ខេត្តសៀមរាប ៖ ក្រុមមន្ដ្រីអាជា្ញធរខេត្ដបានអះអាងថា សំណង់មិនរៀបរយរបស់ប្រជាពលរដ្ឋរាប់រយខ្នងនៅអមសងខាងស្ទឹងប្រវត្ដិសាស្ដ្រសៀមរាប នឹងតម្រូវឱ្យរុះរើទៅរស់នៅឯជាយក្រុងសៀមរាប នៅអំឡុងពាក់កណ្ដាលឆ្នាំ២០១១ នេះ ដើម្បីយកដីនោះរៀបចំធ្វើផ្លូវនិងសួនច្បារសម្រាប់លើកកម្ពស់វិស័យទេសចរណ៍
ខេត្តសៀមរាប ៖ ក្រុមមន្ដ្រីអាជា្ញធរខេត្ដបានអះអាងថា សំណង់មិនរៀបរយរបស់ប្រជាពលរដ្ឋរាប់រយខ្នងនៅអមសងខាងស្ទឹងប្រវត្ដិសាស្ដ្រសៀមរាប នឹងតម្រូវឱ្យរុះរើទៅរស់នៅឯជាយក្រុងសៀមរាប នៅអំឡុងពាក់កណ្ដាលឆ្នាំ២០១១ នេះ ដើម្បីយកដីនោះរៀបចំធ្វើផ្លូវនិងសួនច្បារសម្រាប់លើកកម្ពស់វិស័យទេសចរណ៍។
ថ្លែងនៅក្នុងពិធីបញ្ចុះបឋមសិលា និងបើកការដ្ឋានសាងសង់អគារលក់សំបុត្រពេលថ្ងៃនៃមជ្ឈមណ្ឌលស្វាគមន៍ភ្ញៀវទេសចរខេត្ដសៀមរាប-អង្គរ កាលពីថ្ងៃទី១២ ឧសភា កន្លងទៅនេះ លោកស៊ូ ភិរិន្ទ អភិបាលខេត្ដសៀមរាប បានមានប្រសាសន៍ថា លំនៅឋានប្រជាពលរដ្ឋទាំងអស់ដែលសង់នៅលើដីចំណីស្ទឹង និងចំណីផ្លូវហើយបានបំពុលបរិស្ថានទឹកស្ទឹងប្រវត្ដិសាស្ដ្រសៀមរាប ជាយូរមកហើយនោះ នឹងត្រូវតម្រូវឱ្យរុះរើចេញនៅអំឡុងខែមិថុនា ខាងមុខនេះ ដើម្បីយកដីទាំងនោះស្ថាបនាផ្លូវចាក់កៅស៊ូនិងសួនច្បារដែលជាផ្នែកមួយនៃកិច្ចប្រឹងប្រែងធ្វើការអនុវត្ដន៍ «កម្មវិធីទីក្រុងស្អាត រមណីយដ្ឋានស្អាត» សម្រាប់ទាក់ទាញអារម្មណ៍ភ្ញៀវទេសចរដែលកំពុងតែមានសក្ដានុពលនាពេលនេះ។
លោកអភិបាលខេត្តបានថ្លែងបន្ដដោយប្ដេជ្ញាយ៉ាងមោះមុតថា ផែនការជម្លៀសប្រជាពលរដ្ឋចេញពីស្ទឹងហ្នឹងយើងនឹងចាប់ផ្ដើមធ្វើឱ្យបានប្រាកដប្រជាបំផុត ដោយពេលនេះអាជា្ញធរខេត្ដបានរៀបចំដីមួយកន្លែងនៅភូមិកន្ដ្រក សង្កាត់ស្វាយដង្គំ ប៉ែកខាងលិចឆៀងខាងត្បូងក្រុងសៀមរាប សម្រាប់ដោះស្រាយគោលនយោបាយជូនប្រជាពលរដ្ឋទាំងនោះ គឺមួយគ្រួសារទទួលបានដីមួយប្លង់ទំហំ៧ម៉ែត្រគុណ១៥ម៉ែត្រ សម្រាប់សាងសង់លំនៅឋានថ្មី ។
