ថៃប្រកាសផ្អាកបំណុលដំណាក់កាលដំបូង ដើម្បីជួយដោះបន្ទុកកសិករ៤លាននាក់
ថៃ ៖ លោក Julapun Amornvivat អនុរដ្ឋមន្ត្រីក្រសួងហិរញ្ញវត្ថុរបស់ប្រទេសថៃ បានប្រកាសថា កសិករ
ថៃ ៖ លោក Julapun Amornvivat អនុរដ្ឋមន្ត្រីក្រសួងហិរញ្ញវត្ថុរបស់ប្រទេសថៃ បានប្រកាសថា កសិករ និងសហគ្រាសធុនតូច និងមធ្យម មិនលើសពី៧លាននាក់/សហគ្រាស នឹងទទួលបានការសម្រាលបន្ទុក ឬភាពគ្រប់គ្រាន់ សម្រាប់ដំណាក់កាលដំបូង នៃការផ្អាកបំណុល ដែលជាវិធានការដ៏សំខាន់របស់រដ្ឋាភិបាល។ ការបំបែកតួលេខនេះ ត្រូវបានរំពឹងថា នឹងមានកសិករខ្នាតតូចប្រហែល៤លាននាក់ និងសហគ្រាសធុនតូច និងមធ្យម ៣លានសហគ្រាស។ នេះបើយោងតាមសារព័ត៌មាន The Thaiger ចេញផ្សាយនៅថ្ងៃទី១៨ ខែកញ្ញា ឆ្នាំ២០២៣។
យ៉ាងណាមិញ អនុរដ្ឋមន្ត្រីក្រសួងហិរញ្ញវត្ថុ បានបដិសេធមិនផ្តល់ព័ត៌មានជាក់លាក់អំពីវិសាលភាព និងដែនកំណត់ នៃការផ្អាកបំណុលនោះទេ ដោយព័ត៌មានលម្អិតទាំងនេះ ត្រូវបានកំណត់ដោយការទទួលខុសត្រូវសារពើពន្ធរបស់រដ្ឋាភិបាល ទាក់ទងនឹងការទូទាត់ការប្រាក់ដល់ស្ថាប័នហិរញ្ញវត្ថុរដ្ឋ។
លោក Julapun បានថ្លែងយ៉ាងដូច្នេះថា «ការផ្អាកបំណុល នឹងត្រូវផ្តល់ជូនដល់កសិករខ្នាតតូច និងសហគ្រាសធុនតូច និងមធ្យម ដោយមិនចាំបាច់មានការលំបាកអ្វីឡើយ។ ព័ត៌មានលម្អិតបន្ថែមអំពីគម្រោងនេះ កំពុងរង់ចាំនៅសប្តាហ៍ខាងមុខ ហើយគ្រោងនឹងបញ្ជូនទៅកិច្ចប្រជុំគណៈរដ្ឋមន្ត្រីនៅពេលចាប់ផ្តើមខែក្រោយ»។
ក្រោយការអនុវត្តដំណាក់កាលទី១ រដ្ឋាភិបាលមានបំណងស៊ើបអង្កេតបញ្ហាបំណុលរបស់អ្នកខ្ចីប្រភេទផ្សេងទៀត រួមមាន សហករណ៍កសិកម្ម គ្រូបង្រៀន មន្ត្រីនគរបាល និងអ្នកខ្ចីបំណុលក្រៅប្រព័ន្ធ ខណៈក្រសួងហិរញ្ញវត្ថុ ដែលដឹកនាំដោយលោកនាយករដ្ឋមន្ត្រីថៃ ស្រេតថា ថាវីស៊ីន (Srettha Thavisin) បញ្ជាឱ្យពន្លឿនការផ្អាកបំណុលសម្រាប់ប្រភេទដំបូង និងកាត់បន្ថយបន្ទុកបំណុលរបស់ប្រជាជនទាំងមូល។
លោក Chatchai Sirilai ប្រធានធនាគារកសិកម្ម និងសហករណ៍កសិកម្ម ដែលហៅកាត់ថា BAAC បានធានាជាថ្មីថា គម្រោងផ្អាកបំណុលកសិករ នឹងមិនប៉ះពាល់ដល់សាច់ប្រាក់ងាយស្រួលរបស់ធនាគារនោះទេ។
យោងតាមរបាយការណ៍ពីសារព័ត៌មានបាងកកប៉ុស្តិ៍ បានឱ្យដឹងថា ធនាគារ BAAC ដែលបម្រើអតិថិជនចំនួន ៤.២លាននាក់ បានស្នើសុំជម្រើសផ្សេងៗដល់រដ្ឋាភិបាលសម្រាប់ដែនកំណត់ប្រាក់កម្ចី ដែលមិនទាន់មានក្នុងកម្មវិធីនេះ។ ប្រហែល ៣០% នៃអតិថិជនរបស់ធនាគារមានបំណុលតិចជាង ១០ម៉ឺនបាត ស្មើនឹង ២,៨០០ដុល្លារ។
លោក Chatchai សង្កត់ធ្ងន់ថា វិធានការបន្ធូរបន្ថយបំណុលនេះ នឹងមិនបង្កគ្រោះថ្នាក់ខាងសីលធម៌នោះទេ ដោយសារតែគម្រោងនេះ នឹងដំណើរការក្នុងពេលដំណាលគ្នាជាមួយនឹងកម្មវិធីលើកទឹកចិត្ត ដើម្បីអប់រំកសិករ៕
ចែករំលែកព័តមាននេះ