ឈ្មួញនាំសត្វជ្រូករស់ប្រមាណជាង៦០០ក្បាលឆ្លងដែនទៅប្រទេសវៀតណាម តាមច្រករបៀងកំពោតទូក នៅពេលយប់កណ្តាលអធ្រាត្រ និងមានទំនិញខោអាវជជុះ ព្រមទាំងគ្រឿងអេឡិកត្រូនិច ក៏ដឹកតាម
ខេត្តស្វាយរៀង ៖ ឈ្មួញនាំសត្វជ្រូករស់ប្រមាណជាង៦០០ក្បាលឆ្លងដែនទៅប្រទេសវៀតណាម តាមច្រករបៀងកំពោតទូក នៅពេលយប់កណ្តាលអធ្រាត្រ និងមានទំនិញខោអាវជជុះ ព្រមទាំងគ្រឿងអេឡិកត្រូនិច ក៏ដឹកតាមរថយន្តយីឌុបប្រមាណជា១៥គ្រឿងឆ្លងដែនទៅប្រទេសវៀតណាមយ៉ាងរលូនផងដែរ ដោយពុំមានរំខានដល់សមត្ថកិច្ចណាម្នាក់ឡើយ ចំណែកជ្រូករស់ពីថៃច្រើនទៀតបានចែកចាយតាមបណ្ដាខេត្ត និងភ្នំពេញ។
ករណីខាងលើនេះ បានកើតឡើងកាលពីវេលាម៉ោង១២និង១៥នាទីយប់រំលងអធ្រាត្រឈានចូលថ្ងៃទី៣១ ខែសីហា ឆ្នាំ២០២៣ នៅចំណុចច្រករបៀងកំពោតទូក ស្ថិតក្នុងភូមិកំពោតទូក ឃុំគគីរសោម ស្រុកស្វាយទាប។
បើតាមប្រជាពលរដ្ឋរស់នៅជាប់ផ្លូវប្រឡាយកំពោតទូក បានប្រាប់អ្នកសារព័ត៌មានយើងឲ្យដឹងថា ក្នុងរយៈពេលមួយខែសីហា ឆ្នាំ២០២៣នេះ គឺមានឈ្មួញនាំសត្វជ្រូករស់ ដឹកឆ្លងដែនទៅប្រទេសវៀតណាមស្ទើរតែរាល់យប់។ ជាទូទៅ គឺចាប់ពីម៉ោង១១យប់ ឬម៉ោង១២យប់រំលងអធ្រាត្រ ដោយយប់ខ្លះ០២ឡាន យប់ខ្លះទៀត០៣គ្រឿង ហើយក្នុង១គ្រឿង គឺដឹកជ្រូក៣៥០ក្បាលឯណោះ។ រថយន្តយីឌុបនោះបានដឹកជ្រូកយកទៅផ្ទេរដាក់លើរថយន្តឲ្យឈ្មួញវៀតណាមនៅលើផ្លូវខ្សែក្រវ៉ាត់ព្រំដែនខាងលិចប៉ុស្តិ៍ច្រករបៀងកំពោតទូក មានចម្ងាយ៣០០ម៉ែត្រ រួចដឹកតាមរថយន្តបន្តចូលទៅប្រទេសវៀតណាមតែម្ដង។
មហាជនបានឲ្យដឹងទៀតថា ក្រៅពីសត្វជ្រូករស់ ឈ្មួញក៏មានដឹកទំនិញជាច្រើនគ្រឿងក្នុង១យប់ៗ គឺចាប់ពី១០គ្រឿងទៅ១៥គ្រឿងបង្កឱ្យមានសម្លេងឮរំខានដល់ការរស់នៅរបស់បងប្អូនប្រជាពលរដ្ឋនៅតាមដងផ្លូវ ដោយដេកមិនបាននោះទេ។
ប្រភពដដែលបន្តទៀតថា កាលពីវេលាម៉ោង១១និង០០នាទីយប់ ថ្ងៃទី៣០ ខែសីហា ឆ្នាំ២០២៣ រហូតដល់ម៉ោង១២និង៣០នាទីរំលងអធ្រាត្រឈានចូលថ្ងៃទី៣១ ខែសីហា ឆ្នាំ២០២៣ មានរថយន្តវៀតណាមចំនួន០៥គ្រឿងដឹកទំនិញពីប្រទេសវៀតណាមចូលមកស្រុកខ្មែរ តាមច្រករបៀងកំពោតទូក ដោយយកមកផ្ទេរនៅផ្ទះឈ្មួញខ្មែរម្នាក់ (សុំមិនបញ្ចេញឈ្មោះ) នៅចំណុចកែងផ្លូវកៅស៊ូ ស្ថិតក្នុងភូមិត្រពាំងតាអី ឃុំព្រៃតាអី ស្រុកស្វាយទាប។
