ភ្នំពេញ៖ ក្នុងរយៈពេល ៨ខែ ក្នុងឆ្នាំ២០២៣ នេះ អគ្គនាយកដ្ឋាន​អន្តោប្រវេសន៍ បានអនុវត្តច្បាប់​ ស្តីពី អន្តោប្រវេសន៍ ដោយធ្វើការបណ្តេញជនបរទេស​ល្មើសច្បាប់ ចំនួន ១៣៦៦នាក់ មាន ៣២សញ្ជាតិ ចេញពីកម្ពុជា ត្រឡប់​ទៅប្រទេសដើមវិញ​។ នេះបើតាមសេចក្តីប្រកាស​។

សេចក្តីប្រកាស ក៏បានបន្តថា ក្នុងរយៈពេល ៥ឆ្នាំ ចាប់ពីឆ្នាំ២០១៨ ដល់ឆ្នាំ២០២២ អគ្គនាយកដ្ឋានអន្តោប្រវេសន៍ បានរកឃើញអ្នកកាន់ឯកសារ​ធ្វើដំណើរ មិនប្រក្រតី អ្នកដំណើរពាក់ព័ន្ធក្នុងបញ្ជីមុខសញ្ញា និងអ្នកដំណើរ​ ដែលមិនមានលក្ខណៈសម្បត្តិ​គ្រប់គ្រាន់តាមលក្ខខណ្ឌកំនត់ ចំនួន ២៩៧៣នាក់ ដោយបានធ្វើការបដិសេធមិនអនុញ្ញាតឱ្យចូល​កម្ពុជាឡើយ។ ជាមួយគ្នានេះ ក៏បានឃាត់ខ្លួនមុខសញ្ញា ចំនួន ២៥៣នាក់ ដើម្បីអនុវត្តតាមច្បាប់ស្តីពិអន្តោប្រវេសន៍ផងដែរ។

សេចក្តីប្រកាសខាងលើនេះ ត្រូវបានអ្នកនាំពាក្យ​អគ្គនាយកដ្ឋានអន្តោប្រវេសន៍ ឆ្លើយតបនឹងការផ្សាយព័ត៌មាន ដែលមានខ្លឹមសារ​ចោទប្រកាន់លើការគ្រប់គ្រង​ច្រកទ្វារព្រំដែនអន្តរជាតិ និងការ​អនុវត្តច្បាប់អន្តោប្រវេសន៍ មានភាពធូររលុង បង្កលក្ខណៈដល់ជនល្មើស ធ្វើសកម្មភាពជួញដូរមនុស្ស​ និងចាប់ជំរិត នៅប្រទេសកម្ពុជា៕