លទ្ធផលជោគជ័យរបស់សម្តេចធិបតី ហ៊ុន ម៉ាណែត នៅអាស៊ាន គឺលើកកម្ពស់ភាពស្របច្បាប់នៃរដ្ឋាភិបាលថ្មី លើឆាកអន្តរជាតិ
- ភ្នំពេញ
ភ្នំពេញ៖ កាលពីម៉ោងជិត ១១យប់ ថ្ងៃព្រហស្បតិ៍ ទី៧ ខែកញ្ញា ឆ្នាំ២០២៣ សម្តេចមហាបវរធិបតី ហ៊ុន ម៉ាណែត…
ភ្នំពេញ៖ កាលពីម៉ោងជិត ១១យប់ ថ្ងៃព្រហស្បតិ៍ ទី៧ ខែកញ្ញា ឆ្នាំ២០២៣ សម្តេចមហាបវរធិបតី ហ៊ុន ម៉ាណែត…
ភ្នំពេញ៖ កាលពីម៉ោងជិត ១១យប់ ថ្ងៃព្រហស្បតិ៍ ទី៧ ខែកញ្ញា ឆ្នាំ២០២៣ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានដឹកនាំគណៈប្រតិភូជាន់ខ្ពស់រាជរដ្ឋាភិបាលកម្ពុជា អញ្ជើញមកដល់អាកាសយានដ្ឋានអន្តរជាតិភ្នំពេញ ដោយសុវត្ថិភាព។ សម្តេចធិបតី ហ៊ុន ម៉ាណែត និងភរិយា បានដឹកនាំគណៈប្រតិភូជាន់ខ្ពស់រាជរដ្ឋាភិបាលកម្ពុជា អញ្ជើញទៅបំពេញបេសកកម្មដោយជោគជ័យ សម្រាប់ជាតិ និងប្រជាជនកម្ពុជា នៅក្នុងកិច្ចប្រជុំកំពូលអាស៊ាន លើកទី៤៣ និងកិច្ចប្រជុំកំពូលពាក់ព័ន្ធ នៅទីក្រុងហ្សាការតា សាធារណរដ្ឋឥណ្ឌូនេស៊ី ចាប់ពីថ្ងៃទី៤ ខែកញ្ញា ដល់ថ្ងៃទី៧ ខែកញ្ញា។
លោក សូរ ណារ៉ូ រដ្ឋមន្ត្រីប្រតិភូអមនាយករដ្ឋមន្ត្រី ដែលបានអមដំណើរសម្តេចធិបតី ហ៊ុន ម៉ាណែត ចូលរួមកិច្ចប្រជុំកំពូលអាស៊ាន និងកិច្ចប្រជុំកំពូលពាក់ព័ន្ធ នៅទីក្រុងហ្សាការតា ប្រទេសឥណ្ឌូនេស៊ី នៅពេលមកដល់ព្រលានយន្តហោះភ្នំពេញ នៅយប់ថ្ងៃទី៧កញ្ញា បានធ្វើសន្និសីទកាសែត។
លោករដ្ឋមន្ត្រីប្រតិភូអមនាយករដ្ឋមន្ត្រី សូរ ណារ៉ូ បានលើកឡើងថា «លទ្ធផលដែលជោគជ័យរបស់សម្តេចធិបតី ហ៊ុន ម៉ាណែត ទី១-គឺបានលើកកម្ពស់នៃភាពស្របច្បាប់នៃរដ្ឋាភិបាលថ្មី លើឆាកអន្តរជាតិ។ យើងដឹងហើយ គឺប្រមុខរដ្ឋ ប្រមុខរដ្ឋាភិបាលទាំងអស់ ដែលបានជួបជាមួយសម្តេចធិបតី ហ៊ុន ម៉ាណែត គឺបានសម្តែងនូវការអបអរសាទរមុខតំណែងថ្មីរបស់សម្តេច ជានាយករដ្ឋមន្ត្រីនៃព្រះរាជាណាចក្រកម្ពុជា។ អីចឹង ទន្ទឹមនឹងការផ្ញើសារមក ទទួលស្គាល់ហើយ ការជួបដោយផ្ទាល់ ដោយរាក់ទាក់ ដោយញញឹម ដោយមានការផ្លាស់ប្តូរយោបល់រស់រវើក ហើយយើងដឹងស្រាប់ហើយ នាយករដ្ឋមន្ត្រីកម្ពុជា គឺនិយាយភាសាអង់គ្លេស គឺថា ចង់ល្អជាងជនជាតិដើមទៅទៀត អីចឹងហើយ ការសន្ទនា ហើយភាពឆ្លាតវៃរបស់លោក ក្នុងការដាក់ជាសំណួរ ហើយលោកឆ្លើយឆ្លងភ្លាម រហូតដល់ប្រធានាធិបតីហ្វីលីពីន ព្រឹកមិញ ជួបគ្នា លោកក៏និយាយថា យើងដូចជាជួបគ្នារយៈពេលខ្លីណាស់ តែម៉េចក៏បានលទ្ធផលច្រើនម្លេះ!»។
លោករដ្ឋមន្ត្រីប្រតិភូអមនាយករដ្ឋមន្ត្រី សូរ ណារ៉ូ បន្ថែមថា «នេះជាចំណុចមួយ ដែលយើងឃើញថា ការសន្ទនាដោយបេះដូង ដោយគឺថា ដោះស្រាយភ្លាមៗ លើកបញ្ហា ឆ្លើយឆ្លងៗ ភ្លាមៗ រវាងប្រមុខរដ្ឋ ប្រមុខរដ្ឋាភិបាល នាំឱ្យផលប្រយោជន៍ច្រើនក្នុងកិច្ចសហប្រតិបត្តិការផ្នែកទេសចរណ៍ផង ផ្នែកកសិកម្មផង ផ្នែកស្បៀងអាហារ គឺច្រើនវិស័យមែនទែន ជាពិសេសខាងបដិវត្តកម្មនៃឌីជីថល សេដ្ឋកិច្ចឌីជីថល មានការផ្លាស់ប្តូរ រហូតដល់បញ្ហាសន្តិសុខ ឧក្រិដ្ឋកម្មឆ្លងដែន នៅក្នុងតំបន់។ អីចឹងហើយ កិច្ចសហប្រតិបត្តិការនៃអាជ្ញាធរប៉ូលិស រវាងប្រទេស និងប្រទេស គឺបានលើកឡើង ដោះស្រាយ ក៏ដូចជា ឆ្លើយឆ្លងច្រើនណាស់»។
ដូច្នេះលោករដ្ឋមន្ត្រីប្រតិភូអមនាយករដ្ឋមន្ត្រី សូរ ណារ៉ូ បញ្ជាក់ថា «ចំណុចទី១ ដែលលេចធ្លោនៃសកម្មភាពដ៏រស់រវើកនៃនាយករដ្ឋមន្ត្រីវ័យក្មេង គឺការទទួលស្គាល់ជាលក្ខណៈអន្តរជាតិ មិនមែនតែលើក្រដាសទេ គឺលើការជាក់ស្តែងតែម្តង។ នេះជាការលើកទឹកចិត្តធំធេងណាស់ នៃការចាប់ផ្តើមចេញដំណើររបស់រដ្ឋាភិបាលថ្មី»។
ក្រៅពីនេះ លោករដ្ឋមន្ត្រីប្រតិភូអមនាយករដ្ឋមន្ត្រី សូរ ណារ៉ូ ក៏បានកត់សម្គាល់ពីលទ្ធផលនៃដំណើរបំពេញបេសកកម្មដោយជោគជ័យរបស់សម្តេចធិបតី ហ៊ុន ម៉ាណែត នៅអាស៊ាន គឺលើវិស័យធុរកិច្ច ដែលសម្តេច បានអញ្ជើញចូលរួមក្នុងវេទិកាធុរកិច្ចអាស៊ាន។ សម្តេចធិបតី ហ៊ុន ម៉ាណែត បានឡើងថ្លែងការណ៍ជាភាសាអង់គ្លេស ក្នុងវេទិកាធុរកិច្ចអាស៊ាននេះ។ អ្នកធុរកិច្ចអាស៊ានយ៉ាងច្រើន ចាប់អារម្មណ៍ និងចង់មកវិនិយោគនៅកម្ពុជា។
