសន្ន ដើម្បីរង់ចាំការស៊ើបអង្កេតបន្ត និងឈានទៅបើកសវនាការផ្តន្ទាទោសតាមផ្លូវច្បាប់ ៕
ចែករំលែកព័តមាននេះ