មនុស្សយ៉ាងហោចណាស់៧០នាក់ស្លាប់ និងជាង៨០នាក់ទៀតរងរបួសនៅក្នុងការវាយប្រហារអត្តឃាតដោយការបំផ្ទុះគ្រាប់បែក២លើកកើតឡើងដំណាលគ្នាកាលពីព្រឹកថ្ងៃទី១៣ ឧសភា នៅជំរំហ្វឹកហ្វឺនយោធាមួយនៅក្នុងទីក្រុង Charsadda ចម្ងាយប្រហែល៣០គីឡូម៉ែត្រ ភាគឦសានក្រុងប៉េសាវ៉ា ភាគពាយ័ព្យប្រទេសប៉ាគីស្ថាន ។ ប៉ូលិសក្រុង Charsadda ឱ្យដឹងថា ការវាយប្រហារដោយការបំផ្ទុះគ្រាប់បែកនោះបណ្តាលឱ្យស្លាប់មនុស្សយ៉ាងតិច៧០នាក់ និងជាង៨០នាក់ទៀតរងរបួស ហើយថា ចំនួនអ្នកស្លាប់អាចកើនឡើងថែមទៀតដោយសារនៅមន្ទីរពេទ្យក្នុងក្រុងនេះខ្វះគ្រឿងបរិក្ខារ ពេទ្យ។
របាយការណ៍មួយឱ្យដឹងថា អ្នករបួសមួយចំនួនក្នុងចំណោមអ្នករបួសទាំងនោះត្រូវបានផ្ទេរទៅព្យាបាលនៅមន្ទីរពេទ្យក្រុងប៉េសាវ៉ា។
តាមបណ្តាញព័ត៌មានក្នុងស្រុកមួយរាយការណ៍ថា ការវាយប្រហារអត្តឃាតនោះកើតឡើងនៅពេលរទេះសេះមួយដែលមានបង្កប់គ្រឿងផ្ទុះត្រូវបានបំផ្ទុះ នៅជំរំហ្វឹកហ្វឺនយោធានៅតំបន់មួយក្នុងទីក្រុងនោះ ។ ការវាយប្រហារនោះកើតឡើងនៅពេលបុគ្គលិកយោធាការពារព្រំដែនកំពុងធ្វើដំណើរត្រឡប់ពីការហាត់ប្រាណពេលព្រឹកវិញ ។
ក្រោយពីការវាយប្រហារដោយការបំផ្ទុះគ្រាប់បែក ប៉ូលិសបានបិទតំបន់នោះមិនឱ្យមនុស្សចូល ហើយអ្នកកាសែតក៏មិនឱ្យចូលកន្លែងកើតហេតុដែរ ។ តាមសេចក្តីរាយការណ៍ឱ្យដឹងទៀតថា ការវាយប្រហារនោះក៏បណ្តាលឱ្យតូបលក់ទំនិញ១៥កន្លែង និងរថយន្តជាច្រើនគ្រឿងរងការបំផ្លិចបំផ្លាញទាំងស្រុងផងដែរ។
ការវាយប្រហារនោះជាការវាយប្រហារអត្តឃាតធ្ងន់ធ្ងរបំផុត នៅប្រទេសប៉ាគីស្ថានក្រោយពីការស្លាប់របស់មេដឹកនាំភេរវកម្មអាល់កៃដា អូសាម៉ា ប៊ីនឡាដេន ដោយកងកុំម៉ង់ដូពិសេសអាមេរិកកាលពីដើមខែឧសភានេះ ។
ពួកតាលីបង់ប៉ាគីស្ថានអះអាងទទួលខុសត្រូវចំពោះការវាយប្រហារនេះថា ជាការសងសឹកឱ្យការស្លាប់របស់អូសាម៉ា ប៊ីនឡាដេន ។
នាយករដ្ឋមន្ត្រីប៉ាគីស្ថាន លោកសាយីដ យូ ស៊ូហ្វ រ៉ាហ្សា ហ្គីឡានី បានថ្កោលទោសយ៉ាងខ្លាំងចំពោះការវាយប្រហារនោះ ៕
ចែករំលែកព័តមាននេះ