ខេត្តក្រចេះ ៖ ប៉ូលិសអធិការដ្ឋានក្រុងក្រចេះ ដឹកនាំដោយលោកអនុសេនីយ៍ឯក ច័ន្ទ សុផល្លា អធិការរង បានបង្ក្រាបនិងឃាត់ខ្លួនជនសង្ស័យជួញដូរថ្នាំញៀនចំនួនពីរនាក់ជាបន្តបន្ទាប់ ក្រោយពីបានឃាត់ខ្លួនក្រុមអ្នកប្រើប្រាស់បួននាក់រួចមក ។ ការចុះបង្រ្កាបជនជាមុខសញ្ញាចែកចាយ និងប្រើប្រាស់ថ្នាំញៀននេះ បានធ្វើឡើងកាលពីថ្ងៃទី១៣
ខេត្តក្រចេះ ៖ ប៉ូលិសអធិការដ្ឋានក្រុងក្រចេះ ដឹកនាំដោយលោកអនុសេនីយ៍ឯក ច័ន្ទ សុផល្លា អធិការរង បានបង្ក្រាបនិងឃាត់ខ្លួនជនសង្ស័យជួញដូរថ្នាំញៀនចំនួនពីរនាក់ជាបន្តបន្ទាប់ ក្រោយពីបានឃាត់ខ្លួនក្រុមអ្នកប្រើប្រាស់បួននាក់រួចមក ។ ការចុះបង្រ្កាបជនជាមុខសញ្ញាចែកចាយ និងប្រើប្រាស់ថ្នាំញៀននេះ បានធ្វើឡើងកាលពីថ្ងៃទី១៣ ឧសភា នៅខាងក្រោយព្រលានយន្តហោះ ស្ថិតក្នុងសង្កាត់អូរឫស្សី ក្រុងក្រចេះ ខណៈពេលជនទាំងនេះកំពុងធ្វើសកម្មភាពលួចជក់ថ្នាំញៀន។
លោកអនុសេនីយ៍ឯក ច័ន្ទ សុផល្លា មានប្រសាសន៍ថា ជនប្រើប្រាស់ថ្នាំញៀនចំនួន៤នាក់នោះមាន១-ឈ្មោះញ៉ែម ដា អាយុ២៤ឆ្នាំ មានទីលំនៅក្នុងឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ ២-ឈ្មោះសែម ដា អាយុ២៤ឆ្នាំ មានទីលំនៅក្នុងភូមិលេខ១ ឃុំគងជ័យ ស្រុកអូររាំងឪ ខេត្តកំពង់ចាម ៣-ឈ្មោះហម ផាន អាយុ២៦ឆ្នាំ និង៤-ឈ្មោះខែ សូនី អាយុ២៦ឆ្នាំទាំងពីរនាក់នេះមានទីលំនៅក្នុងសង្កាត់អូរឫស្សី ក្រុងក្រចេះ។ នៅក្នុងការបង្រ្កាបជនទាំង៤នាក់នេះ សមត្ថកិច្ចដកហូតបានឧបករណ៍សម្រាប់ជក់ថ្នាំញៀនមួយចំនួនធំ ។
លោកអធិការរងបានឲ្យដឹងទៀតថា ក្រោយពីកម្លាំងជំនាញឃាត់ខ្លួនជនទាំង៤នាក់នាំមកកាន់អធិការដ្ឋានក្រុង ដើម្បីសួរនាំរួចមក នៅថ្ងៃដដែលវេលាម៉ោង១១យប់ កម្លាំងជំនាញក៏បានឃាត់ខ្លួនជន២នាក់ទៀត នៅក្រុងក្រចេះ ដែលជាមុខសញ្ញាជួញដូរថ្នាំញៀនគឺឈ្មោះកៅ លឹមមករា អាយុ៣៧ឆ្នាំ និងឈ្មោះសារី ភ័ណ្ឌ អាយុ២៧ឆ្នាំ ទាំងពីរនាក់មានទីលំនៅក្នុងក្រុងក្រចេះ។ ក្រៅពីឃាត់ខ្លួនជនសង្ស័យចែកចាយថ្នាំញៀនទាំងពីរនាក់នេះ សមត្ថកិច្ចធ្វើការឆែកឆេរ និងរឹបអូសបានថ្នាំញៀនប្រភេទ ម៉ាទឹកកក ចំនួន២៤កញ្ចប់តូច ខណៈជននេះយកទៅលាក់ក្នុងមួកការពារសុវត្ថិភាព។
នៅល្ងាចថ្ងៃទី១៤ ឧសភា សមត្ថកិច្ចដឹកនាំដោយលោកឧត្តមសេនីយ៍ត្រី ជួង ស៊ាងហាក់ ស្នងការនគរបាលខេត្ត មន្រី្តតុលាការខេត្ត និងមន្ត្រីជំនាញការិយាល័យប្រឆាំងការជួញដូរថ្នាំញៀន បានចុះទៅធ្វើកោសល្យវិច័យលើថ្នាំញៀនដែលចាប់ឃាត់បានឃើញថា ថ្នាំញៀនទាំងនេះមានសារធាតុមេតំហ្វេតាមីន។ ជនទាំង២នាក់ ជាមុខសញ្ញាជួញ ដូរថ្នាំញៀន និងជន៤នាក់ជាមុខសញ្ញាប្រើប្រាស់ថ្នាំញៀន ត្រូវបានឃុំខ្លួនបណ្តោះអាសន្ននៅអធិការដ្ឋាននគរបាលក្រុងក្រចេះ ដើម្បីកសាងសំណុំរឿងចាត់វិធានការបន្តតាមនីតិវិធី ៕
ចែករំលែកព័តមាននេះ