ខេត្តកំពង់ឆ្នាំង ៖ ប្រជាពលរដ្ឋក្នុងភូមិស្អង ឃុំប្រស្និប ស្រុករលាប្អៀរ មានការព្រួយបារម្ភខ្លាចបាត់បង់ដីចំនួន២០ហិកតាដែលបានវាស់ទៅឱ្យទីប្រឹក្សាជាន់ខ្ពស់ម្នាក់ដែលបានសន្យាដោះដូរនឹងការសាងសង់អគារសាលាមត្តេយ្យ១ខ្នងមាន៣បន្ទប់។ ប៉ុន្តែមកដល់ពេលនេះមានរយៈពេល៤ឆ្នាំហើយ អគារធ្វើបានត្រឹមតែប្រមាណ៥០ភាគរយប៉ុណ្ណោះ
ខេត្តកំពង់ឆ្នាំង ៖ ប្រជាពលរដ្ឋក្នុងភូមិស្អង ឃុំប្រស្និប ស្រុករលាប្អៀរ មានការព្រួយបារម្ភខ្លាចបាត់បង់ដីចំនួន២០ហិកតាដែលបានវាស់ទៅឱ្យទីប្រឹក្សាជាន់ខ្ពស់ម្នាក់ដែលបានសន្យាដោះដូរនឹងការសាងសង់អគារសាលាមត្តេយ្យ១ខ្នងមាន៣បន្ទប់។ ប៉ុន្តែមកដល់ពេលនេះមានរយៈពេល៤ឆ្នាំហើយ អគារធ្វើបានត្រឹមតែប្រមាណ៥០ភាគរយប៉ុណ្ណោះ ក៏មេម៉ាយដល់សព្វថ្ងៃ និងប្រែក្លាយជាបង្គន់អនាម័យទៅហើយ ។ ចំណែកឯដី២០ហិកតាត្រូវបានប្រជាពលរដ្ឋវាស់ធ្វើប្លង់កាត់ឱ្យលោកទីប្រឹក្សានោះរួចអស់ហើយ ។
លោកនូ ឆុន មេភូមិស្អងឱ្យដឹងថា នៅឆ្នាំ២០០៧គាត់បានជួបទីប្រឹក្សាម្នាក់(សុំមិនបញ្ចេញឈ្មោះ)។ កាលណោះលោកមេភូមិបានសុំអគារសាលាមត្តេយ្យ១ខ្នង ហើយលោកទីប្រឹក្សារូបនោះបានសួរវិញថា បើឱ្យអគារ១ខ្នងមាន៣បន្ទប់ តើមានអ្វីឱ្យវិញ។ ក្រោយមកលោកបានកោះហៅប្រជាពលរដ្ឋក្នុងភូមិស្អង ព្រមទាំងតាអាចារ្យ ព្រឹទ្ធាចារ្យក្នុងភូមិប្រជុំ ពិគ្រោះគ្នាក៏បានឯកភាពយកអគារសាលាមត្តេយ្យ១ខ្នង មានទទឹង៩ម៉ែត្រ បណ្តោយ២៩ម៉ែត្រ ចែកចេញជា៣បន្ទប់ធ្វើពីបេតុងប្រក់ក្បឿងជាថ្នូរនឹងឱ្យដីរួមភូមិចំនួន២០ហិកតា ទៅទីប្រឹក្សាម្នាក់នោះ។
ប្រភពព័ត៌មានបន្តថា ក្រោយពីមានការឯកភាពគ្នា ដូច្នេះហើយប្រជាពលរដ្ឋក៏បានវាស់វែងដី២០ហិកតាបោះបង្គោល និងធ្វើប្លង់ទៅឱ្យទីប្រឹក្សានោះ ហើយទីប្រឹក្សានោះបានដឹកសម្ភារសំណង់ចាប់ផ្តើមសាងសង់ពីពេលនោះមកដែរ។ ប៉ុន្តែការសាងសង់បានតែប្រមាណ៥០ភាគរយក៏នៅមេម៉ាយមកដល់សព្វថ្ងៃនេះ។
លោកខៀវ ភឿន មេឃុំប្រស្និបមានប្រសាសន៍ថា ដី២០ហិកតា និងអគារសិក្សាមួយខ្នងនោះមិនមែនជាការដោះដូរគ្នាទេ ។ ការសាងសង់អគារគឺជាលុយសប្បុរសជនក្រៅប្រទេស ចំណែកមេការដែលសាងសង់អគារនោះបានបោកទីប្រឹក្សាដែរ គឺបោកយកលុយហើយរត់ចោលការសាងសង់ ដូច្នេះលោកទីប្រឹក្សាក៏ចាញ់បោកមេជាងដែរ។
លោកឈឹម វុទ្ធា អភិបាលស្រុករលាប្អៀរប្រាប់កោះសន្តិភាពតាមទូរស័ព្ទថា រឿងធ្វើអគារសិក្សានោះ គឺគេគង់តែធ្វើទេ គ្រាន់តែយូរឬឆាប់ប៉ុណ្ណោះ។ ចំណែករឿងដោះដូរដី២០ហិកតានោះ លោកមិនច្បាស់ទេ ទាល់តែសួរលោកពេជ សម្បត្តិ អភិបាលស្រុកចាស់ទើបដឹង។
តាមប្រភពព័ត៌មានក្រៅផ្លូវការថា លុយសាងសង់អគារ១ខ្នងនោះជាលុយរបស់សប្បុរសជនក្រៅប្រទេសជួយក្នុងនាមមនុស្សធម៌ មិនមែនជាការដោះដូរយកដីធ្លីឡើយ ប៉ុន្តែសម្រាប់លោកទីប្រឹក្សាបែរជាយកមកដោះដូរដី២០ហិកតាពីប្រជាពលរដ្ឋទៅវិញ ។ មកដល់ពេលនេះទាំងមេភូមិ មេឃុំមិនអាចទាក់ទងទៅលោកទីប្រឹក្សានោះបានទេ សូម្បីតែតាមទូរស័ព្ទក៏ដោយ។
ប្រជាពលរដ្ឋក៏ដូចជាអាជ្ញាធរមូលដ្ឋានបាននិយាយថា បើអគារសិក្សានោះមិនហើយទេ ដីចំនួន២០ហិកតានោះ គឺពួកគាត់ក៏មិនឱ្យដែរ។ ពួកគាត់និយាយថា បើយកដី២០ហិកតាលក់ឱ្យគេ ហើយយកលុយមកសាងសង់អគារខ្លួនឯងវិញបានដល់ទៅ២ខ្នងឯណោះ។ ប្រជាពលរដ្ឋសំណូមពរថ្នាក់លើឱ្យជួយផង ពិសេសលោកទីប្រឹក្សានោះសុំមកជួយធ្វើអគារឱ្យហើយផង ចំណែកដីដែលសន្យាឱ្យនៅតែឱ្យដដែលទេ សុំឱ្យតែហើយអគារសិក្សា៕
ចែករំលែកព័តមាននេះ