ក្រុមក្មេងៗចំនួន៣នាក់ បាននាំគ្នាបង្ហោះម៉ូតូលើផ្លូវសាធារណៈ ព្រមទាំងរាំអត់ភ្លេង ដោយធ្វើដៃច្រងេងច្រងាងនៅលើផ្លូវសាធារណៈ ហើយថែមទាំង
ខេត្តកំពត ៖ បើតាមសេចក្តីរាយការណ៍បានឱ្យដឹងថា ក្រុមក្មេងៗចំនួន៣នាក់ បាននាំគ្នាបង្ហោះម៉ូតូលើផ្លូវសាធារណៈ ព្រមទាំងរាំអត់ភ្លេង ដោយធ្វើដៃច្រងេងច្រងាងនៅលើផ្លូវសាធារណៈ ហើយថែមទាំងថតជាវីដេអូបង្ហោះ ដើម្បីបង្អួតមហាជនទៀតផង នៅចំណុចផ្លូវទៅកោះស្មៅ ស្ថិតក្នុងភូមិកំពង់កណ្ដាល ឃុំជុំគ្រៀល ស្រុកទឹកឈូ កាលពីវេលាម៉ោង៩យប់ ថ្ងៃទី០៥ ខែកញ្ញា ឆ្នាំ២០២៣កន្លងទៅ។
ក្រោយមក កម្លាំងសមត្ថកិច្ចអធិការដ្ឋាននគរបាលស្រុកទឹកឈូ បានទទួលបញ្ជាពីលោកឧត្តមសេនីយ៍ទោ ម៉ៅ ច័ន្ទមធុរិទ្ធ ស្នងការខេត្ត នៅថ្ងៃទី៩ ខែកញ្ញា ឆ្នាំ២០២៣ ចុះស្រាវជ្រាវជាមួយប៉ុស្តិ៍រដ្ឋបាលឃុំព្រៃថ្នង និងប៉ុស្តិ៍រដ្ឋបាលឃុំថ្មី ហើយក៏ឈានទៅឃាត់ខ្លួនបានក្រុមក្មេងៗចំនួន៣នាក់ ព្រមទាំងវត្ថុតាងម៉ូតូ ដែលធ្វើសកម្មភាពបង្ហោះបានមួយគ្រឿង រួចនាំមកកាន់ស្នងការខេត្ត ដើម្បីធ្វើការសាកសួរ។
បើតាមសមត្ថកិច្ចជំនាញការិយាល័យព្រហ្មទណ្ឌកំរិតស្រាល នៃស្នងការដ្ឋាននគរបាលខេត្ត បានប្រាប់ឲ្យដឹងថា ក្រុមក្មេងទាំង៣នាក់ ដែលសមត្ថកិច្ចឃាត់ខ្លួននាំយកមកអប់រំនេះ រួមមាន៖ ១-ឈ្មោះ ទូច រក្សា ហៅអាទ្រី ភេទប្រុស អាយុ១៥ឆ្នាំ មានទីលំនៅភូមិច្បារអំពៅ ឃុំព្រៃថ្នង ស្រុកទឹកឈូ ខេត្តកំពត។ ២- ឈ្មោះ ធី លីហ៊ួត ភេទប្រុស អាយុ១៥ឆ្នាំ រស់នៅភូមិទ្វាថ្មី ឃុំព្រៃថ្នង ស្រុកទឹកឈូ ខេត្តកំពត។ និង៣- ឈ្មោះ សូ ដេវីត ភេទប្រុស អាយុ១៨ឆ្នាំ រស់នៅភូមិថ្មី ឃុំថ្មី ស្រុកទឹកឈូ ខេត្តកំពត។
សមត្ថកិច្ចបានបន្តទៀតថា ក្រុមក្មេងទាំង៣នាក់នេះ ក្រោយពីទទួលបញ្ជាពីលោកឧត្តមសេនីយ៍ទោ ស្នងការខេត្ត កម្លាំងសមត្ថកិច្ចចុះធ្វើការស្រាវជ្រាវ រហូតឃាត់ខ្លួនបានទាំង៣នាក់ ព្រមទាំងវត្ថុតាងម៉ូតូដែលពួកគេធ្វើសកម្មភាពបង្ហោះលើផ្លូវសាធារណៈនោះមួយគ្រឿងទៀត កាលពីនៅថ្ងៃទី១១ ខែកញ្ញា ឆ្នាំ២០២៣ ហើយក៏នាំខ្លួនមកកាន់ស្នងការខេត្ត ដើម្បីធ្វើការសាកសួរភ្លាមៗផងដែរ។
សមត្ថកិច្ចបន្តទៀតថា បន្ទាប់ពីសមត្ថកិច្ចធ្វើការសាកសួរ ក្រុមក្មេងៗទាំង៣នាក់ បានសារភាពប្រាប់ថា «ពួកខ្លួនទាំង៣នាក់ពិតជាបានធ្វើសកម្មភាពបង្ហោះម៉ូតូ ព្រមទាំងរាំអត់ភ្លេងច្រងេងច្រងាងនៅលើផ្លូវសាធារណៈ ចំណុចខាងលើពិតប្រាកដមែន»។
ដោយឡែកក្មេងប្រុសម្នាក់មានឈ្មោះ ទូច រក្សា ហៅអាទ្រី អាយុ១៥ឆ្នាំ ដែលមានទីលំនៅភូមិច្បារអំពៅ ឃុំព្រៃថ្នង ស្រុកទឹកឈូ ក៏បានសារភាពប្រាប់សមត្ថកិច្ចដែរថា «ខ្លួនពិតជាបានបង្ហោះម៉ូតូនៅលើផ្លូវសាធារណៈទៅកោះស្មៅ ស្ថិតក្នុងចំណុចភូមិ-ឃុំខាងលើ ពិតប្រាកដមែន ដោយសារខ្លួនធ្លាប់ប្រើប្រាស់នូវសារធាតុញៀ.នកន្លងមកផងដែរ»។
ក្មេងប្រុសខាងលើ បានសារភាពប្រាប់បន្តទៀតថា «ខ្លួនបានដឹងកំហុសដែលខ្លួនប្រព្រឹត្តនាពេលកន្លងមកនេះ ធ្ងន់ណាស់ ដោយសារខ្លួនមិនបានគិតពីការលំបាករបស់ឪពុកម្តាយនោះឡើយ តែពេលនេះ បានដឹងកំហុសរបស់ខ្លួនច្បាស់ហើយ»។
មិនត្រឹមតែប៉ុណ្ណោះ ពួកគេទាំង៣នាក់ក៏បានសំណូមពរដល់មិត្តភក្តិយុវវ័យដូចគ្នាតាមរយៈសារព័ត៌មាន សូមកុំប្រព្រឹត្តនូវសកម្មភាពដែលធ្វើឲ្យប៉ះពាល់ដល់សណ្តាប់ធ្នាប់សាធារណៈ ដូចជាបង្ហោះម៉ូតូ និងប្រើប្រាស់នូវសារធាតុញៀ.នជាដើម ដែលសង្គមស្អ.ប់ខ្ពើមផងដែរ។
ក្រោយពេលចាប់ខ្លួនក្រុមក្មេងៗទាំង៣នាក់ រួមទាំងវត្ថុតាង នឹងស្ដាប់ចម្លើយសារភាពផងនោះ សមត្ថកិច្ចក៏បានកសាងសំណុំរឿងក្មេងទាំង៣នាក់ខាងលើ ដើម្បីអនុវត្តតាមនីតិវិធីនៃច្បាប់៕
ចែករំលែកព័តមាននេះ