រាជធានីភ្នំពេញ ៖ មហាជន ជាពិសេសបណ្តាអ្នកសិល្បៈបានសម្តែងនូវការភ្ញាក់ផ្អើល និងសោកស្តាយចំពោះទង្វើមិនល្អរបស់ ប៊ុត សីហា ក្រោយពីសមត្ថកិច្ចបានឃាត់ខ្លួនតារាចម្រៀងរូបនេះជាថ្មីម្តងទៀត ពាក់ព័ន្ធទៅនឹងបញ្ហាគ្រឿងញៀនដែលបានប្រព្រឹត្ត កាលពីរសៀលថ្ងៃទី១២…
រាជធានីភ្នំពេញ ៖ មហាជន ជាពិសេសបណ្តាអ្នកសិល្បៈបានសម្តែងនូវការភ្ញាក់ផ្អើល និងសោកស្តាយចំពោះទង្វើមិនល្អរបស់ ប៊ុត សីហា ក្រោយពីសមត្ថកិច្ចបានឃាត់ខ្លួនតារាចម្រៀងរូបនេះជាថ្មីម្តងទៀត ពាក់ព័ន្ធទៅនឹងបញ្ហាគ្រឿងញៀនដែលបានប្រព្រឹត្ត កាលពីរសៀលថ្ងៃទី១២ ខែកញ្ញា ឆ្នាំ២០២៣ នៅខេត្តកំពង់ស្ពឺ ។
ក្រោយហេតុការណ៍នេះ បានកើតឡើងអ្នកសិល្បៈមួយចំនួនបានសម្តែងនូវការហួសចិត្ត និងសោកស្តាយនូវទង្វើខាងលើពីម្ចាស់ជ័យលាភី The voice Cambodia រដូវកាលទី១ លោក ប៊ុត សីហា ដែលមានសមត្ថភាពច្រៀង តែបែរជាដើរផ្លូវខុសបែបនេះទៅវិញ ។ តារាចម្រៀង និងសម្តែងលោក យ៉ែម សំអូន ចែកចាយនូវព័ត៌មានពីការឃាត់ខ្លួនលោក ប៊ុត សីហា ដោយបានភ្ជាប់ជាមួយសារបង្ហោះនៅលើបណ្តាញសង្គមថា ពិតជាសន្តានមែនពាលទំនើងមិនកែមែន ។
លោកបញ្ជាក់ថា មានឱកាសហើយ គេប្រឹងជួយហើយ ហេតុអ្វីប្អូនមិនចេះកែប្រែខ្លួនឯងសារជាថ្មី ដើរទៅរកផ្លូវនរកវិញទាល់តែបាន បងស្ដាយសមត្ថភាពប្អូន និងអាណិតម្ដាយឪពុកប្អូនណាស់ ។
លោកបន្ថែមថា ញុមស៊ែរនេះ គ្រាន់តែមានអារម្មណ៍ថា ស្ដាយសមត្ថភាពគាត់និងអាណិតដល់ម្ដាយឪពុកក្រុមគ្រួសាររបស់គាត់មិនដឹងជាយកមុខទៅទុកនៅឯណាទេ វាជាការងប់ងល់និងការជ្រើសរើសផ្លូវដើរដែលខុស គឺវាជាការបំផ្លាញអូនឯងហ្នឹងសព្វបែបយ៉ាងទាំងអស់ ។
ចំណែកពិធីករប្រចាំស្ថានីយទូរទស្សន៍ហង្សមាស លោក សុខ សារ៉ា ក៏បានបង្ហោះសារស្រដៀងគ្នានេះដែរថា ហេតុអី អូន មិនព្រមកែខ្លួន? បានត្រឹមអាណិត ព្រោះរាល់ថ្ងៃ អ្នកមានសមត្ថភាពច្រើន កំពុងខិតខំទាំងយប់ទាំងថ្ងៃ ក្រែងមានវាសនា និងសំណាងក្លាយជាម្ចាស់ពានដូចអូន🥲 គ្រឿងញៀនបំផ្លាញអនាគត ។
ដោយឡែក តារាចម្រៀងដែលប្រឡងចម្រៀងរួមជំនាន់លោក ឃុន វុត្ថា ក៏បានបញ្ចេញសារបង្ហោះលើបណ្តាញសង្គមក្រោយដឹងដំណឹងរបស់លោក ប៊ុត សីហា ថា សោកស្ដាយពេលដែលបានដឹងដំណឹងមិនល្អអំពីអ្នកសង្ឃឹមថា ពេលចេញមកវិញនឹងកែប្រែខ្លួនឯងឡើងវិញមិត្តរួមជំនាន់.ប៊ុត សីហា ។
