ភ្នំពេញ៖ តាមការគ្រោងទុក នៅព្រឹកព្រលឹម​ថ្ងៃទី១៩ ខែកញ្ញាស្អែកនេះ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា នឹងអញ្ជើញជួបសំណេះសំណាល​ជាមួយកម្មករ​និយោជិត នៅតាមរោងចក្រសហគ្រាស ចំនួន ១៨,១០៤នាក់ មកពី ១៨​រោងចក្រសហគ្រាស នៅស្រុកបាទី ខេត្តតាកែវ។

រោងចក្រ សហគ្រាសទាំង ១៨នេះ ជាប្រភេទរោងចក្រកាត់ដេរសម្លៀកបំពាក់ ចំនួន ១៣ រោងចក្រ​ផលិត​ផលិតផលធ្វើដំណើរ និងកាបូប ចំនួន ២ រោងចក្រ​ដេរស្បែកជើង ចំនួន ២ និងរោងចក្រ​បោកគក់សម្លៀកបំពាក់ ចំនួន ១។

នេះគឺជាលើកទី៤ហើយ​  ដែលសម្តេចមហាបវរធិបតី ហ៊ុន ម៉ាណែត បានអញ្ជើញជួបសំណេះ​សំណាលជាមួយនឹងបងប្អូនកម្មករ​និយោជិត តាមបណ្តារោងចក្រសហគ្រាសនានា ក្នុងឋានៈជា នាយករដ្ឋមន្ត្រី នៃព្រះរាជាណាចក្រកម្ពុជា គិតចាប់ពីសម្តេច ចូលកាន់តំណែង​ជានាយករដ្ឋមន្ត្រី​កម្ពុជា កាលពីថ្ងៃទី២២ ខែសីហា ឆ្នាំ២០២៣​៕