រាជធានីភ្នំពេញ ៖ សាលាដំបូងរាជធានីភ្នំពេញ កាលពីព្រឹកថ្ងៃទី០៦ ខែកញ្ញា ឆ្នាំ២០២៣ បានប្រកាសសាលក្រមសម្រេចផ្ដន្ទាទោសលើជនជាប់ចោទម្នាក់ ដែលជាអតីតបុគ្គលិកក្រុមហ៊ុនសន្តិសុខឯកជនម្នាក់ ដាក់ពន្ធនាគារកំណត់១០ឆ្នាំ ក្រោមការចោទប្រកាន់ពីបទ.ប៉ុន ប៉ងឃាតកម្ម.ដោយយកដែកចុងស្រួចចាក់ទៅលើបុរសអ្នករើសអេតចាយ បណ្ដាលឲ្យរងរបួសយ៉ាងធ្ងន់ធ្ងរ ។
ជនជាប់ចោទមានឈ្មោះ សេន អាត ភេទប្រុស អាយុ៥៦ឆ្នាំ ជាសន្តិសុខឯកជន រស់នៅម្តុំផ្លូវ៣៧១ សង្កាត់បឹងទំពន់ទី២ ខណ្ឌមានជ័យ រាជធានីភ្នំពេញ ។ សាលក្រមបានប្រកាសជាសាធារណៈ ដោយលោកស្រី គឹម សុគន្ធា ចៅក្រមជំនុំជម្រះ និងលោក ស៊ន មុនី ព្រះរាជអាជ្ញារង តំណាងអយ្យការអមសាលាដំបូងរាជធានីភ្នំពេញ ។
សំណុំរឿងនេះ ត្រូវបានតុលាការលើកយកបើកសវនាការកាលពីថ្ងៃទី២២ ខែសីហា ឆ្នាំ២០២៣ និងសម្រេចប្រកាសសាលក្រម នាថ្ងៃទី០៦ ខែកញ្ញា ឆ្នាំ២០២៣ ។ នៅចំពោះមុខអង្គសវនាការ ជនជាប់ចោទបានសារភាពថា ខ្លួនពិតជាបានយកដែកស្រួចចាក់ទៅលើជនរងគ្រោះប្រាកដមែនដោយសារជនរងគ្រោះមកលួចយកអីវ៉ាន់ពីកន្លែងដែលខ្លួនយាមប្រចាំច្រើនញឹកញាប់ពេក ។
ជនជាប់ចោទបន្តថា នៅថ្ងៃកើតហេតុ ខ្លួនបានឃើញ និងទាន់ជនរងគ្រោះជាអ្នករើសអេតចាយ កំពុងធ្វើសកម្មភាពលួចសម្ភាររបស់ក្រុមហ៊ុនដែលខ្លួនយាមប្រចាំការ ហើយមិនមែនលួចតែម្តងនោះទេ ពេលនោះ ខ្លួនបានចូលទៅចាប់«ចោរអេតចាយ»ទើបមានការប្រតាយប្រតប់គ្នា បណ្តាលឲ្យខ្លួនស្ទុះយកបានដែកចុងស្រួច ចាក់ទៅលើជនគ្រោះធ្វើរងរបួសជាទម្ងន់ ស្ថិតនៅចំណុចស្ថានីយប្រេងឥន្ទនៈ PTT ផ្លូវ៣៧១ ភូមិត្នោតជ្រុំ៤ សង្កាត់បឹងទំពន់ទី២ ខណ្ឌមានជ័យ រាជ ធានីភ្នំពេញ កាលពីថ្ងៃទី២៧ ខែមីនា ឆ្នាំ២០២៣ វេលាម៉ោង៧ យប់ រួចក៏ត្រូវបានកម្លាំងសមត្តកិច្ចនគរបាលខណ្ឌមានជ័យចាប់ខ្លួន ។
ជនរងគ្រោះមានឈ្មោះ យាន ឡាយ ភេទប្រុស អាយុ៣៤ ឆ្នាំ ស្នាក់នៅផ្ទះជួល ផ្លូវ៧០៥ ភូមិត្នោតជ្រុំ៤ សង្កាត់បឹងទពន់ទី២ ខណ្ឌមានជ័យ រាជធានីភ្នំពេញ ជាអ្នករើសអេតចាយ ។ ក្នុងសម្លៀកបំពាក់ឈុតអ្នកទោស ជនជាប់ចោទមានទឹកមុខស្រងូតស្រងាត់ ដោយបានលើកដៃប្រណមទទួចស្នើសុំដល់លោកស្រីចៅក្រមជំនុំជម្រះ ឲ្យមានការបន្ធូរបន្ថយទោសខ្លះ ព្រោះនេះជាកំហុសខឹងអ្នករើសអេតចាយ លួចសម្ភាររបស់ក្រុមហ៊ុនដែលខ្លួនយាមញឹកញាប់ពេក ។
ព័ត៌មានបន្ថែមនឹងមានផ្សាយជូនបន្តលើកាសែតកោះសន្តិភាព ។
ចែករំលែកព័តមាននេះ