យ៉ាងណាក៏ដោយ ជុំវិញការឃាត់ខ្លួនតារាចម្រៀងលោក ប៊ុត សីហា នាពេលនេះ មានមហាជនមួយចំនួនកំពុងដាក់ការសង្ស័យថា ព័ត៌មាននេះអាចមិនមែនជារឿងពិតឡើយ ពោលរូបភាពដែលត្រូវបានគេផ្សព្វផ្សាយតាមបណ្តាញសង្គមនោះ គឺជារូបភាពចាស់ប៉ុណ្ណោះ ខណៈពេលដែលតារារូបនេះ ក៏ធ្លាប់ត្រូវបានសមត្ថកិច្ចចាប់ឃាត់ខ្លួនម្តងហើយពាក់ព័ន្ធទៅនឹងបញ្ហាគ្រឿងញៀននេះដូចគ្នា។
គួរបញ្ជាក់ថា ម្ចាស់ជ័យលាភីលេខ១ របស់កម្មវិធីប្រឡងចម្រៀង «The Voice Cambodia» រដូវកាលទី១ លោក ប៊ុត សីហា រួមជាមួយបក្សពួកម្នាក់ទៀត ត្រូវបានកម្លាំងនគរបាលស្រុកគងពិសីឃាត់ខ្លួនជាមួយនឹងគ្រឿងញៀនមួយចំនួន ។ ការឃាត់ខ្លួនតារាចម្រៀងលោក ប៊ុត សីហា និងបក្សពួកនេះ ធ្វើឡើងកាលពីវេលាម៉ោង០៤និង១០នាទីរសៀលថ្ងៃទី១២ ខែកញ្ញា ឆ្នាំ២០២៣ នៅចំណុចភូមិត្រាំខ្នា ឃុំស្នំក្រពើ ស្រុកគងពិសី ខេត្តកំពង់ស្ពឺ ។
មន្ត្រីនគរបាលស្រុកគងពិសីបានប្រាប់កោះសន្តិភាពឲ្យដឹងថា កម្លាំងនគរបាលស្រុកគងពិសីបានធ្វើការបង្ក្រាបមុខសញ្ញាសង្ស័យពាក់ព័ន្ធនឹងគ្រឿងញៀន ដោយឃាត់ខ្លួនជនសង្ស័យចំនួន០២នាក់ រួមមាន ៖ ទី០១- ឈ្មោះ ឆន វល្លិន ភេទប្រុស អាយុ៣៨ឆ្នាំ មុខរបរមិនពិតប្រាកដ រស់នៅភូមិត្រាំខ្នា ឃុំស្នំក្រពើ ស្រុកគងពិសី ។ និងទី០២-ឈ្មោះ ប៊ុត សីហា ភេទ ប្រុស អាយុ២៩ឆ្នាំ (ដែលគេស្គាល់ច្បាស់ថា ជាតារាចម្រៀងប្រឡងជាប់លេខ១ ក្នុងកម្មវិធីទូរទស្សន៍ល្បីមួយ) រស់នៅភូមិព្រះម្លប់ ឃុំភារីមានជ័យ ស្រុកបសេដ្ឋ ខេត្តកំពង់ស្ពឺ ។
មន្ត្រីនគរបាលស្រុកគងពិសីបាននិយាយបន្តទៀតថា នៅមុនពេលឃាត់ខ្លួន ក្រុមជនសង្ស័យ គឺកម្លាំងនគរបាលបានធ្វើការល្បាតតាមមូលដ្ឋាន ក៏ប្រទះឃើញក្រុមជនសង្ស័យទាំងពីរនាក់ ដោយមានការសង្ស័យឃាត់សួរនាំ និងឆែកឆេរ ទើបរកឃើញនិងដកហូតបានម្សៅក្រាមពណ៌.សថ្លា សង្ស័យជាគ្រឿងញៀន ចំនួន០៥កញ្ចប់ ក្នុងនោះ (០៣តូច និង០២មធ្យម), ទូរសព្ទ០៣គ្រឿង និងឧបករណ៍ប្រើប្រាស់គ្រឿងញៀនមួយចំនួនទៀត ។
មន្ត្រីនគរបាលស្រុកគងពិសីបញ្ជាក់ថា បច្ចុប្បន្ននេះ ក្រុមជនសង្ស័យ រួមជាមួយវត្ថុតាងត្រូវបានការិយាល័យជំនាញកំពុងកសាងសំណុំរឿងចាត់ការបន្តតាមផ្លូវច្បាប់ ។ ជាការកត់សម្គាល់តារាចម្រៀងលោក ប៊ុត សីហា ធ្លាប់ត្រូវបានសមត្ថកិច្ចឃាត់ចាប់ខ្លួនពាក់ព័ន្ធនឹងករណីប្រើប្រាស់គ្រឿងញៀន ស្ថិតនៅមុខសាលាបឋមសិក្សាពងទឹក សង្កាត់ពងទឹក ខណ្ឌដង្កោ រាជធានីភ្នំពេញកាលពីអំឡុងឆ្នាំ២០១៨ ខណៈរូបលោកទៅទិញគ្រៀងញៀនដើម្បីជក់ ប៉ុន្តែត្រូវបានអាណាព្យាបាល និងក្រុមគ្រួសារ មកធានាយកទៅធ្វើការអប់រំ និងដាក់នៅកន្លែងបន្សាបគ្រឿងញៀន ៕
ចែករំលែកព័តមាននេះ