ខេត្តព្រះសីហនុ ៖ បុរសម្នាក់បានដេកដួលនៅលើថ្នល់និងម៉ូតូនៅក្រោមរថយន្ត បន្ទាប់ពីរថយន្តក្រុងដឹកអ្នកដំណើរបើកក្នុងទិសដៅពីភ្នំពេញទៅក្រុងព្រះសីហនុបុកកាលពីវេលាម៉ោង១៧និង៣០នាទីថ្ងៃទី១៣ ឧសភា នៅតាមបណ្តោយផ្លូវជាតិលេខ៤ ក្បែរផ្សារឃ្លាំងលើស្ថិតក្នុងក្រុមទី៣ ភូមិ២ សង្កាត់លេខ១ ក្រុងព្រះសីហនុ ។ តាមប្រភពពីសមត្ថកិច្ចប៉ូលិសបានឱ្យដឹងថា ជនរងគ្រោះនោះឈ្មោះ យ៉ាត់ ចន ភេទប្រុស អាយុ២២ឆ្នាំ មានទីលំនៅក្រុមទី១៣ ភូមិ៣ សង្កាត់លេខ១ ក្រុងព្រះសីហនុ ជាកម្មករស៊ីឈ្នួលវាយថ្មលក់ ។ ឯអ្នកបើកបររថយន្តបានរត់គេចខ្លួនបាត់ក្រោយហេតុការណ៍ បន្សល់ទុកតែរថយន្តប៉ុណ្ណោះ។
យោងតាមប្រភពពីសាក្សីនៅកន្លែងកើតហេតុបានឱ្យដឹងថា មុនពេលកើតហេតុគេឃើញជនរងគ្រោះជិះម៉ូតូមកពីទិញរបស់ប្រើប្រាស់នៅតូបក្បែរផ្សារឃ្លាំងលើ បន្ទាប់មកក៏បានជិះឆ្លងផ្លូវមកដល់ចំនុចកើតហេតុ ក៏ត្រូវរថយន្តបុកតែម្តង តែជាសំណាងល្អ មិនបណ្តាលឱ្យបាត់បង់ជិវិតគ្រាន់តែរងរបួស និងខូចខាតម៉ូតូ ។ រថយន្តនិងម៉ូតូត្រូវបានប៉ូលិសចរាចរយកមករក្សាទុកនៅការិយាល័យចរាចរណ៍ខេត្តរង់ចាំការដោះស្រាយពេលក្រោយ ។ ឯជនរងគ្រោះត្រូវបានបងប្អូនបញ្ជូនទៅកាន់មន្ទីរពេទ្យក្បែរនោះសង្គ្រោះភ្លាមៗដែរ ៕
ចែករំលែកព័តមាននេះ