ឆ.ក់ទូរស័ព្ទមានភ្ជាប់ GPS ផ្អើលនគរបាលដេញតាមរកអស់មួយចំហៀងខណ្ឌ ទីបំផុតបាត់ដាន
- ភ្នំពេញ
រាជធានីភ្នំពេញ ៖ ជនសង្ស័យម្នាក់ធ្វើសកម្មភាពឆ.ក់ទូរស័ព្ទដៃ ម៉ាក iphone មួយគ្រឿងដែលមាន
រាជធានីភ្នំពេញ ៖ ជនសង្ស័យម្នាក់ធ្វើសកម្មភាពឆ.ក់ទូរស័ព្ទដៃ ម៉ាក iphone មួយគ្រឿងដែលមានភ្ជាប់ប្រព័ន្ធតាមដានសុវត្ថិភាពGPSផង ហើយក្រោយឆ.ក់បានសម្រេចក៏បានព្យាយាមជិះម៉ូតូរត់គេចបាត់។ បន្ទាប់មកជនរងគ្រោះដែលជាម្ចាស់ទូរស័ព្ទបានប្តឹងសុំឲ្យនគរបាលខណ្ឌពោធិ៍សែនជ័យជួយអន្តរាគមន៍ ក្រោយទទួលបានបណ្ដឹង នគរបាលទាំងអ្នកស្លៀកពាក់ជាឯកសណ្ឋាន និងស៊ីវិលផង។ ក៏បានធ្វើការស្រាវជ្រាវតាមសញ្ញាប្រព័ន្ធGPSចង្អុលបង្ហាញ និងធ្វើការដេញតាមបង្កឲ្យមានការភ្ញាក់ផ្អើល១ចំហៀងខណ្ឌ ប៉ុន្តែដេញចុះដេញឡើងទីបំផុតក៏បាត់ស្រមោលឈឹងរកលែងឃើញ។
ហេតុការណ៍ខាងលើនេះបានបង្កការភ្ញាក់ផ្អើលកើតឡើងកាលពីវេលាម៉ោង១១ព្រឹកថ្ងៃទី៧ ខែកញ្ញា ឆ្នាំ២០២៣ នៅតាមផ្លូវចោមចៅ ហៅផ្លូវវ៉េងស្រេង ស្ថិតនៅក្នុងភូមិត្រពាំងថ្លឹង៣ សង្កាត់ចោមចៅទី១ ខណ្ឌពោធិ៍សែនជ័យ រាជធានីភ្នំពេញ។
តាមប្រភពពីកន្លែងកើតហេតុបានប្រាប់ឲ្យដឹងថា នៅវេលាម៉ោងខាងលើ មានជនសង្ស័យម្នាក់បានជិះម៉ូតូមួយគ្រឿងម៉ាកហុងដាឌ្រីម ធុនសេ១២៥ ធ្វើសកម្មភាពឆ.ក់ទូរស័ព្ទម៉ាក I phone ពីបុរសម្នាក់ដែលកំពុងធ្វើដំណើរនៅផ្លូវចោមចៅ ក្នុងភូមិកើតហេតុខាងលើនោះ ។ ក្រោយឆ.ក់បានសម្រេចហើយ ជនសង្ស័យបានជិះម៉ូតូគេចខ្លួនសំដៅឡើងទៅតាមមហាវិថីសហព័ន្ធរុស្ស៊ីបាត់ស្រមោល ចំណែកបុរសរងគ្រោះដោយសារតែទូរស័ព្ទរបស់គាត់មានភ្ជាប់ប្រព័ន្ធតាមដានសុវត្ថិភាពGPS មើលឃើញសញ្ញាជនសង្ស័យកំពុងគេចខ្លួនតាមផ្លូវ ក៏បានប្ដឹងសុំឲ្យនគរបាលជួយអន្តរាគមន៏ភ្លាមៗដែរ។
តាមប្រភពដដែលបានប្រាប់ឲ្យដឹងបន្តទៀតថា បន្ទាប់ពីទទួលបានបណ្ដឹងពីបុរសរងគ្រោះភ្លាមនគរបាលនៃអធិការដ្ឋានខណ្ឌពោធិ៍សែនជ័យ រួមជាមួយនគរបាលតាមបណ្ដាប៉ុស្តិ៍រដ្ឋបាលមួយចំនួនមានកម្លាំងស្លៀកពាក់ជាឯកសណ្ឋាន និងស្លៀកពាក់ស៊ីវិល បានចេញអន្តរាគមន៍ភ្លាមៗ ហើយបានប្រកាសតាមវិទ្យុទាក់ទង និងដេញតាមសញ្ញាដែលប្រព័ន្ធGPSបង្ហាញ បង្កឲ្យមានការភ្ញាក់ផ្អើល១ចំហៀងខណ្ឌ ប៉ុន្តែពេលដេញតាមចុះតាមឡើងៗពីកន្លែងមួយទៅកន្លែងមួយអស់រយៈពេលជា២ម៉ោង ទីបំផុតស្រាប់តែបាត់ដានរកសញ្ញាលែងឃើញ ហើយជនសង្ស័យគេចខ្លួនបាត់ដោយសុវត្ថិភាព ៕
ចែករំលែកព័តមាននេះ