ប៉ាក់គីអៅ ប្រកាសចង់ឡើងសង្វៀនប្រកួតតំណាងហ្វីលីពីន នៅអូឡាំពិកឆ្នាំក្រោយ
ហ្វីលីពីន ៖ លោក ម៉ានី ប៉ាក់គីអៅ (Manny Pacquiao) កំពុងរៀបចំផែនវិលត្រឡប់ឡើងសង្វៀន
ហ្វីលីពីន ៖ លោក ម៉ានី ប៉ាក់គីអៅ (Manny Pacquiao) កំពុងរៀបចំផែនវិលត្រឡប់ឡើងសង្វៀន
ហ្វីលីពីន ៖ លោក ម៉ានី ប៉ាក់គីអៅ (Manny Pacquiao) កំពុងរៀបចំផែនវិលត្រឡប់ឡើងសង្វៀនប្រកួតលក្ខណៈផ្លូវការវិញ ដោយស្តេចប្រដាល់សកលហ្វីលីពីនរូបនេះ ចង់តំណាងប្រទេសកំណើតរបស់ខ្លួន ចូលរួមការប្រកួតព្រឹត្តិការណ៍កីឡាអូឡាំពិកទីក្រុងប៉ារីសឆ្នាំ ២០២៤ បើទោះបច្ចុប្បន្នឈានដល់វ័យ៤៥ឆ្នាំយ៉ាងណាក៏ដោយ។
លោក ប៉ាក់គីអៅ កាលពីពេលថ្មីៗនេះ បានថ្លែងប្រាប់សារព័ត៌មានហ្វីលីពីន Rappler ថា តាមពិតទៅ គាត់ចង់តំណាងហ្វីលីពីនក្នុងការប្រកួតអន្តរជាតិ មុនពេលចាប់ផ្តើមអាជីពប្រដាល់សកល ប៉ុន្តែមិនត្រូវបានជ្រើសរើសនោះទេ។
កំពូលអ្នកប្រដាល់មាឌល្អិតចិត្តធំ ដែលកំពុងប្រឡូកក្នុងឆាកនយោបាយរូបនេះ បាននិយាយថា «ខ្ញុំកំពុងរង់ចាំឱកាសនោះ ហើយខ្ញុំរំភើបចិត្តចំពោះវា។ តាំងពីដើមមក ខ្ញុំបានទៅទីក្រុងម៉ានីល ដើម្បីចង់ក្លាយជាផ្នែកមួយនៃក្រុមជម្រើសជាតិហ្វីលីពីន ប៉ុន្តែខ្ញុំមិនត្រូវបានជ្រើសរើសទេ ខ្ញុំត្រូវបានគេច្រានចោល ពីព្រោះពួកគេថា ខ្ញុំមិនល្អ។ បេះដូង និងបំណងប្រាថ្នារបស់ខ្ញុំ គឺចង់បានមេដាយមាស នៅក្នុងកីឡាអូឡាំពិក»។
លោក Abraham Tolentino ប្រធានគណៈកម្មាធិការអូឡាំពិកហ្វីលីពីន បានលើកឡើងថា ការកំណត់អាយុ នៅក្នុងការប្រកួត Asian Games ដែលជាវគ្គជម្រុះ នៃព្រឹត្តិការណ៍កីឡាអូឡាំពិក គឺមានអាយុត្រឹម៤០ឆ្នាំ។ ប៉ុន្តែទោះជាយ៉ាងណាក៏ដោយ លោក ប៉ាក់គីអៅ ត្រូវបានគេរាយការណ៍ថា អាចមានលក្ខណៈគ្រប់គ្រាន់ក្នុងការប្រកួតនៅឆ្នាំក្រោយ។
សូមជម្រាបថា ម៉ានី ប៉ាក់គីអៅ ឆ្លងកាត់ការប្រកួតសរុបចំនួន ៧២ដង ឈ្នះ ៦២ដង ស្មើ ៨ដង និងចាញ់ ២ដង និងបានផ្តួលគូប្រកួតឱ្យបោះបង់ការប្រកួត ៣៩ដង ហើយក៏គឺជាកីឡាករប្រដាល់សកលដំបូងគេក្នុងប្រវត្តិសាស្ត្រ ដែលឈ្នះខ្សែក្រវាត់ពិភពលោក ១២ លើ៨ប្រភេទទម្ងន់ផ្សេងគ្នា និងជាកីឡាករតែម្នាក់គត់ កាន់កាប់ជើងឯកពិភពលោកក្នុងពេល៤ទសវត្ស (១៩៩០, ២០០០, ២០១០ និង ២០២០)។
ការប្រកួតអាជីពចុងក្រោយរបស់លោក កាលពីថ្ងៃទី២១ ខែសីហា ឆ្នាំ២០២១ ដោយចាញ់អ្នកប្រដាល់គុយបា Yordenis Ugas ។ ប៉ាក់គីអៅ បានប្រកាសចូលនិវត្តន៍ភ្លាមៗពីអាជីពរបស់ខ្លួន កាលពី២៩ ខែកញ្ញា ឆ្នាំ២០២១។
យ៉ាងណាមិញ បើទោះបីជាចូលនិវត្តន៍ក៏ពិតមែន ប៉ុន្តែអ្នកប្រដាល់រូបនេះ បានបង្ហាញវត្តមានសម្រាប់ការប្រកួតសប្បុរធម៌ ឬ ក្រៅផ្លូវការ ដោយបានយកឈ្នះលើគ្រូគុនកូរ៉េខាងត្បូង DK Yoo កាលពីខែធ្នូ ឆ្នាំមុន។ ហើយ ប៉ាក់គីអៅ ក៏នឹងត្រៀមប៉ះកំពូលអ្នកប្រដាល់មួយថៃ ប៊ូខាវ បេនឆាមេក (Buakaw Banchamek) នៅក្នុងការប្រកួតក្រៅផ្លូវការមួយទៀត នៅដើមឆ្នាំក្រោយ៕
ចែករំលែកព័តមាននេះ