ខេត្តកណ្តាល ៖ ជនទំនើងម្នាក់ផឹកស្រាស្រវឹងជិះម៉ូតូឆាប និងបុកម៉ូតូមន្ត្រីប៉ូលិសប៉ុស្តិ៍កំពុងដើរល្បាតពេលយប់ បណ្តាលឱ្យបែកស្តុប លុះពេលសួរនាំឱ្យទទួលខុសត្រូវចំពោះការខូចខាតបែរជារករឿងចង់វាយទៀត ទើបត្រូវប៉ូលិសចាប់ខ្លួនតែម្តង ។ ហេតុការណ៍នោះកើតឡើងកាលពីវេលាម៉ោង៧និង១០នាទីយប់ថ្ងៃទី១៤ ឧសភា ឆ្នាំ២០១១
ខេត្តកណ្តាល ៖ ជនទំនើងម្នាក់ផឹកស្រាស្រវឹងជិះម៉ូតូឆាប និងបុកម៉ូតូមន្ត្រីប៉ូលិសប៉ុស្តិ៍កំពុងដើរល្បាតពេលយប់ បណ្តាលឱ្យបែកស្តុប លុះពេលសួរនាំឱ្យទទួលខុសត្រូវចំពោះការខូចខាតបែរជារករឿងចង់វាយទៀត ទើបត្រូវប៉ូលិសចាប់ខ្លួនតែម្តង ។ ហេតុការណ៍នោះកើតឡើងកាលពីវេលាម៉ោង៧និង១០នាទីយប់ថ្ងៃទី១៤ ឧសភា ឆ្នាំ២០១១ នៅក្នុងភូមិព្រែកមៀន ឃុំព្រៃពួច ស្រុកអង្គស្នួល ។
ជនទំនើងនោះឈ្មោះគឹម សុខ នីម អាយុ២៤ឆ្នាំ រស់នៅភូមិកើតហេតុ ហើយក្រោយពេលចាប់ខ្លួនប៉ូលិសបាននាំទៅកាន់អធិការដ្ឋានស្រុកអង្គស្នួល ដើម្បីកសាងសំណុំរឿង ។ តាមប្រភពព័ត៌មានបានឱ្យដឹងថា នៅមុនពេលកើតហេតុ ជនទំនើងរូបនោះ បានផឹកស្រានៅផ្ទះមិត្តភក្តិឈ្មោះធឿន អស់ចំនួន២លីត្រ បន្ទាប់មកក៏បានបន្តដំណើរទៅផឹកស្រាបៀរនៅផ្ទះមិត្តភក្តិម្នាក់ទៀតឈ្មោះណុប លុះពេលផឹកបានបន្តិចជននោះបានខ្ចីម៉ូតូឈ្មោះណុប ជិះទៅឌុបឈ្មោះធឿន ឱ្យមកផឹកជាមួយគ្នា។ ពេលទៅដល់ឈ្មោះធឿន មិនព្រមទៅជាមួយ ជននេះក៏បានជិះម៉ូតូត្រឡប់ទៅកាន់ផ្ទះឈ្មោះណុប វិញតែម្នាក់ឯង ។ ពេលទៅដល់ចំណុចកើតហេតុបានឆាប និងកៀរម៉ូតូម៉ាកស៊ុយហ្ស៊ុយគីស្មាស់ ដែលក្រសួងមហាផ្ទៃចែកឱ្យប៉ូលិសប៉ុស្តិ៍ជិះល្បាត បណ្តាលឱ្យបែកស្តុប ហើយត្រូវមន្ត្រីប៉ូលិសប៉ុស្តិ៍ឱ្យជននោះទទួលខុសត្រូវជួសជុលឡើងវិញ ព្រោះប៉ូលិសបានចាត់ទុករឿងនោះជាគ្រោះថ្នាក់ចរាចរណ៍ប៉ុណ្ណោះ ។ ផ្ទុយទៅវិញ ជនទំនើងបញ្ចេញឫកពាកាចសាហាវដូចខ្លា មិនត្រឹមតែមិនទទួលខុសត្រូវប៉ុណ្ណោះទេ ថែមទាំងរករឿងប្រុងវាយប៉ូលិសទៀតផង ទើបចាប់ខ្លួនតែម្តង។
ប្រភពដដែលបន្តថា ក្រោយពេលចាប់ខ្លួន ជននោះក្លាហានខ្លាំងណាស់ ស្រែកឡូឡាដាក់ប៉ូលិសយ៉ាងខ្លាំង ហើយប៉ូលិសក៏បានដឹកជននោះតាមរថយន្តនាំទៅកាន់ផ្នែកព្រហ្មទណ្ឌស្រុកអង្គស្នួលទាំងយប់ ដើម្បីសាកសួរ និងកសាងសំណុំរឿងចាត់ការតាមនីតិវិធី៕
ចែករំលែកព័តមាននេះ