ខេត្តព្រះសីហនុ ៖ កាលពីរសៀលថ្ងៃទី១១ ឧសភា ឆ្នាំ២០១១ នៅសាលប្រជុំកំពង់ផែស្វយ័តក្រុងព្រះសីហនុ មានប្រារព្ធពិធីប្រកាសតែងតាំង និងផ្ទេរភារកិច្ចមន្ត្រីសាខាគយ និងរដ្ឋាករខេត្តព្រះសីហនុ ក្រោមអធិបតីភាពលោកឡាយ ឫទ្ធី អគ្គនាយករងគយ និងរដ្ឋាករកម្ពុជា ជាតំណាងលោកបណ្ឌិត ប៉ែន ស៊ីម៉ន ទេសរដ្ឋមន្ត្រី ទីប្រឹក្សាផ្ទាល់សម្តេច
ខេត្តព្រះសីហនុ ៖ កាលពីរសៀលថ្ងៃទី១១ ឧសភា ឆ្នាំ២០១១ នៅសាលប្រជុំកំពង់ផែស្វយ័តក្រុងព្រះសីហនុ មានប្រារព្ធពិធីប្រកាសតែងតាំង និងផ្ទេរភារកិច្ចមន្ត្រីសាខាគយ និងរដ្ឋាករខេត្តព្រះសីហនុ ក្រោមអធិបតីភាពលោកឡាយ ឫទ្ធី អគ្គនាយករងគយ និងរដ្ឋាករកម្ពុជា ជាតំណាងលោកបណ្ឌិត ប៉ែន ស៊ីម៉ន ទេសរដ្ឋមន្ត្រី ទីប្រឹក្សាផ្ទាល់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងជាប្រតិភូរាជរដ្ឋាភិបាលទទួលបន្ទុកជាអគ្គនាយកគយ និងរដ្ឋាករកម្ពុជា។ ក្នុងឱកាសនោះក៏មានការអញ្ជើញជាអធិបតីរបស់លោកជំទាវ ប្រាក់ ចន្ទសុខា អភិបាលរងខេត្តព្រះសីហនុ និងលោកម៉ា ស៊ុនហួត អគ្គនាយករងកំពង់ផែស្វយ័តក្រុងព្រះសីហនុ រួមទាំងវត្តមានរបស់តំណាងអង្គភាពមន្ទីរជុំវិញខេត្ត តំណាងស្ថាប័ន ប្រដាប់អាវុធ និងមន្ត្រីមានសមត្ថកិច្ចនៅមាត់ច្រក មន្ត្រីគយ និងរដ្ឋាករខេត្តព្រះសីហនុ ចូលរួមផងដែរ ។
លោកប៉ាង វ៉ាន់ថា អនុប្រធានរដ្ឋបាល និងគ្រប់គ្រងបានអានលិខិតបង្គាប់ការលេខ៣៨២អ.គ.រ ចុះថ្ងៃទី៩ ឧសភា របស់អគ្គនាយកដ្ឋានគយ និងរដ្ឋាករកម្ពុជា ស្តីពីការតែងតាំង និងផ្ទេរភារកិច្ចរបស់មន្ត្រីសាខាគយ និងរដ្ឋាករកំពង់ផែអន្តរជាតិក្រុងព្រះសីហនុ ។ បន្ទាប់ពីលោកឡាយ ឫទ្ធី ប្រគល់ត្រា និងលិខិតបង្គាប់ការជួនមកលោកគិន លី ប្រធានសាខាគយ និងរដ្ឋាករកំពង់ផែអន្តរជាតិក្រុងព្រះសីហនុ ដែលទើបទទួលតំណែងបានឡើងធ្វើចំណាប់អារម្មណ៍ និងធ្វើការប្តេជ្ញាចិត្តរួមមាន ៖
-ការខិតខំជំរុញការប្រមូលពន្ធអាករគយឱ្យបានគ្រប់ផែនការ
-ការជំរុញកិច្ចការសហការជាមួយកម្លាំងសមត្ថកិច្ចពាក់ព័ន្ធ ដើម្បីធានាការងារបង្ការបង្ក្រាបអំពើល្មើសច្បាប់គយ
-ការកាត់បន្ថយភាពអសកម្មនានាដើម្បីធានាឱ្យការសម្រួលពាណិជ្ជកម្មជាតិ អន្តរជាតិដំណើរការបានល្អប្រសើរ ។
លោកជំទាវអភិបាលរងខេត្តព្រះសីហនុ បានមានមតិសំណេះសំណាលជូនអង្គពិធី ដោយបានសម្តែងនូវការស្វាគមន៍ដល់មន្ត្រីគយទទួលតំណែងថ្មី និងបញ្ជាក់អំពីកិច្ចសហការល្អរវាងមន្ត្រីសាខាគយ និងរដ្ឋាករកំពង់ផែអន្តរជាតិក្រុងព្រះសីហនុ ជាមួយអាជ្ញាធរខេត្តព្រះសីហនុ ដោយសង្ឃឹមថា លោកប្រធានសាខាគយកំពង់ផែអន្តរជាតិ និងបន្តប្រពៃណីនេះ ដើម្បីសម្រេចភារកិច្ចតទៅអនាគតប្រកបដោយជោគជ័យ ។
ជាទីបញ្ចប់លោកឡាយ ឫទ្ធី អគ្គនាយករងតំណាងលោកបណ្ឌិត ប៉ែន ស៊ីម៉ន ប្រតិភូរាជរដ្ឋាភិបាលទទួលបន្ទុកអគ្គនាយកគយ និងរដ្ឋាករកម្ពុជាអញ្ជើញមានមតិសំណេះសំណាលក្នុងអង្គពិធីដោយលោកបានឯកភាពរាល់ចំណុចដែលលើកឡើងដោយលោកជំទាវអភិបាលរងខេត្តព្រះសីហនុ បានបញ្ជាក់បន្ថែមអំពីគោលការណ៍ថ្មីៗរបស់រដ្ឋដែលមន្ត្រីគយទាំងអស់ត្រូវប្រកាន់យក ដើម្បីសម្រេចភារកិច្ចរបស់ខ្លួនឱ្យទទួលបានជោគជ័យ៕
ចែករំលែកព័តមាននេះ