អណ្ដាតភ្លើងបានលេបត្របាក់ផ្ទះមួយខ្នង ធ្វើអំពីឈើលើ ថ្មក្រោយយ៉ាងសន្ធោសន្ធៅ បណ្ដាលឱ្យខូចខាតអស់ទាំងស្រុង បង្កឱ្យមានការភ្ញាក់ផ្អើល
ខេត្តបន្ទាយមានជ័យ ៖ បើតាមសេចក្តីរាយការណ៍បានឱ្យដឹងថា អណ្ដាតភ្លើងបានលេបត្របាក់ផ្ទះមួយខ្នង ធ្វើអំពីឈើលើ ថ្មក្រោយយ៉ាងសន្ធោសន្ធៅ បណ្ដាលឱ្យខូចខាតអស់ទាំងស្រុង បង្កឱ្យមានការភ្ញាក់ផ្អើលកាលពីល្ងាចថ្ងៃទី១៩ ខែកញ្ញា ឆ្នាំ២០២៣ ស្ថិតនៅក្នុងភូមិ-ឃុំគំរូ ស្រុកថ្មពួក ខេត្តបន្ទាយមានជ័យ។ ហើយបើតាមសមត្ថកិច្ច បានធ្វើការសន្និដ្ឋានជាជំហានដំបូងថា អាចបណ្ដាលមកពីឆ្លងចរន្តអគ្គិសនី ទើបបង្កឱ្យមានអគ្គិភ័យឆាបឆេះបែបនេះ។
លោក យ៉ុង យឺន អភិបាលរងស្រុកថ្មពួក បានប្រាប់ឱ្យដឹងថា នៅមុនពេលដែលអគ្គិភ័យកំពុងតែឆាបឆេះផ្ទះនោះ គឺម្ចាស់កំពុងនៅក្រោមផ្ទះជាមួយកូនចៅ លុះពេលអគ្គិភ័យឆាបឆេះផ្ទះផ្នែកខាងលើយ៉ាងសន្ធោសន្ធៅ ទើបម្ចាស់ផ្ទះដឹងខ្លួន។ ហើយដោយសារតែផ្ទះកើតហេតុ គឺទល់មុខអធិការដ្ឋាននគរបាលស្រុកថ្មពួកផង ក៏បានបញ្ចេញរថយន្តពន្លត់អគ្គិភ័យ១គ្រឿង និងកម្លាំងមកអន្តរាគមន៍បាញ់ទឹកពន្លត់។ ប៉ុន្តែអគ្គិភ័យនោះ បានឆាបឆេះផ្ទះអស់ស្ទើរទាំងស្រុងទៅហើយ តែមិនបណ្តាលរាលដាលឆេះដល់ផ្ទះអ្នកជិតខាងនោះឡើយ។
លោកបានបញ្ជាក់ថា ចំពោះមូលហេតុដែលអគ្គិភ័យឆាបឆេះផ្ទះមួយខ្នង ធ្វើអំពីឈើលើ ថ្មក្រោមនេះ គឺបណ្តាលមកពីឆ្លងចរន្តអគ្គិសនី ទើបបង្កឱ្យឆាបឆេះផ្នែកខាងលើ រួចរាលដាលមកដល់ផ្នែកក្រោម។ ហើយប្រើប្រាស់រថយន្តពន្លត់អគ្គិភ័យអស់១គ្រឿងរបស់អធិការដ្ឋាននគរបាលស្រុកថ្មពួក ដោយបូមពីប្រឡាយមុខផ្ទះមកបា.ញ់ពន្លត់ ទើបរលត់ទៅវិញទាំងស្រុង តែមិនបណ្តាលឱ្យរាលដាលឆេះផ្ទះអ្នកជិតខាងនោះទេ គ្រាន់តែឆេះផ្ទះជនរងគ្រោះអស់ទាំងស្រុងតែប៉ុណ្ណោះ។
លោក យ៉ុង យឺន បានបញ្ជាក់ទៀតថា ផ្ទះដែលរងគ្រោះដោយសារអគ្គិភ័យនេះ មានម្ចាស់ឈ្មោះ ព្រិល អើយ អាយុ៦១ឆ្នាំ (ជាស្ត្រីមេម៉ាយ) រស់នៅជាមួយកូនចៅ ដោយផ្ទះធ្វើអំពីឈើលើ ថ្មក្រោម មានបណ្តោយ៩ម៉ែត្រ និងទទឹង៧ម៉ែត្រ បណ្ដាលឱ្យរងការខូចខាតអស់ទាំងស្រុង។ ហើយគ្រោះអគ្គិភ័យនេះ ជនរងគ្រោះមិនអាចយកទ្រព្យសម្បត្តិចេញទាន់វេលានោះទេ គឺត្រូវអគ្គិភ័យឆាបឆេះខ្ទេចគ្មានសល់អ្វី៕
ចែករំលែកព័តមាននេះ