ប្រភពដដែលបន្តទៀតថា ចំណែករថយន្តវៀតណាម១០គ្រឿងទៀតចូលមកយកទំនិញពីឈ្មួញខ្មែរ មានដូចជា ៖ គ្រឿងអេឡិចត្រូនិច និងខោអាវជជុះ នៅត្រង់ចំណុចភូមិអង្គម ឃុំគគីរសោម ស្រុកស្វាយទាប គឺផ្ទេរទំនិញពីរថយន្តខ្មែរដាក់លើរថយន្តវៀតណាម រួចដឹកឆ្លងដែនទៅប្រទេសវៀតណាម ដោយគ្មានរំខានដល់សមត្ថកិច្ចនោះទេ សង្ស័យតែត្រូវសំណែនឈ្មួញហើយ ទើបសមត្ថកិច្ចការពារព្រំដែនដេកលក់អស់។
ប្រភពបន្តទៀតថា ឈ្មួញបើករថយន្តដឹកទំនិញ១យប់ទល់ភ្លឺមិនអស់ រហូតដល់ម៉ោង១២និង១៥នាទីថ្ងៃត្រង់ គេក៏ឃើញរថយន្តវៀតណាម០៣គ្រឿង បានបើកពីប្រទេសវៀតណាម ឆ្លងដែនចូលមកតាមច្រករបៀងកំពោតទូក រួចចូលមកភូមិអង្គម ចំនួន២គ្រឿងផ្ទេរទំនិញក្រណាត់ខោអាវ ហើយដឹកចេញទៅប្រទេសវៀតណាមវិញ កាលពីវេលាម៉ោង៣និង៤៣នាទីរសៀល យ៉ាងរំភើយ។ ចំណែករថយន្ត១គ្រឿងទៀត ដឹកទំនិញគ្រឿងចាប់ហួយ ទៅផ្ទេរឲ្យឈ្មួញខ្មែរនៅចំណុចថ្នល់កែង ស្ថិតនៅក្នុងភូមិត្រពាំងតាអី ឃុំព្រៃតាអី រួចដឹកបន្តចេញទៅរាជធានីភ្នំពេញ។
ទាក់ទងករណីខាងលើនេះដែរ មិនទាន់អាចទំនាក់ទំនងសុំការបំភ្លឺពីលោកមេប៉ុស្តិ៍នគបាលច្រកទ្វារតំបន់ព្រំដែនព្រៃតាអី បានទេ រហូតមកដល់ល្ងាចថ្ងៃទី៣១ ខែសីហា ឆ្នាំ២០២៣នេះ ដោយសារទូរសព្ទ័ចូលហើយ តែគ្មានមនុស្សលើក។
ចំណែកលោក ឈិន សៅ មន្ត្រីការិយាល័យផលិតកម្ម និងបសុព្យាបាលនៃមន្ទីរកសិកម្ម រុក្ខាប្រម៉ាញ់ និងនេសាទខេត្តស្វាយរៀងវិញ បានប្រាប់កោះសន្តិភាពតាមទូរស័ព្ទឱ្យដឹងថា លោកមិនបានដឹងទេ ករណីឈ្មួញនាំសត្វជ្រូករស់ឆ្លងដែនទៅប្រទេសវៀតណាមនេះ។
រីឯមន្ត្រីនគរបាលម្នាក់ទៀត សុំមិនបញ្ចេញឈ្មោះ បានបង្ហើបឲ្យដឹងថា មានក្រុមហ៊ុនមួយ គេមានច្បាប់នាំសត្វជ្រូករស់ពីប្រទេសថៃឆ្លងកាត់កម្ពុជា រួចឆ្លងដែនទៅប្រទេសវៀតណាម។ ក៏ប៉ុន្តែមិនបានដឹងច្បាស់ថា តើក្រុមហ៊ុននោះឈ្មោះអ្វីទេ? ដែលតាមដំណឹងថា ក្រសួងកសិកម្មខ្មែរ បានយល់ព្រមឱ្យនាំជ្រូក៦ម៉ឺនក្បាលពីប្រទេសថៃ ឆ្លងកាត់កម្ពុជាទៅវៀតណាម ប៉ុន្តែមានជ្រូកថៃច្រើនណាស់ត្រូវក្រុមហ៊ុនមួយនេះ លក់ចែកចាយនៅក្នុងស្រុក ហើយទុកខ្លះនាំទៅស្រុកយួន គ្រាន់តែល្អមើលប៉ុណ្ណោះ ។
មិនអាចសុំការបំភ្លឺបានទេ ពីក្រុមហ៊ុនដែលនាំជ្រូកចូលពីប្រទេសថៃ ។
ព័ត៌មានបន្ថែមនឹងមានផ្សាយជូននៅលើកាសែតកោះសន្តិភាព៕
ចែករំលែកព័តមាននេះ