ប្រទេសរុស្ស៊ី និងកូរ៉េខាងជើងប្រហែលជាកំពុងត្រៀមខ្លួនជាបណ្ដើរៗដើម្បីរៀបចំកិច្ចជំនួបកំពូលរវាងលោកគីមជុងអ៊ុន និងលោកពូទីន។ អ្នកនាំពាក្យវិមានក្រឹមឡាំង លោកឌីមីទ្រី ប៉េស្កោហ្វ (Dmitri Peskov) ប្រកាសកាលពីពេលថ្មីៗនេះថាលោកពូទីននឹងធ្វើដំណើរទៅទីក្រុងវ៉្លាឌីវ៉ូស្តុក (Vladivostok)…
ប្រទេសរុស្ស៊ី និងកូរ៉េខាងជើងប្រហែលជាកំពុងត្រៀមខ្លួនជាបណ្ដើរៗដើម្បីរៀបចំកិច្ចជំនួបកំពូលរវាងលោកគីមជុងអ៊ុន និងលោកពូទីន។ អ្នកនាំពាក្យវិមានក្រឹមឡាំង លោកឌីមីទ្រី ប៉េស្កោហ្វ (Dmitri Peskov) ប្រកាសកាលពីពេលថ្មីៗនេះថាលោកពូទីននឹងធ្វើដំណើរទៅទីក្រុងវ៉្លាឌីវ៉ូស្តុក (Vladivostok) នៅថ្ងៃចន្ទ និងថ្ងៃអង្គារសប្ដាហ៍ក្រោយដើម្បីចូលរួមនៅក្នុងសន្និសីទអន្តរជាតិដែលឈ្មោះថាវេទិកាសេដ្ឋកិច្ចនៃតំបន់បូព៌ា។ សន្និសីទរយៈពេល៤ថ្ងៃនេះនឹងរៀបចំឡើងចាប់ពីថ្ងៃអាទិត្យតទៅ។
លោកប៉េស្កោហ្វថ្លែងថាលោកពូទីននឹងឡើងថ្លែងសុន្ទរកថានៅចំពោះមុខកិច្ចប្រជុំនៅថ្ងៃអង្គារ។ ភ្ញៀវដែលអញ្ជើញចូលរួមនៅក្នុងសន្និសីទនេះក៏មានមន្ត្រីជាន់ខ្ពស់របស់រដ្ឋាភិបាលឡាវ និងចិនផងដែរ។ ពាក់ព័ន្ធនឹងពាក្យចចាមអារ៉ាមដែលថាមេដឹកនាំកូរ៉េខាងជើងនឹងធ្វើដំណើរទៅទីក្រុងវ៉្លាឌីវ៉ូស្តុកដែរនោះ លោកប៉េស្កោហ្វសូមមិនធ្វើអត្ថាធិប្បាយទៅលើរឿងនេះទេ។
ក្រសួងការបរទេសចិនថ្លែងថាឧបនាយករដ្ឋមន្ត្រីចិននឹងចូលរួមនៅក្នុងវេទិកានេះ។ មន្ត្រីថ្នាក់មូលដ្ឋាននៅវ៉្លាឌីវ៉ូស្តុកប្រាប់ថាលោកគីមជុងអ៊ុនប្រហែលជាចាកចេញដំណើរពីកូរ៉េខាងជើងនៅថ្ងៃចន្ទ ដោយជិះរថភ្លើងពិសេស និងទំនើបដែលអាចទប់ទល់នឹងគ្រាប់កាំភ្លើង។ នៅទីក្រុងវ៉្លាឌីវ៉ូស្តុក គេកំពុងលាបថ្នាំពណ៌ និងដុសសម្អាតស្នាមច្រែះឱ្យបានរួចរាល់ត្រឹមថ្ងៃសៅរ៍។ លោកពូទីនចង់ពិភាក្សាជាមួយមេដឹកនាំកូរ៉េខាងជើងពាក់ព័ន្ធនឹងការទិញ-លក់អាវុធដើម្បីយកទៅធ្វើសង្គ្រាមនៅអ៊ុយក្រែន។
នៅក្នុងព្រឹត្តិការណ៍១ទៀត លោកពូទីនជឿជាក់ថាទំនាក់ទំនងនៃប្រទេសទាំង២នឹងរីកចម្រើនលើគ្រប់វិស័យដោយសារកិច្ចខិតខំប្រឹងប្រែងរួមគ្នា។ នេះជាអ្វីដែលលោកបានសរសេររៀបរាប់នៅក្នុងលិខិត១ច្បាប់ផ្ញើជូនមេដឹកនាំកូរ៉េខាងជើង។ សារនយោបាយរបស់លោកពូទីនបញ្ចេញឱ្យដឹងចំពេលដែលកូរ៉េខាងជើងរម្លឹកខួបទី៧៥ឆ្នាំនៃការបង្កើតរដ្ឋកូរ៉េសម័យទំនើប អមដោយការហែក្បួនព្យុហយាត្រានៅទីក្រុងព្យុងយ៉ាង។ អ្នកតំណាងប្រទេសរុស្ស៊ី និងចិនក៏ចូលរួមនៅក្នុងពិធីនោះផងដែរ។ មន្ត្រីរដ្ឋាភិបាលអាមេរិកគិតថាលោកគីមជុងអ៊ុនអាចនឹងទៅទីក្រុងវ៉្លាឌីវ៉ូស្តុកនៅចុងខែកញ្ញាដោយជិះរថភ្លើងរយៈពេលម្ភៃម៉ោង៕
ប្រភព៖ NHK និង Politico
https://www3.nhk.or.jp/nhkworld/en/news/20230910_04/
https://www.politico.eu/article/vladimir-putin-closer-ties-north-korea-russia-kim-jong-un/
ចែករំលែកព័តមាននេះ