ADផ្ទាំងផ្សព្វផ្សាយពាណិជ្ជកម្ម

មេដឹកនាំរុស្សី និងកូរ៉េខាងជើងជូនកាំ.ភ្លើ.ងវែងឱ្យគ្នាទៅវិញទៅមកដើម្បីទុកជាកាដូនៃមិត្តភាព

1 ឆ្នាំ មុន

១៥ ខែ កញ្ញា ឆ្នាំ ២០២៣ ម៉ោង ១៦:៤០

មេដឹកនាំរុស្ស៊ី និងកូរ៉េខាងជើងបានធ្វើរឿងដ៏គួរឱ្យភ្ញាក់ផ្អើល១ដោយជូនកាដូកាំភ្លើងវែងឱ្យគ្នាទៅវិញទៅមកមុនពេលពួកគេបែកគ្នា។ កាំភ្លើងទាំងនេះជាស្នាដៃដែលផលិតយ៉ាងសម្រិតសម្រាំងដោយប្រទេសទាំង២។ លោកពូទីនថែមទាំងប្រគល់ស្រោមដៃរបស់អ្នកអវកាសរុស្ស៊ីដែលធ្លាប់ធ្វើដំណើរនៅក្នុងយានអវកាសជាច្រើនដងកាលពីអតីតកាល។ នេះគ្រាន់តែជាឧទាហរណ៍១នៅក្នុងចំណោមកាដូជាច្រើនទៀតដែលលោកទាំង២បានជូនគ្នាដើម្បីបញ្ជាក់ពីចំណងមិត្តភាព និងសាមគ្គីភាពយូរអង្វែង។ ខាងលើនេះជាការលើកឡើងរបស់អ្នកនាំពាក្យវិមានក្រឹមឡាំង លោកឌីមីទ្រី ប៉េស្កោហ្វ (Dmitri Peskov)។

បន្ទាប់ពីលោកពូទីនទទួលយកការអញ្ជើញរបស់លោកគីមជុងអ៊ុនដើម្បីបំពេញទស្សនកិច្ចនៅប្រទេសកូរ៉េខាងជើងនៅពេលសមគួរណា១, លោកថ្លែងថាជាដំបូងលោកនឹងបញ្ជូនរដ្ឋមន្ត្រីការបរទេសទៅទីក្រុងព្យុងយ៉ាងដើម្បីស្ទាបស្ទង់មើលសភាពការណ៍ជាមុនសិននាខែកញ្ញាខាងមុខនេះ។ នៅថ្ងៃនេះ លោកពូទីនត្រូវវិលត្រឡប់ទៅទីក្រុងម៉ូស្គូវិញហើយ ហើយទុកឱ្យរដ្ឋមន្ត្រីការពារជាតិនៅកំដរលោកគីមជុងអ៊ុនដើម្បីដើរទស្សនាតំបន់រោងចក្រផលិតអាវុធរបស់រុស្ស៊ីជាបន្តទៀត។

គណៈប្រតិភូរុស្ស៊ី និងកូរ៉េខាងជើងដែលហែហមដំណើររបស់លោកគីមជុងអ៊ុនបានទៅដល់តំបន់រោងចក្រផលិតយន្តហោះចម្បាំងរុស្ស៊ី។ លោកគីមត្រូវបានទទួលស្វាគមន៍ពីសំណាក់មន្ត្រីមូលដ្ឋាន និងមន្ត្រីរដ្ឋាភិបាលជាច្រើននាក់។ ទីនេះជាកន្លែងផលិតយន្តហោះចម្បាំងដ៏ទំនើបរបស់រុស្ស៊ីម៉ាក Su-35 និង Su-37។ លោកពូទីនថ្លែងប្រាប់ទីភ្នាក់ងារព័ត៌មានរុស្ស៊ីថាលោកគីមជុងអ៊ុននឹងបន្តដំណើរទៅទស្សនាកងនាវាចរណ៍រុស្ស៊ីនៅទីក្រុងវ៉្លាឌីវ៉ូស្តុក និងធ្វើបទបាឋកថានៅសាកលវិទ្យាល័យ។

គួរកត់សម្គាល់ថាដំណើរទស្សនកិច្ចលើកនេះត្រូវក្រុមបស្ចិមប្រទេសតាមដានដោយយកចិត្តទុកដាក់។ ជាពិសេស អាមេរិក និងកូរ៉េខាងត្បូងតាមដានខ្លាំងជាងគេ។ ពួកគេចង់ដឹងអំពីកិច្ចសហការរវាងប្រទេសទាំង២ពាក់ព័ន្ធនឹងការទិញ-លក់អាវុធ, ការចែករំលែកបច្ចេកវិទ្យាយោធា និងគម្រោងដទៃទៀតដែលប្រទេសទាំង២អាចនឹងធ្វើ។ គេចង់ដឹងថាតើប្រទេសទាំង២អាចប្រកាសពីការធ្វើសមយុទ្ធយោធារួមគ្នាដែរឬទេ។ អ្នកនាំពាក្យក្រសួងការពារជាតិកូរ៉េខាងត្បូងថ្លែងថាគម្រោងធ្វើសមយុទ្ធយោធារួមគ្នាអាចនឹងមាន ព្រោះប្រទេសទាំង២បានពង្រឹងកិច្ចសហប្រតិបត្តិការផ្នែកយោធាកាន់តែខ្លាំងក្លាបន្ថែមទៀត៕

ប្រភព៖ Al Jazeera
https://www.aljazeera.com/news/2023/9/15/putin-kim-gift-each-other-rifles-at-meeting-and-a-russian-space-glove