មហាជនបានលើកឡើងថា ក្រុមឈ្មួញនាំសត្វជ្រូករស់ចេញទៅប្រទេសវៀតណាម រីឯសត្វជ្រូកងា.ប់ប្រមាណជា៣០ក្បាល ទម្លាក់ចែកចាយឲ្យតាមទីសត្តឃា.តនានានៅក្នុងខេត្តស្វាយរៀង។ ករណីនេះ
ខេត្តស្វាយរៀង ៖ មហាជនបានលើកឡើងថា ក្រុមឈ្មួញនាំសត្វជ្រូករស់ចេញទៅប្រទេសវៀតណាម រីឯសត្វជ្រូកងា.ប់ប្រមាណជា៣០ក្បាល ទម្លាក់ចែកចាយឲ្យតាមទីសត្តឃា.តនានានៅក្នុងខេត្តស្វាយរៀង។ ករណីនេះ កើតឡើងកាលពីវេលាម៉ោង៨និង៣០នាទីយប់ ថ្ងៃទី០៧ ខែកញ្ញា ឆ្នាំ២០២៣ រហូតដល់ម៉ោង៩និង៣០នាទីយប់ នៅចំណុចកំពង់ផែកាណូតអូស្មាច់ ស្ថិតក្នុងភូមិចុងព្រែក សង្កាត់ស្វាយរៀង ក្រុងស្វាយរៀង។
បើតាមប្រជាពលរដ្ឋរស់នៅជាប់ផ្លូវជិតផែកាណូតអូស្មាច់ បានប្រាប់អ្នកសារព័ត៌មានយើងឲ្យដឹងថា ក្នុងរយៈពេល១ខែ មកដល់ខែកញ្ញា ឆ្នាំ២០២៣នេះ គឺមានឈ្មួញនាំសត្វជ្រូករស់មកសាងចែកចាយឲ្យក្រុមអាជីកម្មទីសត្តឃា.តនានាក្នុងខេត្តស្វាយរៀង ដើម្បីចែកចាយសាច់លក់នៅលើទីផ្សារក្នុងខេត្តស្វាយរៀង។
ប្រភពដដែលបន្តថា នៅវេលាម៉ោង៨និង៣០នាទីយប់ ថ្ងៃទី៧ ខែកញ្ញា ឆ្នាំ២០២៣ ស្រាប់តែឈ្មួញដឹកសត្វជ្រូកងា.ប់ប្រមាណ២០ទៅ៣០ក្បាល មកទម្លាក់នៅចំណុចផែកាណូតអូស្មាច់ រួចផ្ទេរចែកចាយឲ្យក្រុមអាជីវកម្មទីសត្តឃា.តនានានៅក្រុងស្វាយរៀង ដោយមិនដឹងថា តើសត្វជ្រូកទាំងនេះដឹកមកពីខាងណានោះទេ? គឺប្រជាពលរដ្ឋប្រទះឃើញមានរថយន្តធុនធំយីឌុបដឹកសត្វជ្រូកងា.ប់មកផ្ទេរ ដោយឃើញមានរថយន្ត២ទៅ៣គ្រឿងមកចតរង់ចាំសាងបន្ត។ លុះពេលឃើញរថយន្តអ្នកសារព័ត៌មានយើងថតរូបភាព ហើយនឹងសួរនាំ ស្រាប់តែបើករថយន្តចេញទៅបាត់តែម្ដង។
បើតាមអ្នកបើកបររថយន្តដឹកសត្វជ្រូកងា.ប់ទាំងនោះ បានប្រាប់អ្នកសារព័ត៌មានយើងឱ្យដឹងថា សត្វជ្រូកទាំងអស់នេះ ពួកគាត់ដឹកមកពីខេត្តកំពង់ស្ពឺ យកមកលក់ឲ្យថៅកែជ្រូកម្នាក់ឈ្មោះ ធឿន នៅក្រុងស្វាយរៀង ។
