ប្រធានមូលនិធិរូបិយវត្ថុអន្តរជាតិ (IMF) លោក Dominique Strauss-Kahn បានត្រូវចាប់ខ្លួននៅក្នុងទីក្រុងញូវយ៉ក សហរដ្ឋអាមេរិក ពីបទចោទប្រកាន់ប៉ងរំលោភបំពានផ្លូវភេទលើស្ត្រីជាអ្នកបម្រើនៅសណ្ឋាគារមួយរូបក្នុងទីក្រុងញូវយ៉ក ។ កាសែត The New York Times រាយការណ៍ថា លោក Strauss-Kanh ត្រូវបាននាំចេញពីយន្តហោះដោយគិញសម្ងាត់៣នាក់ នៅឯព្រលានយន្តហោះ John F-Kennedy ដែលយន្តហោះនោះគ្រោងចេញដំណើរទៅកាន់ទីក្រុងប៉ារីស ប្រទេសបារាំង ។ ក្រោយពីត្រូវចាប់ខ្លួនលោក Strauss-Kanh ត្រូវបាននាំទៅប៉ុស្តិ៍ប៉ូលិសក្រុងញូវយ៉កមួយ ដើម្បីសួរចម្លើយទាក់ទិនទៅនឹងការចោទប្រកាន់ពីបទរំលោភបំពានផ្លូវភេទលើស្ត្រីអ្នកបម្រើម្នាក់។
ស្នងការរងនគរបាលក្រុងញូវយ៉ក លោក Paul Browne បានប្រាប់ទូរទស្សន៍ CNN ថា លោក Stauss-Kanh ត្រូវគេប្រទះឃើញស្រាតនៅពេលស្ត្រីអ្នកបម្រើរូបនោះចូលក្នុងបន្ទប់ស្នាក់នៅរបស់គាត់ដើម្បីបោសសំអាតនៅវេលាម៉ោង១រសៀលថ្ងៃទី១៤ ឧសភា កន្លងមក ។ លោក Browne បានឱ្យដឹងទៀតថា នៅពេលស្ត្រីរូបនេះចូលដល់ក្នុងបន្ទប់ លោក Strauss Kahn បានព្យាយាមផ្តេកផ្តួលខ្លួនលើស្ត្រីនោះ ប៉ុន្តែស្ត្រីនោះបានរត់ចេញក្រៅ ហើយរត់ទៅកាន់តុមួយនៅខាងមុខសណ្ឋាគារ។ នៅពេលប៉ូលិសទៅដល់បន្ទប់នោះ លោក Strauss-Kanh បានចាកចេញពីបន្ទប់បាត់ទៅហើយ ដោយបន្សល់ទុកនូវតែទូរស័ព្ទដៃមួយប៉ុណ្ណោះ។
លោក Stauss-Kanh បានបដិសេធមិនឆ្លើយសំណួររបស់ប៉ូលិសក្រុងញូវយ៉ក ឬមិនធ្វើសេចក្តីថ្លែងការណ៍ឡើយ ។
ពុំមានការចោទប្រកាន់ផ្លូវការត្រូវបានដាក់ប្រឆាំងលោក Strauss-Kanh នៅឡើយទេ។
លោក Dominique Strauss-Kanh ជាអតីតរដ្ឋមន្ត្រីក្រសួងហិរញ្ញវត្ថុបារាំង បច្ចុប្បន្នជាមេដឹកនាំគណបក្សសង្គមនិយមបារាំង និងជាប្រធាន IFM ៕
ចែករំលែកព័តមាននេះ