លោកគីម ជុងអ៊ុន ចង់ជួបលោកពូទីន ពិភាក្សាពីការផ្ដល់អាវុ.ធ
កូរ៉េខាងជើង-រុស្ស៊ី ៖ សេតវិមានអះអាងកាលពីថ្ងៃទី៤ កញ្ញា ថា មេដឹកនាំកូរ៉េខាងជើង លោកគីម
កូរ៉េខាងជើង-រុស្ស៊ី ៖ សេតវិមានអះអាងកាលពីថ្ងៃទី៤ កញ្ញា ថា មេដឹកនាំកូរ៉េខាងជើង លោកគីម ជុងអ៊ុន មានបំណងមកកាន់រុស្ស៊ី ដើម្បីពិភាក្សាជាមួយ លោកវ្ល៉ាឌីមៀរ ពូទីន ពីការលក់អាវុធរបស់ក្រុងព្យុងយ៉ាងឲ្យដល់ក្រុងមូស្គូ សម្រាប់ធ្វើសង្គ្រាមនៅអ៊ុយក្រែន ។
លោកស្រី ANDRIENNE WATSON អ្នកនាំពាក្យក្រុមប្រឹក្សាសន្តិសុខជាតិនៃសេតវិមានថ្លែងថា ដូចដែលយើងធ្លាប់បាននិយាយរួចហើយការចរចាស្ដីពីការផ្ដល់អាវុធរវាងរុស្ស៊ី និងកូរ៉េខាងជើង មានការរីកចម្រើនដ៏សកម្ម ។ យើងដឹងថាលោកគីមជុងអ៊ុនចង់បន្តការចរចានោះ ជាមួយការផ្លាស់ប្ដូរខាងការទូតកម្រិតខ្ពស់បំផុតនៅរុស្ស៊ី ។
កាលពីថ្ងៃទី៣០មីនាប្រមុខអ្នកនាំពាក្យក្រុមប្រឹក្សាសន្តិសុខជាតិអាមេរិក លោក JONH KIRBY ប្រកាសរួចហើយពីការរីកចម្រើនដ៏ឆាប់នៃការចរចាស្ដីពីការផ្ដល់អាវុធរបស់ក្រុងព្យុងយ៉ាងនាពេលខាងមុខឲ្យដល់រុស្ស៊ី ព្រមទាំងបានស្នើដល់កូរ៉េខាងជើងឲ្យបញ្ឈប់ការចរចានេះ ។ លោក KIRBY លាតត្រដាងថា ការសម្រេចបានកិច្ចព្រមព្រៀង នោះរុស្ស៊ីនឹងទទួលបានគ្រឿងសព្វាវុធក្នុងចំនួនច្រើន ពិសេសគ្រាប់កាំភ្លើងធំព្រមទាំងបណ្ដាវត្ថុធាតុដើមសម្រាប់ឧស្សាហកម្មយោធារុស្ស៊ី ។
តាមកាសែតញូវយ៉កថែមថា លោកគីម ជុងអ៊ុន នឹងធ្វើដំណើរទៅកាន់ក្រុងវ្ល៉ាឌីវ៉ូស្តុកជាប់ឆ្នេរសមុទ្រ ភាគខាងកើតរុស្ស៊ីតាមរថភ្លើងពាសដែក អំឡុងខែនេះ ដើម្បីជួបជាមួយលោកពូទីន ។ ការធ្វើដំណើរទៅកាន់បរទេសពិតជាកម្រណាស់សម្រាប់មេដឹកនាំកូរ៉េខាងជើង ។
ក្រៅពីការធ្វើដំណើរមកកាន់សិង្ហបុរីកាលពីឆ្នាំ២០១៨ និងមកវៀតណាមកាលពីឆ្នាំ២០១៩ ដើម្បីជួបគ្នាកំពូលជាមួយប្រធានាធិបតីអាមេរិកសម័យនោះ លោកដូណាល់ ត្រាំ លោកគីម ជុងអ៊ុន បានមកបំពេញទស្សនកិច្ចនៅចិនចំនួន៤លើក ។ លោកក៏ធ្លាប់មកជួបជាមួយលោកពូទីននៅវ្ល៉ាឌីវ៉ូស្តុក កាលពីឆ្នាំ២០១៩ដែរ ។ កាសែតញូវយ៉កថែមបញ្ជាក់ថា លោកពូទីនចង់បានជាពិសេសគ្រាប់កាំភ្លើងធំព្រមទាំងមីស៊ីលប្រឆាំងរថក្រោះពីកូរ៉េខាងជើង ៕
ចែករំលែកព័តមាននេះ