ខេត្តពោធិ៍សាត់ ៖ យុវជនពីរនាក់ក្នុងចំណោមបក្សពួកជាច្រើននាក់ទៀត បានត្រូវសមត្ថកិច្ចទៅឃាត់ខ្លួនដល់ផ្ទះទាំងយប់ ដោយជាប់សង្ស័យពីបទបង្ករបួសស្នាមចាក់គូបដិបក្សរបួសធ្ងន់ ។ ការឃាត់ខ្លួនបានធ្វើឡើងកាលពីយប់ថ្ងៃទី១៣ ឧសភា វេលារំលងអធ្រាត្រក្រោយពេលមានក្មេងស្ទាវ២ក្រុមឈ្លោះដេញកា.ប់ចាក់គ្នាពីកន្លែងប្រគំតន្ត្រីស្រាបៀរ
ខេត្តពោធិ៍សាត់ ៖ យុវជនពីរនាក់ក្នុងចំណោមបក្សពួកជាច្រើននាក់ទៀត បានត្រូវសមត្ថកិច្ចទៅឃាត់ខ្លួនដល់ផ្ទះទាំងយប់ ដោយជាប់សង្ស័យពីបទបង្ករបួសស្នាមចាក់គូបដិបក្សរបួសធ្ងន់ ។ ការឃាត់ខ្លួនបានធ្វើឡើងកាលពីយប់ថ្ងៃទី១៣ ឧសភា វេលារំលងអធ្រាត្រក្រោយពេលមានក្មេងស្ទាវ២ក្រុមឈ្លោះដេញកាប់ចាក់គ្នាពីកន្លែងប្រគំតន្ត្រីស្រាបៀរ មកដល់ផ្លូវច្រមុះជ្រូកផ្សារចាស់ សង្កាត់ផ្ទះព្រៃ ក្រុងពោធិ៍សាត់ ។
មន្ត្រីនគរបាលក្រុងពោធិ៍សាត់ឱ្យដឹងថា យុវជនពាលាអាវ៉ាសែទាំងពីរនាក់នេះ ម្នាក់ឈ្មោះតឹង តុលា អាយុ២០ឆ្នាំ នៅភូមិប្រឡាយធំ ឃុំវាល ស្រុកកណ្តៀង និងម្នាក់ទៀតឈ្មោះហ៊ុំ សេងលី អាយុ២១ឆ្នាំ រស់នៅភូមិស្ថានីយ សង្កាត់ស្វាយអាត់ ក្រុងពោធិ៍សាត់ ។ មន្ត្រីនគរបាលឱ្យដឹងថា ក្រុមហ៊ុនស្រាបៀរមួយបានប្រគំតន្ត្រីផ្សាយពាណិជ្ជកម្មលក់ផលិតផលរបស់ខ្លួននៅក្នុងបរិវេណស្ថានីយទូរទស្សន៍ជាតិកម្ពុជាប៉ុស្តិ៍លេខ១០ពោធិ៍សាត់ រយៈពេល៥យប់ ចាប់ពីយប់ថ្ងៃទី១១ដល់១៥ ខែឧសភា ឆ្នាំ២០១១ ដោយមានរៀបតុត្រៀបត្រាដូចពិធីមង្គលការនិងគ្រឿងក្លែមគ្រប់មុខ សម្រាប់អតិថិជនជាវស្រាបៀររួចហើយអង្គុយហូបនៅទីនោះតែម្តង។
មន្ត្រីនគរបាលបន្តថា នៅយប់ថ្ងៃទី១២ ឧសភា ក្មេងអនាធិបតេយ្យពីរក្រុមទំនងជាផឹកស្រាបៀរនៅទីនោះស្រវឹង ក៏កើតជម្លោះដេញកាប់ចាក់គ្នារហូតដល់ផ្លូវច្រមុះជ្រូកផ្សារចាស់ ធ្វើឱ្យយុវជនម្នាក់ឈ្មោះលី ឡាតាស ភេទប្រុស អាយុ២០ឆ្នាំ រស់នៅភូមិស្ថានីយ សង្កាត់ស្វាយអាត់ ក្រុងពោធិ៍សាត់ ត្រូវក្រុមបដិបក្សចាក់មួយកាំបិតចុងស្រួចចំកំប៉េះគូទមុតជ្រៅហូរឈាមមិនឈប់រហូតក្រុមគ្រួសារបញ្ជូនទៅព្យាបាលដល់មន្ទីរពេទ្យនៅភ្នំពេញ ។ ភ្លាមៗនោះ សមត្ថកិច្ចបានកំណត់មុខសញ្ញាឃាត់ខ្លួនជនសង្ស័យទាំងពីរនាក់នេះ ឯបក្សពួកមួយចំនួនទៀតរត់គេចខ្លួនអស់ ។
នៅចំពោះមុខសមត្ថកិច្ច ជនសង្ស័យទាំងពីរនាក់បានបដិសេធថា ពួកគេមិនមែនជាជនដៃដល់ទេ នេះជាការឆ្លើយដាក់របស់ក្រុមជនរងគ្រោះប៉ុណ្ណោះ ។ គេបានកត់សម្គាល់ឃើញថា ក្រុមហ៊ុនស្រាបៀរមួយនេះដែលប្រគំតន្ត្រីនៅក្នុងបរិវេណស្ថានីយទូរទស្សន៍ជាតិខេត្តចំនួនពីរលើកគឺមានកាប់ចាក់គ្នាទាំងពីរលើក ។ ចំណែកអ្នកដាក់ភាស៊ីកង់នៅទីនោះនិយាយថា មិនមែនកាប់ចាក់គ្នាតែយប់ថ្ងៃទី១២ ឧសភាទេ គឺចាប់តាំងពីយប់ថ្ងៃទី១១ ឧសភាមកក្រុមក្មេងពាលាអាវ៉ាសែដូចហ្វូងគោតែងតែឈ្លោះដេញកាប់ចាក់គ្នាយ៉ាងអនាធិបតេយ្យរាល់យប់ ទោះបីមានកម្លាំងសន្តិសុខការពារពិធីច្រូងច្រាងក៏ដោយ ។
មានការរិះគន់ថា ក្នុងទីប្រជុំជនក្រុងពោធិ៍សាត់សព្វថ្ងៃនេះពេលយប់ឡើងងងឹតឈឹងដែលធ្វើឱ្យក្រុមចោរប្លន់ ក្រុមប្រព្រឹត្តបទល្មើសឬក្រុមក្មេងពាលាអាវ៉ាសែងាយស្រួលធ្វើសកម្មភាពបំផុត ។ ជនសង្ស័យទាំងពីរនាក់ត្រូវបានបញ្ជូនទៅកាន់សាលាដំបូងខេត្តនាព្រឹកថ្ងៃទី១៤ ឧសភា ៕
ចែករំលែកព័តមាននេះ