ចំណែកបញ្ហាសេដ្ឋកិច្ច ក៏ត្រូវបានលោក សូរ ណារ៉ូ លើកឡើងក្នុងសន្និសីទកាសែតថា គឺសម្តេចធិបតី ហ៊ុន ម៉ាណែត បានជួបសម្តែងការគួរសមផង និងជួបពិភាក្សាការងារជាលក្ខណៈទ្វេភាគីជាមួយថ្នាក់ដឹកនាំរដ្ឋាភិបាល និងស្ថាប័ននានា សរុប ២០នាក់។ ក្រៅពីជួបសម្តែងការគួរសមជាមួយមេដឹកនាំប្រទេសនានាផង ក៏មានចុះ MoU ផង។ ក្នុងនោះ ឥណ្ឌូនេស៊ី បានសម្រេចចុះកិច្ចព្រមព្រៀង នាំអង្ករពីកម្ពុជា ចំនួន ២៥ម៉ឺនតោន។ កម្ពុជា និងហ្វីលីពីន ក៏បានចុះហត្ថលេខាលើកិច្ចព្រមព្រៀងពាណិជ្ជកម្មជាមួយគ្នាផងដែរ។
លោករដ្ឋមន្ត្រីប្រតិភូអមនាយករដ្ឋមន្ត្រី សូរ ណារ៉ូ បញ្ជាក់ថា «លទ្ធផលនៃការធ្វើដំណើរបំពេញបេសកកម្មក្រៅប្រទេសដំបូងរបស់សម្តេចធិបតី ហ៊ុន ម៉ាណែត គឺបានទទួលទាំងកេរ្តិ៍ឈ្មោះ កិត្តិយស បានទទួលទាំងផលជាក់ស្តែង មិនត្រឹមតែផលនៃសេដ្ឋកិច្ចទេ គឺនយោបាយទៅទៀត។ នយោបាយ គឺបណ្តាប្រទេសនានា បានដឹងពីគោលជំហររបស់កម្ពុជា ច្បាស់លាស់ជាងមុន ហើយសម្តេចធិបតី ហ៊ុន ម៉ាណែត មានការណ៍ហៅថា លក្ខណៈមិត្តភាពមែនទែន ក្នុងការឆ្លើយតបជាមួយនឹងក្តីកង្វល់ ឬក៏បញ្ហាដទៃណារបស់ប្រទេសហ្នឹង គឺឱ្យមានការយល់អំពីកម្ពុជាកាន់តែច្បាស់ យល់អំពីនយោបាយអព្យាក្រឹត្យរបស់កម្ពុជា យល់អំពីនយោបាយការពារសន្តិភាព ស្ថិរភាព ក៏ដូចជាយល់អំពីដំណើរប្រជាធិបតេយ្យនៅកម្ពុជា ដែលកម្ពុជាទើបតែបោះឆ្នោតថ្មីៗនេះ ហើយរដ្ឋាភិបាលថ្មីរបស់សម្តេច គឺចេញពីលទ្ធផលនៃការបោះឆ្នោត កាលពីថ្ងៃទី២៣ ខែកក្កដា ឆ្នាំ២០២៣ ហើយប្រជាពលរដ្ឋ រហូតដល់ ៨៤,៥៩% បានចេញទៅបោះឆ្នោត»។
លោក សូរ ណារ៉ូ បានបញ្ជាក់ថា «ក្នុងប្រទេស ប្រជាពលរដ្ឋគាំទ្រផ្លូកទឹកផ្លូកដី ទៅលើរដ្ឋាភិបាលថ្មី ហើយឥឡូវនេះ ចេញដំណើរទៅក្រៅប្រទេស បើកឆាកភ្លាម ល្អ ហើយខ្ញុំអាចហៅថា ដំណើរការទូត បេសកកម្មនេះ គឺជា មិនមែនដំណើរទេ រត់ម៉ារ៉ាតុងតែម្តង គឺរត់រហូត ពីព្រោះចេញកន្លែង ( ប្រជុំ ) មួយ យើងត្រូវទៅកន្លែងមួយទៀត។ អីចឹង ពេលវេលា ក្នុងរង្វង់តែ ៤ថ្ងៃ មានកិច្ចប្រជុំរហូតដល់ ១៣កិច្ចប្រជុំ ហើយជួបជាមួយថ្នាក់ដឹកនាំប្រមុខរដ្ឋប្រមុខរដ្ឋាភិបាល ចំនួន ២០នាក់ទៀត»៕
ចែករំលែកព័តមាននេះ