សហភាពអឺរ៉ុបស៊ើបអង្កេតភាពមិនប្រក្រតីរថយន្តអគ្គិសនីចិន ដូចហ៊ុចដងឱ្យក្រុមហ៊ុនវៀតណាម
វៀតណាម ៖ ក្រុមហ៊ុនផលិតរថយន្តអគ្គិសនីប្រទេសវៀតណាម VinFast គ្រោងនឹងដឹកជញ្ជូនរថយន្ត
វៀតណាម ៖ ក្រុមហ៊ុនផលិតរថយន្តអគ្គិសនីប្រទេសវៀតណាម VinFast គ្រោងនឹងដឹកជញ្ជូនរថយន្តដំបូងរបស់ខ្លួន ទៅកាន់អឺរ៉ុបនៅឆ្នាំនេះតែម្តង បន្ទាប់ពីទទួលបានការយល់ព្រមបទប្បញ្ញត្តិ។ នេះបើយោងតាមនាយកប្រតិបត្តិក្រុមហ៊ុន VinFast បានប្រាប់ទីភ្នាក់ងារសារព័ត៌មានរ៉យទ័រ កាលពីថ្ងៃទី២១ ខែកញ្ញា កន្លងទៅ។ គួររំលឹកថា សហភាពអឺរ៉ុប ស៊ើបអង្កេតភាពមិនប្រក្រតីលើតម្លៃរថយន្តអគ្គិសនីរបស់ចិន
ខណៈពេលដែលសហភាពអឺរ៉ុប EU កំពុងពិចារណាដាក់ពន្ធលើរថយន្តអគ្គិសនីរបស់ចិន ដែលជាគូប្រជែងរបស់ខ្លួន និងកំពុងដំណើរការស៊ើបអង្កេតលើការគាំទ្ររដ្ឋរបស់ប្រទេសចិនចំពោះក្រុមហ៊ុនផលិតរថយន្តអគ្គិសនី ដូច្នេះក្រោមផែនការនេះ រថយន្តអគ្គិសនីម៉ូដែល Crossovers VF8 ប្រហែល៣ពាន់គ្រឿងចេញពីរោងចក្រ VinFast ភាគខាងជើង ប្រទេសវៀតណាម នឹងត្រូវដឹកជញ្ជូនទៅប្រទេសបារាំង អាល្លឺម៉ង់ និងហូឡង់ នៅក្នុងត្រីមាសទី៤ នៃឆ្នាំនេះ។ នេះបើតាមការបង្ហើបពីបុគ្គលសុំមិនបញ្ចេញឈ្មោះប្រាប់សារព័ត៌មានរ៉យទ័រ ដោយសារព័ត៌មានលម្អិតទាំងនេះមិនទាន់ប្រកាសជាសាធារណៈ។
ផែនការរបស់ក្រុមហ៊ុន VinFast ដែលបានចុះបញ្ជីជាមួយ Nasdaq ក្នុងការពង្រីកទៅកាន់ទីផ្សារអឺរ៉ុប នឹងតំណាងឱ្យការកើនឡើងចំនួន ៤ដងពីគោលដៅដែលមិនបានសម្រេចពីមុនរបស់ខ្លួន ក្នុងការចែកចាយរថយន្តអគ្គិសនី ៧០០គ្រឿងក្នុងខែកក្កដាឆ្នាំមុន។ ប្រសិនបើការដាក់ពន្ធលើរថយន្តអគ្គិសនីចិនសម្រេចជាផ្លូវការ នោះអឺរ៉ុបអាចក្លាយជាទីផ្សារក្រៅប្រទេសដ៏ធំបំផុតរបស់ VinFast នៅឆ្នាំនេះ។
ក្រុមហ៊ុន VinFast បានដឹកជញ្ជូនរថយន្តអគ្គិសនីប្រហែល ២,១០០គ្រឿងនៅដើមឆ្នាំនេះ ទៅកាន់សហរដ្ឋអាមេរិក ហើយគ្រោងនឹងដឹកជញ្ជូនម៉ូដែល VF9 របស់ខ្លួនបន្ថែមទៀត។ លោកស្រី Le Thi Thu Thuy នាយកប្រតិបត្តិក្រុមហ៊ុន VinFast បានលើកឡើងថា «យើងរំពឹងថានឹងផ្តល់ម៉ូដែល VF8 ដំបូងដល់អតិថិជនបារាំង អាឡឺម៉ង់ និងហូឡង់ក្នុងត្រីមាសទី ៤ នៃឆ្នាំនេះ។ ម៉ូដែលផ្សេងទៀតរបស់ក្រុមហ៊ុនរួមមាន VF6, VF7, និង VF9 នឹងត្រូវបានដាក់ឱ្យដំណើរការ នៅក្នុងទីផ្សារអឺរ៉ុបនៅឆ្នាំក្រោយ»។
លោកស្រីមិនបានបង្ហាញអពីចំនួនរថយន្តម៉ូដែល VF8 នោះទេ ប៉ុន្តែអ្នកបានដឹងពីផែនការនេះ បានបង្ហើបថា VF8 នឹងមានប្រហែល ៣ពាន់គ្រឿង រួមទាំងមួយចំនួនសម្រាប់ផ្តល់ទៅប្រទេសអ៊ីស្រាអែលផងដែរ។ លោក Le Thi Thu Thuy បានបញ្ជាក់ថា រថយន្ត VF8 ត្រូវបានអនុម័តដោយនិយតករអឺរ៉ុបរួចហើយ ដោយអនុលោមតាមស្តង់ដារសហភាពអឺរ៉ុប ហើយអាចត្រូវបានលក់នៅក្នុងប្លុកដែលមាន២៧ប្រទេស៕ (ប្រភពពី Reuters)
ចែករំលែកព័តមាននេះ