លោកបានបញ្ជាក់បន្ថែមថា ស្ទឹងប្រវត្ដិសាស្ដ្រសៀមរាប គឺជាស្ទឹងដែលប្រៀបដូចជាឋានសួគ៌ ដោយសារតែស្ទឹងនេះមានប្រភពចេញពីភ្នំគូលែន ហើយហូរកាត់លិង្គមួយពាន់ដែលព្រះរាជាសម័យមុនបានកសាងទ្បើងក្នុងការច្រោះទឹកធម្មតាទៅជាអម្រឹតតាមជំនឿសាសនា សម្រាប់បម្រើការប្រើប្រាស់របស់ប្រជាពលរដ្ឋ ដូច្នេះមិនអាចឱ្យប្រជាពលរដ្ឋសង់ផ្ទះដ៏ច្រើនសន្ធឹកសន្ធាប់នៅលើស្ទឹង ហើយបន្ទោបង់ ចោលសំរាម ឬបង្ហូរទឹកសំអុយចូលទៅក្នុងទឹកស្ទឹងដូចមុនទៀតទេ ត្រូវតែរៀបចំឡើងវិញ។
កាលពីព្រឹកថ្ងៃអាទិត្យ ទី១៥ ឧសភា កន្លងទៅនេះ អភិបាលក្រុងសៀមរាប លោកទេព ប៊ុនឆាយ មិនបានធ្វើការពន្យល់ឱ្យបានល្អិតល្អន់ទាក់ទិនទៅនឹងគម្រោងការជម្លៀសប្រជាពលរដ្ឋចេញពីស្ទឹងសៀមរាបនោះទេ ដោយលោកបញ្ជាក់យ៉ាងដូច្នេះថា បញ្ហាហ្នឹងវានៅមានភាពស្មុគស្មាញណាស់ ម្យ៉ាងទៀតគម្រោងការនោះខាងអន្ដរមន្ទីរហិរញ្ញវត្ថុជាអ្នកចាត់ចែង ឯអាជា្ញក្រុងគ្រាន់តែជាសមាជិកប៉ុណ្ណោះ ។
អភិបាលរងក្រុងសៀមរាប លោកអឿន ពៅ ធ្លាប់បានបញ្ជាក់ថា សំណង់មិនរៀបរយនៅលើដីចំណីស្ទឹង និងផ្លូវដែលចាំបាច់ត្រូវរុះរើទាំងនោះមានចំនួន២៧៦ខ្នង សង់នៅប្របសងខាងមាត់ស្ទឹងចាប់ពីស្ពាននាគដល់អាងចិញ្ចឹមក្រពើ ដែលសំណង់ទាំងនោះកន្លងមកតែងតែបានបង្កការគំរាមកំហែងយ៉ាងខ្លាំងទៅលើបរិស្ថាន និងសោភ័ណភាពស្ទឹងប្រវត្ដិសាស្ដ្រមួយនេះ។
ទាក់ទិនទៅនឹងគម្រោងការកែលំអរស្ទឹងប្រវត្ដិសាស្ដ្រសៀមរាបដូចគ្នានោះដែរ អភិបាលរងខេត្ដសៀមរាប លោកប៊ុន ថាឬទ្ធិ ធ្លាប់បានបញ្ជាក់ថា គម្រោងការកែលំអរស្ទឹងសៀមរាប គ្រោងនឹងប្រើប្រាស់កញ្ចប់ថវិកាប្រមាណ៤០លានដុល្លារ ដែលជាឥណទានរបស់ប្រទេសកូរ៉េ ក្នុងនោះថវិកាមួយចំណែកសម្រាប់ដោះស្រាយគោលនយោបាយជូនប្រជាពលរដ្ឋ និងមួយផ្នែកទៀតសម្រាប់ស្ថាបនាផ្លូវអមសងខាងស្ទឹងចម្ងាយ៥,៨គីឡូម៉ែត្រ លំអរដោយសួនច្បារ និងសង់រហាត់ទឹកពន្លេចដោយភ្លើងចម្រុះពណ៌យ៉ាងល្អឆើតឆាយ សម្រាប់ភ្ញៀវទេសចរមកកម្សាន្តលេងផងដែរ។ ឥណទានរបស់សាធារណរដ្ឋកូរ៉េនោះ ក៏បានបូកបញ្ចូលគំរោងការស្ថាបនាប្រព័ន្ធលូរំដោះទឹកកខ្វក់-សំណល់នៅប៉ែកខាងកើតស្ទឹងផងដែរ។
ស្ដ្រីម្នាក់សូមមិនឱ្យបញ្ចេញឈ្មោះដែលមានផ្ទះនៅលើដីចំណីស្ទឹងសៀមរាបនោះបាននិយាយថា គាត់មករស់នៅទីនេះតាំងពីឆ្នាំ១៩៧៩ មកម៉្លេះ ហើយពេលនេះគាត់បានទទួលព័ត៌មានថា អាជ្ញាធរនឹងបណ្ដេញចេញធ្វើឱ្យគាត់មានការព្រួយបារម្ភយ៉ាងខ្លាំង ព្រោះមិនដឹងទៅរស់នៅទីណា។ ស្ដ្រីដដែលបានបន្ដថា