ទាក់ទិនករណីខាងលើនេះដែរ លោក ប៉ែន ចន្ធី ប្រធានការិយាល័យផលិតកម្ម និងបសុព្យាបាលនៃមន្ទីរកសិកម្ម រុក្ខាប្រម៉ាញ់ និងនេសាទខេត្តស្វាយរៀង បានប្រាប់ឲ្យដឹងថា មិនមែនសត្វជ្រូកងា.ប់ទេ គឺសត្វជ្រូករស់ គ្រាន់តែអន់ ដោយដឹកមកពីឆ្ងាយ។
ចំណែកម្ចាស់អាជីវកម្មឈ្មោះ យ៉ាត មានទីលំនៅភូមិរោងបន្លែ សង្កាត់ស្វាយរៀង ក្រុងស្វាយរៀង បានប្រមូលទិញសត្វជ្រូករស់ពីកសិដ្ឋានប៉េតាក្រូ, កសិដ្ឋានម៉ុងឬទ្ធី និងក្រុមហ៊ុនស៊ីភី គឺយកមកចែកចាយតាមទីសត្តឃា.តនានា នៅក្នុងខេត្តស្វាយរៀងជាយូរឆ្នាំមកហើយ ដោយមានលិខិតអនុញ្ញាតិចេញពីខេត្តដែលទិញ។ ហើយនៅវេលាម៉ោង៩យប់ ថ្ងៃទី៧ ខែកញ្ញា ឆ្នាំ២០២៣ តាមវិក័យប័ត្រ គឺជ្រូករស់ចំនួន១៥០ក្បាល (ដឹកតាមរថយន្ត២គ្រឿង) យកមកចែកចាយតាមទីសត្តឃា.ត តាមបណ្តាស្រុកនានានៅក្នុងខេត្ត ដើម្បីកា.ប់សាច់លក់នៅលើទីផ្សារក្នុងខេត្ត។
សូមរំលឹកផងដែរថា កាលពីថ្ងៃទី៣១ ខែសីហា រហូតមដល់ថ្ងៃទី១ ទី២ ខែកញ្ញា ឆ្នាំ២០២៣ មានក្រុមហ៊ុនដឹកជ្រូករស់ក្នុង១យប់ៗ ចាប់ពី៧គ្រឿងទៅ១០គ្រឿង ដោយក្នុង១គ្រឿងចាប់ពី៣០០ក្បាល ទៅ៣៥០ក្បាល ដឹកយកទៅផ្ទេរដាក់រថយន្តឲ្យឈ្មួញវៀតណាមនៅលើផ្លូវខ្សែក្រវ៉ាត់ព្រំដែនខាងលិចប៉ុស្តិ៍ច្រករបៀងកំពោតទូក ចម្ងាយ៣០០ម៉ែត្រ ស្ថិតក្នុងភូមិកំពោតទូក ឃុំគគីសោម ស្រុកស្វាយទាប ហើយដឹកតាមរថយន្តបន្តឆ្លងដែនចូលទៅប្រទេសវៀតណាម។
មហាជនបានឲ្យដឹងទៀតថា ក្រៅពីសត្វជ្រូករស់ ក៏មានឈ្មួញដឹកទំនិញជាច្រើនគ្រឿងក្នុង១យប់ៗផងដែរ គឺចាប់ពី១០គ្រឿងទៅ១៥គ្រឿង បង្កសម្លេងឮធ្វើឲ្យរំខានដល់ដំណេករបស់ពួកគាត់សម្រាន្តមិនបាន។ ដោយរថយន្តវៀតណាម១០គ្រឿងទៀត ចូលមកយកទំនិញពីឈ្មួញខ្មែរ ក្នុងនោះរួមមាន ៖ គ្រឿងអេឡិចត្រូនិច និងខោអាវជជុះ នៅត្រង់ចំណុចភូមិអង្គម ស្ថិតក្នុងឃុំគគីរសោម ស្រុកស្វាយទាប គឺផ្ទេរទំនិញពីរថយន្តខ្មែរដាក់លើរថយន្តវៀតណាម រូចដឹកឆ្លងដែនទៅប្រទេសវៀតណាម សរុបប្រមាណជិត៣០គ្រឿង គ្មានការរំខានដល់សមត្ថកិច្ចនោះទេ។
