អនុរដ្ឋមន្ត្រីក្រសួងពាណិជ្ជកម្មចាំផ្ទះថៃ លោក Alongkorn Panlaboot ថ្លែងថា ថៃបានស្នើដល់ប្រទេសភូមាដែលនៅក្បែរខាងឱ្យពិចារណាមើលពីការបើកឡើងវិញនូវច្រកឆ្លងកាត់ព្រំដែន Mae Sot-Myawaddy ដែលត្រូវបានបិទចាប់តាំងពីខែកក្កដា ឆ្នាំ២០១០ កន្លងមក ក្នុងការប៉ុនប៉ងដើម្បីជំរុញ និងលើកកម្ពស់ការធ្វើពាណិជ្ជកម្មនៅតាមព្រំដែនរវាងប្រទេសទាំងពីរ។សំណើនោះរបស់ថៃធ្វើឡើងកាលពីដើមខែនេះ ក្នុងអំឡុងពេលនៃកិច្ចប្រជុំរដ្ឋមន្ត្រីសេដ្ឋកិច្ចអាស៊ានដែលរៀបចំឡើងនៅក្នុងទីក្រុងហ្សាការតា ប្រទេសឥណ្ឌូណេស៊ី ។ នេះបើតាមការឱ្យដឹងដោយលោក Alongkorn ហើយលោកបានឱ្យដឹងទៀតថា ថៃក៏សូមថ្លែងអំណរគុណចំពោះរដ្ឋាភិបាលភូមាដែលបានសើរើឡើងវិញពីការហាមប្រាមរបស់ខ្លួនលើការនាំចូលទំនិញចំនួន១៥មុខរបស់ថៃ។
ការធ្វើពាណិជ្ជកម្ម និងការដឹកជញ្ជូនតាមព្រំដែននៅតំបន់ព្រំដែន Mae Sot-Myawaddy បានផ្អាកដំណើរការក្រោយពីមន្ត្រីភូមាបិទព្រំដែននៅចំណុចស្ពានមិត្តភាពថៃ-ភូមា ដែលឆ្លងកាត់ទន្លេ Moei និងនៅកំពង់ផែធ្វើពាណិជ្ជកម្មឆ្លងកាត់ព្រំដែនចំនួន២០កន្លែង តាមបណ្តោយដងទន្លេនោះ កាលពីខែកក្កដា ឆ្នាំ២០១០ កន្លងមក ។
តាមប្រភពព័ត៌មានថា អាជ្ញាធរភូមាបានសម្រេចបិទប៉ុស្តិ៍ឆែកឆេរព្រំដែនទាំងនោះដោយសារមិនសប្បាយចិត្តនឹងថៃដែលសាងសង់តំបន់ការពារព្រំដែនច្រាំងទន្លេខាងខ្លួន ព្រោះការសាងសង់តំបន់ការពារនោះអាចធ្វើឱ្យដី និងថ្ម បាក់ចូលក្នុងទន្លេ ៕
ចែករំលែកព័តមាននេះ