ខេត្តតាកែវ៖ ដោយទទួលបានបទបញ្ជាពីលោកឧត្ដមសេនីយ៍ត្រី សេង មហា មេបញ្ជាការកងរាជអាវុធហត្ថខេត្តតាកែវ និងមានការសម្របសម្រួលនីតិវិធីពីលោកឯក ឆេងហួត ព្រះរាជអាជ្ញាអមសាលាដំបូងខេត្តតាកែវ នៅវេលាម៉ោង១៤និង៤៨នាទីរសៀល ថ្ងៃទី៤ ខែកញ្ញា ឆ្នាំ២០២៣ កម្លាំងជំនាញមន្ទីរស្រាវជ្រាវ និងបង្ក្រាបបទល្មើសកងរាជអាវុធហត្ថខេត្តតាកែវ សហការជាមួយកម្លាំងមូលដ្ឋានកងរាជអាវុធហត្ថស្រុកសំរោង និងស្នាក់ការសន្តិសុខ៣០១ ដឹកនាំដោយលោកវរសេនីយ៍ឯក ង៉ែត ចាន់ធី មេបញ្ជាការរងខេត្ត បានធ្វើការស្រាវជ្រាវដល់កន្លែងកើតហេតុ ពាក់ព័ន្ធករណីគប់កញ្ចក់រថយន្ត កាលពីវេលាម៉ោង១៩និង១៥នាទីយប់ ថ្ងៃទី១ ខែកញ្ញា ឆ្នាំ២០២៣ នៅតាមបណ្ដោយផ្លូវជាតិលេខ៣(គម៥៣) ស្ថិតក្នុងភូមិព្រៃញឹក ឃុំខ្វាវ ស្រុកសំរោង ខេត្តតាកែវ។
![](https://kohsantepheapdaily.com.kh/wp-content/uploads/2023/09/68d30a9594728bc39aa24be94b319d21-3.jpg)
លោកឧត្តមសេនីយ៍ត្រី សេង មហា មេបញ្ជាការកងរាជអាវុធហត្ថខេត្ត បានប្រាប់ឱ្យដឹងថា ជាលទ្ធផលកម្លាំងរបស់យើងបានឃាត់ខ្លួនជនសង្ស័យបានចំនួន៦នាក់ ក្នុងនោះរួមមាន ៖ ១- ឈ្មោះ សុខ រ៉ា (ជនដៃដល់) ភេទប្រុស អាយុ១៩ឆ្នាំ មុខរបរមិនពិតប្រាកដ រស់នៅភូមិបារ៉ែន ឃុំក្រាំងលាវ ស្រុកបាទី ខេត្តតាកែវ។ ២- ឈ្មោះ ទឹន វិន ភេទប្រុស អាយុ១៨ឆ្នាំ មុខរបរកម្មកររោងចក្រ រស់នៅភូមិតំណាក់ត្រាច ឃុំទួលអំពិល ស្រុកបរសេដ្ឋ ខេត្តកំពង់ស្ពឺ។ ៣- ឈ្មោះ គង់ កែវ ភេទប្រុស អាយុ២០ឆ្នាំ មុខរបរ កម្មកររោងចក្រ។ ៤- ឈ្មោះ យុង សំនិត ភេទប្រុស អាយុ២០ឆ្នាំ មុខរបរកសិករ។ ៥- ឈ្មោះ សែម ហួតឡុង ភេទប្រុស អាយុ២០ឆ្នាំ មុខរបរកម្មកររោងចក្រ។ ៦- ឈ្មោះ សែម ហួតឡៃ ភេទប្រុស អាយុ១៨ឆ្នាំ មុខរបរកម្មកររោងចក្រ ទាំង៤នាក់នេះ រស់នៅភូមិព្រៃញឹក ឃុំខ្វាវ ស្រុកសំរោង ខេត្តតាកែវ។
![](https://kohsantepheapdaily.com.kh/wp-content/uploads/2023/09/fe9fc289c3ff0af142b6d3bead98a923-3.jpg)
លោកមេបញ្ជាការកងរាជអាវុធហត្ថខេត្ត បានប្រាប់ឱ្យដឹងទៀតថា ចំពោះវត្ថុតាងដែលចាប់យកបាន រួមមាន ៖ ១- ម៉ូតូចំនួន០២គ្រឿង (ម៉ាកហុងដា C125 ពណ៌ខ្មៅ ស៊េរី២០២៣ ស្លាកលេខ ភ្នំពេញ1JD. 5543 និងម៉ាកហុងដា C125 ស៊េរី២០០៨ ពណ៌ខ្មៅ ពាក់ស្លាកលេខ តាកែវ1D.3266)។ ២- ទូរស័ព្ចដៃ០២គ្រឿង (ម៉ាក VIVO និងម៉ាក iPhone)។ ៣-កាំភ្លើ.ងកែច្នៃ០១ដើម មានគ្រាប់ចំនួន០៣គ្រាប់។
![](https://kohsantepheapdaily.com.kh/wp-content/uploads/2023/09/9778d5d219c5080b9a6a17bef029331c-3.jpg)
លោកមេបញ្ជាការកងរាជអាវុធហត្ថខេត្ត បានបញ្ជាក់ទៀតថា នៅចំពោះមុខសមត្ថកិច្ច ក្រុមជនសង្ស័យខាងលើនេះ បានសារភាពថា «ពួកគេពិតជាបានធ្វើសកម្មភាពគប់កញ្ចក់រថយន្ត ដែលគេកំពុងបើកបរនៅលើដងផ្លូវពិតប្រាកដមែន»។ ហើយនៅពេលនេះ ការិយាល័យជំនាញខេត្ត កំពុងតែកសាងសំណុំរឿងបញ្ជូនជនសង្ស័យទាំង៦ខាងលើ រួមនឹងវត្ថុតាងទៅកាន់អយ្យការអមសាលាដំបូងខេត្តតាកែវ ដើម្បីចាត់ការតាមច្បាប់ហើយ។
ចែករំលែកព័តមាននេះ