ខេត្តកណ្តាល ៖ ម៉ូតូកង់៣មួយគ្រឿងដែលដឹកមនុស្សពេញធ្វើដំណើរចេញពីភ្នំពេញទៅចូលរួមលើកជំនូនបងប្អូននៅឯខេត្តកំពង់ស្ពឺ បានជួបហេតុការណ៍ដាច់ចន្ទាសបណ្តាលឱ្យរេចង្កូតពេញផ្លូវបន្ទាប់មកក៏ជ្រុលចូលទៅក្នុងប្រឡាយទឹកធ្វើឱ្យមនុស្សដែលជិះនៅលើនោះ៨នាក់រងរបួសធ្ងន់និងស្រាល
ខេត្តកណ្តាល ៖ ម៉ូតូកង់៣មួយគ្រឿងដែលដឹកមនុស្សពេញធ្វើដំណើរចេញពីភ្នំពេញទៅចូលរួមលើកជំនូនបងប្អូននៅឯខេត្តកំពង់ស្ពឺ បានជួបហេតុការណ៍ដាច់ចន្ទាសបណ្តាលឱ្យរេចង្កូតពេញផ្លូវបន្ទាប់មកក៏ជ្រុលចូលទៅក្នុងប្រឡាយទឹកធ្វើឱ្យមនុស្សដែលជិះនៅលើនោះ៨នាក់រងរបួសធ្ងន់និងស្រាល ។
ឧប្បត្តិហេតុគ្រោះថ្នាក់នេះ បានកើតឡើងកាលពីវេលាម៉ោង៨ព្រឹកថ្ងៃទី១៥ ខែឧសភា ឆ្នាំ២០១១ នៅលើកំណាត់ផ្លូវជាតិលេខ៤ ចំណុចភូមិព្រៃរកា ឃុំឆក់ឈើនាង ស្រុកអង្គស្នួល ។ ម៉ូតូកង់៣នេះ ពាក់ស្លាកលេខភ្នំពេញ 1G-5603 បើកបរដោយបុរសឈ្មោះឃឹម សុភ័ណ អាយុ៤៨ឆ្នាំ មានទីលំនៅភូមិទឹកថ្លា សង្កាត់ទឹកថ្លា ខណ្ឌសែនសុខ រាជធានីភ្នំពេញ ។
តាមប្រភពព័ត៌មានបានឱ្យដឹងថា នៅមុនពេលកើតហេតុ ម៉ូតូកង់៣នេះត្រូវបានគេជួលជិះចេញពីសង្កាត់ទឹកថ្លា ខណ្ឌសែនសុខ ឆ្ពោះទៅចូលរួមក្នុងពិធីលើកជំនូនបងប្អូននៅម្តុំផ្សារព្រៃផ្តៅ ឃុំត្រពាំងគង ស្រុកសំរោងទង ខេត្តកំពង់ស្ពឺ ដែលមានមនុស្សជិះ៨នាក់ ដោយធ្វើដំណើរក្នុងទិសដៅពីកើតទៅលិចលើកំណាត់ផ្លូវជាតិលេខ៤ ។ លុះទៅដល់ចំណុចខាងលើ ចន្ទាសកន្ទុយរ៉ឺម៉កខាងក្រោយបានដាច់ ធ្វើឱ្យរេចង្កូតពេញផ្លូវ បន្ទាប់មកក៏ជ្រុលធ្លាក់ចូលទៅក្នុងប្រឡាយទឹកតែម្តង ។
ប្រភពដដែលបន្តទៀតថា ពេលមានឧបទ្ទវហេតុកើតឡើង អ្នកដែលជិះនៅលើម៉ូតូកង់៣នោះទាំងអស់មិនមាននរណាម្នាក់អាចលោតចេញរួចឡើយ ដោយអ្នកខ្លះធ្លាក់ខ្ទាតចេញកប់ភក់និងខ្លះទៀតត្រូវកៀបជាប់ជើងបណ្តាលឱ្យរបួសធ្ងន់ និងស្រាលទាំងអស់គ្នា ។ ក្រោយពេលកើតហេតុ អ្នករងរបួសធ្ងន់ត្រូវគេបញ្ជូនទៅមន្ទីរពេទ្យឯម៉ូតូកង់៣ត្រូវបានេសែងចេញពីក្នុងប្រឡាយយកទៅលាងទឹកហើយជួលជុល ។
អ្នកបើកបរនិយាយថា ក្នុងខណៈនោះ គាត់បើកបរក្នុងល្បឿនយឺតៗប៉ុណ្ណោះ ព្រោះមានមនុស្សជិះច្រើនមិនអាចលឿនបានឡើយ ។ ពេលមានឧប្បត្តិហេតុកើតឡើង គាត់ខំជាន់ហ្វ្រាំងដើម្បីឈប់និងខំទាញចង្កូតយ៉ាងអស់ពីសមត្ថភាព ប៉ុន្តែជាន់ហ្វ្រាំងក៏មិនជាប់និងកាច់បញ្ជាចង្កូតក៏មិនបានទៀត ។ ពេលនោះគាត់នឹកក្នុងចិត្តថា រូបគាត់ជាអ្នកបើកបរនិងអ្នកជិះទាំងអស់ប្រាកដជាស្លាប់ហើយ ប៉ុន្តែសំណាងល្អ ពេលធ្លាក់ចូលទៅក្នុងប្រឡាយគ្រាន់តែរបួសមិនមានអ្នកស្លាប់ទេ ។ ប៉ូលិសស្រុកអង្គស្នួលបានចុះទៅកាន់កន្លែងកើតហេតុ ប៉ុន្តែអ្នកជិះទាំងអស់អះអាងថា អត់ប្តឹងអ្នកបើកបរទេ ព្រោះជាឧបទ្ទវហេតុ ៕
ចែករំលែកព័តមាននេះ