ADផ្ទាំងផ្សព្វផ្សាយពាណិជ្ជកម្ម

Picture

រថយន្ត​តាកូ​ម៉ា​បែក​កង់​មុខ​ក្រឡាប់​យក​ជើង​ទ្រមេឃគ្មាន​អ្នក​រង​របួស

14 ឆ្នាំ មុន

ខេត្តក្រចេះ ៖ រថយន្តទំនើប​ម៉ាក​តាកូម៉ា មួយគ្រឿង​ ខណៈ​ពេល​បោះពួយហួស​ល្បឿន ហើយបែក​កង់​ខាង​មុខ​​បណ្តាល​ឱ្យ​រេចង្កូត​ធ្លាក់​ស្នាមភ្លោះ​ក្រឡាប់​ផ្ងារ​ពោះ ប៉ុន្តែ​សំណាង​ល្អមិន​បង្ក​ឲ្យ​នរណា​ម្នាក់​ជិះក្នុងរថយន្ត​ដែល​សុទ្ធសឹង​ជា​​ជនជាតិចិនរង​របួស​ធ្ងន់ធ្ងរទេ

ខេត្តក្រចេះ ៖ រថយន្តទំនើប​ម៉ាក​តាកូម៉ា មួយគ្រឿង​ ខណៈ​ពេល​បោះពួយហួស​ល្បឿន ហើយបែក​កង់​ខាង​មុខ​​បណ្តាល​ឱ្យ​រេចង្កូត​ធ្លាក់​ស្នាមភ្លោះ​ក្រឡាប់​ផ្ងារ​ពោះ ប៉ុន្តែ​សំណាង​ល្អមិន​បង្ក​ឲ្យ​នរណា​ម្នាក់​ជិះក្នុងរថយន្ត​ដែល​សុទ្ធសឹង​ជា​​ជនជាតិចិនរង​របួស​ធ្ងន់ធ្ងរទេ។

ហេតុការណ៍នេះបានកើត​ឡើងកាលពីវេលា​ម៉ោង​៣និង​១០នាទី​រសៀល ថ្ងៃ​ទី១៥ ឧសភា នៅ​លើ​​កំណាត់ផ្លូវជាតិ​លេខ​៧ ត្រង់ភូមិសាស្រ្ត​ចំណុច​ភ្នំព្រិច ក្នុងភូមិស្រែ​រនាម ឃុំស្វាយជ្រះ ស្រុក​ស្នួល ហើយ​រថយន្ត​ដែល​ជួបឧប្បត្តិ​ហេតុ​ក្រឡាប់ខ្លួនឯងនេះ ជា​រថយន្ត​ម៉ាក​តាកូម៉ា ពណ៌​ទឹក​ប្រាក់ ពាក់ស្លាក​លេខ​ភ្នំពេញ 2P-4774 បើក​បរ​ក្នុងទិស​ដៅពី​កើត​មកលិច។

តាមប្រភពព័ត៌មានពីកន្លែងកើតហេតុបានឱ្យ​ដឹងថា នៅវេលាម៉ោងកើតហេតុគេបានឃើញ​រថយន្តមួយ​គ្រឿងនេះ បើកបរក្នុងល្បឿនលឿន លុះមកដល់ចំណុចកើតហេតុ​ជាផ្លូវកោង ស្រាប់​តែ​បែកកង់មុខ​បណ្តាលឲ្យក្រឡាប់ជាច្រើ​ន​ត្រឡប់​​ធ្លាក់ចូល​ស្នាម​ភ្លោះ​ក្បែរ​ចិញ្ចើមផ្លូវ​ ធ្វើឲ្យ​អ្នក​ជិះក្នុង​រថយន្ត​មានស្រីប្រុស​វារលូនចេញពី​ក្នុងរថយន្តទាំង​សភាព​ភ័យស្លន់ស្លោ។

អ្នក​ជិះក្នុងរថយន្តទាំងអស់មានគ្នាបួននាក់ ដែលសុទ្ធ​សឹងជាជនជាតិចិន ក្នុងនោះមាន​ស្រ្តីពីរ​នាក់ តែ​សំណាង​ល្អមិនបណ្តាលឲ្យ​នរណាម្នាក់រង​របួស​នោះទេ។ មិនមាន​ប្រភពព័ត៌មានណាមួយ​​បញ្ជាក់​ឲ្យដឹងថា ជនជាតិចិនទាំងបួននាក់​​នេះ ធ្វើដំណើរទៅណានោះទេ តែបើតាម​ប្រភពព័ត៌​មាន​មួយចំនួនបានឲ្យដឹងថា ជនជាតិ​ចិន​ទាំងបួន​នាក់នេះ ជាអ្នកបម្រើការងារ​ឱ្យ​ក្រុមហ៊ុន​វិនិ​យោគ​ក្នុងស្រុកមួយ ៕