មហាជនហួសចិត្តពេលឃើញឈ្មួញវៀតណាមឆ្លងដែនចូលមកបើកបារ៉ាស់សមត្ថកិច្ចនគរបាលកម្ពុជា ការពារព្រំដែនកំពោតទូកដោយខ្លួនឯង ហើយបើករថយន្តចំនួន១០គ្រឿងចូលមកដឹកសត្វជ្រូករស់ប្រមាណជាង៣.០០០ក្បាលឆ្លងដែនទៅប្រទេសវៀតណាម
ខេត្តស្វាយរៀង ៖ មហាជនហួសចិត្តពេលឃើញឈ្មួញវៀតណាមឆ្លងដែនចូលមកបើកបារ៉ាស់សមត្ថកិច្ចនគរបាលកម្ពុជា ការពារព្រំដែនកំពោតទូកដោយខ្លួនឯង ហើយបើករថយន្តចំនួន១០គ្រឿងចូលមកដឹកសត្វជ្រូករស់ប្រមាណជាង៣.០០០ក្បាលឆ្លងដែនទៅប្រទេសវៀតណាមយ៉ាងរលូន ពុំឃើញមានសមត្ថកិច្ចខ្មែរណាម្នាក់មកក្បែរឡើយ។
ហើយករណីខាងលើនេះ កើតឡើងនៅវេលាម៉ោង៨និង១០នាទីយប់ រហូតដល់ម៉ោង១និង៣០នាទីយប់រំលងអធ្រាត្រ និងមានទំនិញខោអាវជជុះ គ្រឿងអេឡិកត្រូនិច ដឹកតាមរថយន្តយីឌុបជាច្រើនគ្រឿងផ្សេងទៀត ឆ្លងដែនទៅប្រទេសវៀតណាមយ៉ាងរលូនដែរ។
បើតាមសមត្ថកិច្ចបានបង្ហើបឲ្យដឹងថា ករណីឈ្មួញវៀតណាម ឆ្លងដែនចូលមកបើកបារ៉ាស់សមត្ថកិច្ចនគរបាលការពារព្រំដែនកំពោតទូកនេះ កើតឡើងកាលពីវេលាម៉ោង០៨និង១៥នាទីយប់ ថ្ងៃទី២ ខែកញ្ញា ឆ្នាំ២០២៣ រហូតដល់ម៉ោង១និង៣០នាទីយប់រំលងអធ្រាត្រឈានចូលថ្ងៃទី៣ ខែកញ្ញា ឆ្នាំ២០២៣ នៅចំណុចច្រករបៀងកំពោតទូក ស្ថិតនៅក្នុងភូមិកំពោតទូក ឃុំគគីរសោម ស្រុកស្វាយទាប។
បើតាមប្រជាពលរដ្ឋរស់នៅជាប់ផ្លូវប្រឡាយកំពោតទូក បានប្រាប់អ្នកសារព័ត៌មានយើងឲ្យដឹងថា ក្នុងរយៈពេលមួយខែ មកដល់ខែកញ្ញា ឆ្នាំ២០២៣នេះ គឺមានឈ្មួញនាំសត្វជ្រូករស់ ដឹកឆ្លងដែនទៅប្រទេសវៀតណាមរាល់យប់ ជាទូទៅគឺចាប់ពីម៉ោង១១យប់ ឬម៉ោង១២យប់រំលងអធ្រាត្រ។ ហើយចាប់ពីយប់ថ្ងៃទី១ ខែកញ្ញា ឆ្នាំ២០២៣នេះ យួនសម្រុកមកទិញជ្រូករស់ពីក្រុមហ៊ុនខ្មែរ មានងារជាឧកញ៉ាម្នាក់ ដឹកក្នុង១យប់ៗចំនួន១០គ្រឿង យប់ខ្លះទៀត១៥គ្រឿង ដោយក្នុង១គ្រឿងចំនួន៣៥០ក្បាល ដឹកយកទៅផ្ទេរដាក់រថយន្តឲ្យឈ្មួញវៀតណាមនៅលើផ្លូវខ្សែក្រវ៉ាត់ព្រំដែនខាងលិចប៉ុស្តិ៍ច្រករបៀងកំពោតទូក ចម្ងាយ៣០០ម៉ែត្រ រួចដឹកតាមរថយន្តបន្តចូលទៅប្រទេសវៀតណាមតែម្ដង។
មហាជនបានឲ្យដឹងទៀតថា ក្រៅពីសត្វជ្រូករស់ ក៏មានឈ្មួញដឹកទំនិញជាច្រើនគ្រឿងក្នុង១យប់ៗ គឺចាប់ពី១០គ្រឿងទៅ១៥គ្រឿងបង្កសម្លេងឮរំខានដល់ការរស់នៅរបស់ប្រជាពលរដ្ឋ ដែលរស់នៅតាមដងផ្លូវ គឺដេកមិនបានឡើយ។
