ខេត្តពោធិ៍សាត់ ៖ រន្ទះកំណាចបានឆក់យកជីវិតឪពុកនិងកូនស្រី បន្សល់ទុកម្តាយ និងកូនប្រុសតូចម្នាក់ទៀតឱ្យនៅកំព្រាក្រោមសម្រែកទ្រហោយំយ៉ាងអាណោចអាធ័មគួរឱ្យសង្វេគ និងអាណិតអាសូរជាទីបំផុត ។ បាតុភូតធម្មជាតិគ្មានក្តីករុណានេះ បានកើតឡើងកាលពីល្ងាចថ្ងៃទី១៣ ឧសភា នៅភូមិបាក់មែក ឃុំខ្នារទទឹង ស្រុកបាកាន ខេត្តពោធិ៍សាត់
ខេត្តពោធិ៍សាត់ ៖ រន្ទះកំណាចបានឆក់យកជីវិតឪពុកនិងកូនស្រី បន្សល់ទុកម្តាយ និងកូនប្រុសតូចម្នាក់ទៀតឱ្យនៅកំព្រាក្រោមសម្រែកទ្រហោយំយ៉ាងអាណោចអាធ័មគួរឱ្យសង្វេគ និងអាណិតអាសូរជាទីបំផុត ។ បាតុភូតធម្មជាតិគ្មានក្តីករុណានេះ បានកើតឡើងកាលពីល្ងាចថ្ងៃទី១៣ ឧសភា នៅភូមិបាក់មែក ឃុំខ្នារទទឹង ស្រុកបាកាន ខេត្តពោធិ៍សាត់ ខណៈពេលកំពុងជ្រកភ្លៀងនៅឯវាលស្រែ ។
លោកព្រំ មឿន មេឃុំខ្នារទទឹង បានប្រាប់កោះសន្តិភាពថា ជនរងគ្រោះជាឪពុកឈ្មោះម៉ី គឿន អាយុ២៩ឆ្នាំ និងកូនស្រីឈ្មោះគឿន សុខគៀន អាយុ៧ឆ្នាំ រស់នៅភូមិ-ឃុំកើតហេតុខាងលើ ។ នៅរសៀលថ្ងៃទី១៣ ឧសភា នោះ ម្តាយបានប្រើកូនស្រីយកពោតស្ងោរទៅឱ្យឪពុកដែលកំពុងភ្ជួរស្រែហូបចម្ងាយពីផ្ទះប្រមាណ១.០០០ម៉ែត្រ ។ ពេលយកទៅដល់បានមួយសន្ទុះធំដោយសារមានភ្លៀងរលឹមផ្ទេកបន្ទោរ និងខ្យល់ខ្លាំងផងនោះ ឪពុកក៏សម្រាកពីភ្ជួរមកជ្រកភ្លៀងក្រោមដើមស្តៅក្បែរស្រែរបស់ខ្លួន។ លោកមេឃុំបន្តទៀតថា ខណៈពេលកំពុងហូបពោតស្ងោរជាមួយកូនស្រីក្រោមដើមស្តៅនោះ ស្រាប់តែរន្ទះបាញ់ស្លាប់ទាំងពីរនាក់ឪពុកនិងកូនតែម្តង ។ ជនរងគ្រោះទាំងពីរនាក់មានស្នាមរោលខ្មៅជាំពេញខ្លួនស្លាប់នៅនឹងកន្លែងកើតហេតុពុំបានយកទៅមន្ទីរពេទ្យទេ បន្សល់ទុកប្រពន្ធ និងកូនប្រុសតូចម្នាក់ឱ្យនៅកំព្រាយំសោកបោកខ្លួនគួរឱ្យអាសូរ ។
ឈ្មោះខន សុខា ជាកសិករនៅភូមិជាមួយគ្នានិយាយថា នៅថ្ងៃនោះខ្លួនក៏កំពុងភ្ជួរស្រែជិតជនរងគ្រោះដែរ ។ ពេលមេឃកំពុងភ្លៀងគាត់ឃើញជនរងគ្រោះឈប់ភ្ជួរស្រែដើរទៅជ្រកភ្លៀងក្រោមដើមស្តៅជាមួយកូនស្រី ។ មួយសន្ទុះក្រោយមកមានខ្សែផ្លេកបន្ទោរភ្លឺមួយចំហៀងមេឃស្រាប់តែឮស្នូរឆាំង ពេលគាត់ក្រឡេកទៅឃើញឪពុក និងកូនដួលដេកនឹងដី។ ភ្លាមនោះគាត់ស្មានថា ឪពុកនិងកូនក្រាប ប៉ុន្តែដោយសារមិនឃើញងើបឡើងវិញសោះនោះ គាត់ក៏បញ្ឈប់គោយន្តដើរទៅមើលស្រាប់តែឃើញស្លាប់ទាំងពីរនាក់បាត់ទៅហើយ ទើបដឹងថារន្ទះបាញ់ក៏បានទៅប្រាប់ប្រពន្ធនៅឯផ្ទះតែម្តង ។ បន្ទាប់ពីបានដឹងថា ប្តី និងកូនស្រីត្រូវរន្ទះកំណាចបាញ់ស្លាប់នៅឯស្រែភ្លាមស្ត្រីជាប្រពន្ធ ស្ទើរសន្លប់បាត់ស្មារតី និងបានដឹកសពមកធ្វើបុណ្យក្រោមសម្រែកទ្រហោយំគួរឱ្យអាសូរ ដោយមានអ្នកស្រុកអ្នកភូមិចូលរួមរំលែកទុក្ខយ៉ាងកុះករផងដែរ៕
ចែករំលែកព័តមាននេះ