រាជធានីភ្នំពេញ ៖ កម្លាំងសមត្ថកិច្ចនគរបាលការិយាល័យព្រហ្មទណ្ឌកម្រិតស្រាលរាជធានីភ្នំពេញ និងកម្លាំងនគរបាលក្រុងតាខ្មៅ ខេត្តកណ្តាល នារសៀលថ្ងៃទី១៩ ខែកញ្ញា ឆ្នាំ២០២៣ បានសហការធ្វើការឃាត់ខ្លួនអគ្គនាយកក្រុមហ៊ុន ញឹម…
រាជធានីភ្នំពេញ ៖ កម្លាំងសមត្ថកិច្ចនគរបាលការិយាល័យព្រហ្មទណ្ឌកម្រិតស្រាលរាជធានីភ្នំពេញ និងកម្លាំងនគរបាលក្រុងតាខ្មៅ ខេត្តកណ្តាល នារសៀលថ្ងៃទី១៩ ខែកញ្ញា ឆ្នាំ២០២៣ បានសហការធ្វើការឃាត់ខ្លួនអគ្គនាយកក្រុមហ៊ុន ញឹម ខេមរៈ រៀលអ៊ីស្នេត ឯ.ក ដើម្បីយកទៅឃុំខ្លួន អនុវត្តទោស ២ឆ្នាំ តាមអំណាចសាលក្រមកំបាំងមុខ របស់ចៅក្រមជំនុំជម្រះសាលាដំបូងរាជធានីភ្នំពេញ ។
ជនជាប់ចោទមានឈ្មោះ ញឹម ខេមរៈ ភេទប្រុស អាយុ៣៦ឆ្នាំ ជាអគ្គនាយកក្រុមហ៊ុន ញឹម ខេមរៈ រៀលអ៊ីស្នេត ឯ.ក មានទីលំនៅផ្ទះលេខ១៦០ ផ្លូវលំ ភូមិសែនសុខទី៥ សង្កាត់ឃ្មួញ ខណ្ឌសែនសុខ រាជធានីភ្នំពេញ ។
តាមសាលក្រមកំបាំងមុខរបស់សាលាដំបូងរាជធានីភ្នំពេញ បានបញ្ជាក់ថា ហេតុដូច្នេះវិនិច្ឆ័យសេចក្តី ១.ផ្តន្ទាទោសឈ្មោះ ញឹម ខេមរៈ ដាក់ពន្ធនាគារកំណត់០២ឆ្នាំ ពីបទ.ឆបោក មានស្ថានទម្ងន់ទោស ប្រព្រឹត្តនៅចំណុចផ្ទះលេខ២ឃ ផ្លូវសឡា ភូមិទ្រា សង្កាត់ស្ទឹងមានជ័យ៣ ខណ្ឌមានជ័យ រាជធានីភ្នំពេញ កាលពីអំឡុងឆ្នាំ២០១៩ ដល់ឆ្នាំ២០២១ តាមបញ្ញត្តិមាត្រា ៣៧៧ មាត្រា ៣៨០ នៃក្រមព្រហ្មទណ្ឌ ។ សាលក្រមបានបង្គាប់ឲ្យជនជាប់ចោទឈ្មោះ ញឹម ខេមរៈ សងប្រាក់ទៅដើមបណ្តឹងរដ្ឋប្បវេណី ៖
១.ឈ្មោះ វង រតនៈ ចំនួន ៧,៤២០ ដុល្លារអាមេរិក និងជំងឺចិត្ត ចំនួន ៦លានរៀល ។
២.ឈ្មោះ វង កក្កដា ចំនួន ៣,៧៥០ ដុល្លារអាមេរិក និងជំងឺចិត្តចំនួន ៣លានរៀល ។
៣.ឈ្មោះ ប៊ិន ហោវៃឡាក់គី ចំនួន ២,០០០ ដុល្លារអាមេរិក និងជំងឺចិត្ត ចំនួន ១លានរៀល ។ ការទាមទារលើសពីនេះ ត្រូវច្រានចោល ។
សម្រេចចេញបង្គាប់ឲ្យចាប់ខ្លួន និងឃុំខ្លួនជនជាប់ចោទឈ្មោះ ញឹម ខេមរៈ ដែលជាអគ្គនាយកក្រុមហ៊ុន ញឹម ខេមរៈ រៀលអ៊ីស្នេត ឯ.ក ដោយអនុវត្តតាមមាត្រា ៣៥៣ នៃក្រមនីតិវិធីព្រហ្មទណ្ឌ ។
សាលក្រមជំនុំជម្រះជាសាធារណៈនៅថ្ងៃទី២៨ ខែកុម្ភៈ ឆ្នាំ២០២៣ ដោយកំបាំងមុខជនជាប់ចោទឈ្មោះ ញឹម ខេមរៈ ចំពោះមុខដើមបណ្តឹងរដ្ឋប្បវេណី ហើយបានប្រកាសសាលក្រមជាសាធារណៈ នៅថ្ងៃទី១៤ ខែមីនា ឆ្នាំ២០២៣ ។
សាលក្រមបានទុកសិទ្ធិឲ្យប្តឹងទាស់ និងប្តឹងឧទ្ធរណ៍តាមកំណត់ច្បាប់ ។
ក្រោយឃាត់ខ្លួនសមត្ថកិច្ចបាននាំជនជាប់ចោទ មកកាន់ការិយាល័យនគរបាលព្រហ្មទណ្ឌកម្រិតស្រាលរាជធានីភ្នំពេញ ហើយបើតាមមន្ត្រីនគរបាលយុត្តិធម៌ បានចុះទៅអនុវត្តតាមអំណាចសាលក្រមនោះ បានបញ្ជាក់ថា ជនជាប់ចោទជាអគ្គនា យកក្រុមហ៊ុន ញឹម ខេមរៈ ពាក់ពន្ធករណីលក់ដីខ្យល់ និងត្រូវបញ្ជូនទៅតុលាការនៅព្រឹកថ្ងៃទី២០ ខែកញ្ញា ស្អែកនេះ ៕
ចែករំលែកព័តមាននេះ