ប្រភពដដែលបន្តទៀតថា កាលពីវេលាម៉ោង០៨និង១៥នាទីយប់ ថ្ងៃទី១ និងថ្ងៃទី២ និងវេលាម៉ោង១និង៣០នាទីរំលងអធ្រាត្រឈានចូលថ្ងៃទី៣ ខែកញ្ញា ឆ្នាំ២០២៣នេះ មានរថយន្តវៀតណាមចំនួន០៥គ្រឿង ដឹកទំនិញពីប្រទេសវៀតណាមចូលមកស្រុកខ្មែរ តាមច្រករបៀងកំពោតទូក យកមកផ្ទេរនៅផ្ទះឈ្មួញខ្មែរម្នាក់ នៅចំណុចកែងផ្លូវកៅស៊ូ ស្ថិតក្នុងភូមិត្រពាំងតាអី ឃុំព្រៃតាអី ស្រុកស្វាយទាប។ ចំណែករថយន្តវៀតណាម១០គ្រឿងទៀត ចូលមកយកទំនិញពីឈ្មួញខ្មែរ មានដូចជា ៖ គ្រឿងអេឡិចត្រូនិច និងខោអាវជជុះ នៅត្រង់ចំណុចភូមិអង្គម ឃុំគគីរសោម ស្រុកស្វាយទាប គឺផ្ទេរទំនិញពីរថយន្តខ្មែរដាក់លើរថយន្តវៀតណាម រួចដឹកឆ្លងដែនទៅប្រទេសវៀតណាម សរុបប្រមាណជិត៣០គ្រឿង គ្មានការរំខានដល់សមត្ថកិច្ចនោះទេ សង្ស័យត្រូវសំណែនឈ្មួញហើយ ទើបសមត្ថកិច្ចការពារព្រំដែនដេកលក់អស់។
ករណីខាងលើនេះដែរ មិនអាចទំនាក់ទំនងសុំការបំភ្លឺពីលោកមេប៉ុស្តិ៍នគរបាលច្រកកំពោតទូក បានទេ ដោយមានតែប៉ុស្តិ៍គ្មានមន្ត្រីប្រចាំការ បើកដៃឲ្យឈ្មួញវៀតណាមមកបើកបារ៉ាស់ខ្លួនឯងយ៉ាងរំភើយ។
បើតាមមន្ត្រីនគបាលម្នាក់សុំមិនបញ្ចេញឈ្មោះ បានបង្ហើបឲ្យដឹងថា ប៉ុស្តិ៍ច្រករបៀងកំពោតទូកនេះ ក្រោមការគ្រប់គ្រងដោយមេប៉ុស្តិ៍ច្រកទ្វារតំបន់ព្រំដែនព្រៃតាអី ក៏ប៉ុន្តែអ្នកសារព័ត៌មានយើងមិនអាចរកការបំភ្លឺបានទេ រហូតមកដល់ល្ងាចថ្ងៃទី០៣ ខែកញ្ញា ឆ្នាំ២០២៣នេះ ដោយសារទូរស័ព្ទចូលហើយ គ្មានមនុស្សលើក។
ចំណែក លោក ប៉ែន ចន្ធី ប្រធានការិយាល័យផលិតកម្ម និងបសុព្យាបាល នៃមន្ទីរកសិកម្ម រុក្ខាប្រម៉ាញ់ និងនេសាទខេត្តស្វាយរៀង មិនអាចរកការបំភ្លឺបានទេ ទូរសព្ទ័ចូលហើយ គ្មានអ្នកលើក។
ទាក់ទិនករណីខាងលើនេះដែរ លោក សុក សុទ្ធាវុធ ប្រធានមន្ទីរកសិកម្ម រុក្ខាប្រម៉ាញ់ និងនេសាទខេត្តស្វាយរៀង បានប្រាប់កោះសន្តិភាពតាមទូរស័ព្ទថា លោកមិនបានដឹងទេ ករណីឈ្មួញនាំសត្វជ្រូករស់ឆ្លងដែនទៅប្រទេសវៀតណាមនេះ ចាំស្អែកលោកចាត់ឱ្យមន្ត្រីចុះធ្វើការស្រាវជ្រាវ។
ចំណែកមន្ត្រីនគរបាលម្នាក់សុំមិនបញ្ចេញឈ្មោះ បានបង្ហើបឲ្យដឹងថា មានក្រុមហ៊ុនមួយ គេមានច្បាប់នាំសត្វជ្រូករស់ពីប្រទេសថៃ ឆ្លងកាត់កម្ពុជា រួចឆ្លងដែនទៅប្រទេសវៀតណាម ក៏ប៉ុន្តែមិនបានដឹងច្បាស់ថា តើក្រុមហ៊ុននោះឈ្មោះអ្វីទេ?
ព័ត៌មានបន្ថែមនឹងមានផ្សាយជូននៅលើកាសែតកោះសន្តិភាព៕
ចែករំលែកព័តមាននេះ