ខេត្តតាកែវ ៖ ក្មេងទំនើងចំនួន៣នាក់ ត្រូវបានកម្លាំងអាវុធហត្ថខេត្តតាកែវចាប់ខ្លួនបាន ខណៈដែលក្រុមក្មេងទំនើងទាំងនេះបានបង្កហិង្សាដោយដេញវាយគ្នា នៅខាងមុខស្ថានីយប្រេងសាំងស៊ូគីមិចតោ២ ស្ថិតក្នុងក្រុងដូនកែវ ។ ករណីបង្ក្រាបក្មេងទំនើងនេះ ដោយទទួលបទបញ្ជាយ៉ាងម៉ឺងម៉ាត់ពីលោកឧត្តមសេនីយ៍ត្រី…
ខេត្តតាកែវ ៖ ក្មេងទំនើងចំនួន៣នាក់ ត្រូវបានកម្លាំងអាវុធហត្ថខេត្តតាកែវចាប់ខ្លួនបាន ខណៈដែលក្រុមក្មេងទំនើងទាំងនេះបានបង្កហិង្សាដោយដេញវាយគ្នា នៅខាងមុខស្ថានីយប្រេងសាំងស៊ូគីមិចតោ២ ស្ថិតក្នុងក្រុងដូនកែវ ។
ករណីបង្ក្រាបក្មេងទំនើងនេះ ដោយទទួលបទបញ្ជាយ៉ាងម៉ឺងម៉ាត់ពីលោកឧត្តមសេនីយ៍ត្រី សេង មហា មេបញ្ជាការកងរាជអាវុធហត្ថខេត្តតាកែវ និងមានការសម្របសម្រួលនីតិវិធីពីលោក ទៀវ ពណ្ណរាយ ព្រះរាជអាជ្ញារង អមសាលាដំបូងខេត្តតាកែវ នៅវេលាម៉ោង២១ និង៣០នាទីថ្ងៃទី០២ ខែកញ្ញា ឆ្នាំ២០២៣ ។
លោកវរសេនីយ៍ឯក ង៉ែត ចាន់ធី មេបញ្ជាការរងខេត្ត បានដឹកនាំកម្លាំងជំនាញមន្ទីរស្រាវជ្រាវ និងបង្ក្រាបបទល្មើស សហការជាមួយកម្លាំងមូលដ្ឋានក្រុងដូនកែវ ចុះបង្ក្រាបជាក់ស្តែង ទៅលើក្រុមក្មេងទំនើង ដែលបង្កករណីហិង្សាដោយចេតនាមានស្ថានទម្ងន់ទោស នៅចំណុចមុខការ៉ាស់សាំងសូគីម៉ិច(តោពីរ) ស្ថិតនៅភូមិផ្សារតាកោ សង្កាត់រកាក្នុង ក្រុងដូនកែវ ខេត្តតាកែវ កម្លាំងយើងបានដេញ និងឃាត់ខ្លួនជនសង្ស័យបាននៅមុខការ៉ាស់សាំង ភី-ធី-ធី (រង្វង់មូលអូរចំបក់) ស្ថិតក្នុងភូមិខ្សឹង សង្កាត់រកាក្នុង ក្រុងដូនកែវ ខេត្តតាកែវ ។
ជនសង្ស័យទាំង៣នាក់ ១-ឈ្មោះ សឿន ខេមរីន ភេទប្រុស អាយុ១៩ឆ្នាំ មុខរបរមិនពិតប្រាកដ រស់នៅភូមិក្ដុល ឃុំលំចង់ ស្រុកសំរោង ខេត្តតាកែវ ។ ២-ឈ្មោះ ឆេង ពៅតារាពេជ្រ ភេទប្រុស អាយុ២០ឆ្នាំ មុខរបរជាងជួសជុលម៉ូតូ រស់នៅភូមិពីរ សង្កាត់រកាក្នុង ក្រុងដូនកែវ ខេត្តតាកែវ ។ ៣-ឈ្មោះ ហេង ចុងពេជ្រសុវណ្ណ ភេទប្រុស អាយុ១៧ឆ្នាំ មុខរបរមិនពិតប្រាកដ រស់នៅភូមិស្នោរ សង្កាត់រកាក្នុង ក្រុងដូនកែវ ខេត្តតាកែវ ។
វត្ថុតាងចាប់យករួមមាន ១-ទូរស័ព្ចដៃចំនួន០២គ្រឿង , ២-ម៉ូតូម៉ាកហុងដាC125ចំនួន០២គ្រឿង
(ពណ៌ខ្មៅ ស៊េរី០១៩ ពាក់ស្លាកលេខតាកែវ1T-5785,ពណ៌ខ្មៅ និងសេរី២០២៣ ពាក់ស្លាកលេខតាកែវ1AC.1022) ។ ៣-ដាវ០១ដើម ប្រវែង០,៦៧ម៉ែត្រ និងរណាអាដែក០១ដើម និង៤-កាបូបស្ពាយ០១ (ពណ៌ខ្មៅ)។
នៅចំពោះមុខកំលាំងជំនាញ ក្រុមក្មេងទំនើងបាននិយាយសារភាពថា ពួកគេពិតជាបានបង្កហិង្សាដោយដេញវាយគ្នាពិតប្រាកដមែន ។ ហើយនៅពេលនេះ ក្រុមក្មេងទំនើងត្រូវបានការិយាល័យជំនាញកំពុងកសាងសំណុំរឿងបញ្ជូនជនសង្ស័យ និងវត្ថុតាងទៅអយ្យការអមសាលាដំបូងខេត្តតាកែវចាត់ការតាមនីតិវិធីច្បាប់នៅថ្ងៃទី៣ កញ្ញា ២០២៣ នេះ ។
ចែករំលែកព័តមាននេះ