នៅប្រទេសស៊ីរីកាលពីថ្ងៃទី១៤ ឧសភា កន្លងមក មានការប៉ះទង្គិចគ្នាទៀតរវាងកងកម្លាំងសន្តិសុខដែលមានភក្តីភាពចំពោះប្រធានាធិបតីប្រទេសនេះ លោកបាចាអាល់អាសាដ និង ហ្វូងបាតុករនៅក្នុងទីក្រុងនានា បណ្តាលឱ្យស្លាប់មនុស្ស៥នាក់ទៀត បើទោះបីជាលោកអាល់អាសាដ បញ្ជាដល់កងកម្លាំងសន្តិសុខឱ្យបញ្ឈប់ការបាញ់រះលើហ្វូងបាតុករនឹងយល់ព្រមបើកការចរចាក៏ដោយ ។ ការប៉ះទង្គិចគ្នាប្រកបដោយការបង្ហូរឈាមជាថ្មីទៀតនេះធ្វើឱ្យប៉ះពាល់ដល់ការសន្យារបស់រដ្ឋាភិបាលលោកអាល់អាសាដ ដែលថានឹងបន្តការធ្វើកំណែទម្រង់របស់ប្រទេសដែលញាំញីដោយបាតុកម្មអស់រយៈពេល២ខែ បណ្តាលឱ្យស្លាប់មនុស្សជាច្រើនរយនាក់មកហើយ ។
ជាមួយគ្នានេះ ការបង្ក្រាបដោយហិង្សាថ្មីនេះញ៉ាំងឱ្យមានការថ្កោលទោសយ៉ាងខ្លាំងពីរដ្ឋាភិបាលប្រទេសលោកខាងលិច ដោយសហរដ្ឋអាមេរិកបានសម្តែងការខឹងសម្បាយ៉ាងខ្លាំង ហើយរដ្ឋមន្ត្រីការបរទេសបារាំង លោក Alain Juppe ស្តីបន្ទោសយ៉ាងខ្លាំងចំពោះលោកអាល់អាសាដ ចំពោះការបង្ក្រាបរបស់កងកម្លាំងសន្តិសុខដែលបណ្តាលឱ្យស្លាប់បាតុករជាច្រើននាក់ ។
ដោយឡែកប្រទេសអង់គ្លេសបានកោះអញ្ជើញឯកអគ្គរដ្ឋទូតស៊ីរីដោយព្រមានថា អង់គ្លេសនឹងចាត់វិធានការបន្ថែមទៀតចំពោះប្រទេសស៊ីរី ប្រសិនបើប្រទេសនេះបរាជ័យក្នុងការបញ្ឈប់ ការបង្ក្រាបដោយហិង្សាប្រឆាំងបាតុករ ។
សកម្មជនសិទ្ធិមនុស្សនិយាយថា ក្នុងការប៉ះទង្គិចគ្នាថ្មីនោះមនុស្ស៣នាក់បានត្រូវបាញ់សម្លាប់នៅក្នុងទីក្រុង Homs ភាគកណ្តាលប្រទេស និង២នាក់ទៀតបានត្រូវស្លាប់នៅតំបន់ Qabun នៅក្បែរទីក្រុងដាម៉ាស់ រដ្ឋធានីប្រទេសនេះ ។ នៅថ្ងៃទី១៤ ឧសភា នោះដែរកងកម្លាំងសន្តិសុខបានបាញ់ព្រមានដើម្បីបំបែកហ្វូងបាតុករប្រឆាំងរដ្ឋាភិបាលនៅក្នុងទីក្រុង Daraa ដែលមានប្រតិបត្តិការយោធារយៈពេល១០ថ្ងៃ។
ក្រុមសិទ្ធិមនុស្សនិយាយថា នៅប្រទេសស៊ីរីមនុស្សដល់ទៅ៨៥០នាក់ បានស្លាប់បាត់បង់ជីវិត និងមនុស្សជិត៨.០០០នាក់ទៀតបានត្រូវចាប់ខ្លួនចាប់តាំងពីកើតមានបាតុកម្មពីពាក់កណ្តាលខែមីនាមក ៕
ចែករំលែកព័តមាននេះ