គាត់មិនបានដឹងថាអាជ្ញាធរដោះស្រាយគោលនយោបាយជាដីឱ្យពួកគាត់ទេ គ្រាន់តែដឹងថា មានសំណងបន្ដិចបន្ដួចសម្រាប់ការរុះរើ និងថ្លៃដំណាំហូបផ្លែតែប៉ុណ្ណោះ។ ក្រុមមន្ដ្រីសង្គមស៊ីវិលដែលធ្វើការតាមដានទៅលើប្រជាពលរដ្ឋរស់នៅតាមបណ្ដោយមាត់ស្ទឹងនោះ បានសម្ដែងនូវការគាំទ្រចំពោះអាជា្ញធរខេត្ដក្នុងការអភិវឌ្ឍន៍ក្រុងទេសចរណ៍មួយនេះឱ្យមានសោភ័ណភាពកាន់តែប្រសើរដើម្បីបំរើឱ្យវិស័យទេសចរណ៍។
លោកសួស ណារិន មន្ដ្រីស៊ើបអង្កេតរបស់សមាគមការពារសិទ្ធិមនុស្ស «អាដហុក» ប្រចាំខេត្ដសៀមរាបបានថ្លែងកាលពីរសៀលថ្ងៃអាទិត្យនោះថា ខាងសង្គមស៊ីវិលយល់ឃើញថា ការរស់នៅលើដីចំណីស្ទឹងហ្នឹងពិតជាបានបំពុលបរិស្ថានមែន ប៉ុន្ដែកាតព្វកិច្ចរដ្ឋក្នុងការឱ្យប្រជាពលរដ្ឋចាកចេញពីតំបន់នោះ គួរមានគោលដៅដោះស្រាយគោលនយោបាយឱ្យបានជាក់លាក់ មានរៀបចំហេដ្ឋារចនាសម្ព័ន្ធសង្គម ផ្លូវថ្នល់ សាលារៀន មណ្ឌលសុខភាពឱ្យបានរួចរាល់មុននឹងឱ្យពួកគាត់ទៅរស់នៅតំបន់ថ្មីនោះ ទើបប្រសើរ។ លោកបានបន្ថែមថា ក្នុងនាមសង្គមស៊ីវិល សូមជំរុញដល់អាជា្ញធររៀបចំគម្រោងការជម្លៀសនោះឱ្យបានឆាប់រហ័សមុនរដូវភ្លៀងដើម្បីឱ្យប្រជាពលរដ្ឋទាំងអស់នោះលោកមានសិទ្ធិតាំងទីលំនៅថ្មីហ្នឹងឱ្យបានសមរម្យ ជៀសវាងបណ្ដេញចំពេលខែភ្លៀងធ្លាក់ដែលនាំឱ្យមានការលំបាក។
ស្ទឹងប្រវត្ដិសាស្ដ្រសៀមរាបមានប្រភពចេញពីភ្នំគូលែន ហូរកាត់ស្រុកចំនួនពីរគឺស្រុកបន្ទាយស្រី និងស្រុកអង្គរធំ និងពុះទីក្រុងទេសចរណ៍សៀមរាបជាពីរ គឺខាងកើតនិងខាងលិច មុននឹងហូរចាក់ទៅក្នុងទន្លេសាប។ កាលពីដើមស្ទឹងនេះមានទឹកថ្លាឆ្វង់មើលឃើញបាតដី ប៉ុន្ដែបច្ចុប្បន្នត្រូវបានបំពុលយ៉ាងចាស់ដៃពីសំណាក់សំណង់រាប់សិបខ្នងខាងលើ បូករួមទាំងការបង្ហូរទឹកស្អុយពីសណ្ឋាគារ ភោជនីយដ្ឋាន ផ្សារលក់ដូរមួយចំនួន ជាពិសេសសកម្មភាពបូមខ្សាច់នៅផ្នែកខាងលើៗផងដែរ បានធ្វើឱ្យទឹកស្ទឹងប្រែក្លាយពីថ្លាមកល្អក់ដូចទឹកបាយ និងមានសំរាមអណ្ដែតត្រៀបត្រាពេញផ្ទៃទឹក មើលទៅគួរឱ្យរអើមមិនចង់ទៅក្បែរ ។ ដូច្នេះអាជា្ញធរគួរតែចាត់វិធានការការពារចំពោះផលប៉ះពាល់ទាំងនោះឡងវិញ ទើបផែនការកែលំអរស្ទឹងប្រវត្ដិសាស្ដ្រនេះបានជោគជ័យ៕
ចែករំលែកព័តមាននេះ