ទាក់ទិញករណីនេះដែរ មិនអាចទំនាក់ទំនងសុំការបំភ្លឺពីលោកមេប៉ុស្តិ៍នគរបាលច្រកកំពោតទូកបានទេ ។ បើតាមមន្ត្រីនគរបាលម្នាក់ សុំមិនបញ្ចេញឈ្មោះ បានបង្ហើបឲ្យដឹងថា ប៉ុស្តិ៍ច្រករបៀងកំពោតទូកនេះ ក្រោមការគ្រប់គ្រងដោយមេប៉ុស្តិ៍ច្រកទ្វារតំបន់ព្រំដែនព្រៃតាអី ក៏ប៉ុន្តែអ្នកសារព័ត៌មានយើងមិនអាចរកការបំភ្លឺបានទេ ដោយទូរសព្ទ័ចូលហើយ គ្មានមនុស្សលើក។
ចំណែកលោក ប៉ែន ចន្ធី ប្រធានការិយាល័យផលិតកម្ម និងបសុព្យាបាលនៃមន្ទីរកសិកម្ម រុក្ខាប្រម៉ាញ់ និងនេសាទខេត្តស្វាយរៀង ប្រាប់អ្នកសារព័ត៌មានយើងថា ក្នុងខេត្តស្វាយរៀង មាន២ក្រុមហ៊ុន រកស៊ីនាំសត្វជ្រូករស់ទៅប្រទេសវៀតណាម។
ទី១- (3TH Agriculture Development) នាយកក្រុមហ៊ុនឈ្មោះ លន់ ឡេង ប្រមូលទិញសត្វជ្រូករស់ពីកសិដ្ឋានក្នុងស្រុកទូទាំងប្រទេស លក់ចេញទៅប្រទេសវៀតណាម ដោយមានច្បាប់អនុញ្ញាតិពីនាយកដ្ឋានផលិតកម្មសត្វ និងសុខភាពសត្វ។
ទី២- ក្រុមហ៊ុន ឌឿនសាមិត ឯ.ក មានច្បាប់នាំជ្រូករស់ពីប្រទេសថៃ ឆ្លងកាត់ខេត្តស្វាយរៀង ទៅប្រទេសវៀណាម តាមច្រកទ្វារព្រំដែនអន្តរជាតិព្រៃវល្ល៍ ស្រុកកំពង់រោទ៌ និងតាមច្រកស្របច្បាប់នានាក្នុងខេត្តស្វាយរៀង។
ទាក់ទិនករណីខាងលើនេះដែរ លោក សុក សុទ្ធាវុធ ប្រធានមន្ទីរកសិកម្ម រុក្ខាប្រម៉ាញ់ និងនេសាទខេត្តស្វាយរៀង បានប្រាប់កោះសន្តិភាពឱ្យដឹងថា ករណីឈ្មួញនាំសត្វជ្រូករស់ឆ្លងដែនទៅប្រទេសវៀតណាមនេះ លោកបានចាត់មន្ត្រីឲ្យចុះស្រាវជ្រាវ ហៅក្រុមហ៊ុន និងអ្នកពាក់ព័ន្ធមកពិនិត្យឯកសារច្បាប់អនុញ្ញាតិ រួចបានដាក់មន្ត្រីឲ្យចុះពិនិត្យ និងកាត់ស្តុកតាមនីតិវិធីហើយ។
ព័ត៌មានបន្ថែមនឹងមានផ្សាយជូននៅលើកាសែតកោះសន្តិភាព៕
ចែករំលែកព័តមាននេះ