ខេត្តព្រៃវែង ៖ ករណីគ្រោះថ្នាក់ចរាចរណ៍រវាងរថយន្តនិងម៉ូតូមួយដែលបានកើតឡើងក្នុងទឹកដីស្រុក
ខេត្តព្រៃវែង ៖ ករណីគ្រោះថ្នាក់ចរាចរណ៍រវាងរថយន្តនិងម៉ូតូមួយដែលបានកើតឡើងក្នុងទឹកដីស្រុកព្រះស្ដេច ខេត្តព្រៃវែង ភាគីអ្នករងគ្រោះមិនទាន់ទទួលបានការប៉ះប៉ូវ និងសំណងថ្លៃព្យាបាលរបួសនៅឡើយទេ ស្រាប់តែលោកវរៈសេនីយ៍ទោឯក ស៊ាង ហន អត្តលេខ១៣៧៤០ បាននាំកូនចៅទៅធ្វើឯកសារនៅប៉ុស្តិ៍ ហើយយកវត្ថុតាង (រថយន្ត) ចេញពីប៉ុស្តិ៍បាត់ទៅ ដែលសកម្មភាពនេះអាចបញ្ជាក់ឲ្យឃើញថា លោកអធិការរងរូបនេះអនុវត្តខុសនីតិវិធីទាំងស្រុង។ ស្របពេលដែលលោក ឯក ស៊ាងហន ហ៊ានធ្វើឯកសារ ហើយដោះលែងវត្ថុតាង(រថយន្ត)ទាំងដែលនីតិវិធីកំពុងធ្វើឡើងនៅការិយាល័យនគរបាលចរាចរណ៍ខេត្តព្រៃវែងនេះគឺភាគីខាងម៉ូតូពុំសុខចិត្តនោះទេ។
យោងតាមប្រភពពីមន្ត្រីនគរបាលចរាចរណ៍ខេត្តព្រៃវែងមួយរូបបានបង្ហើបផងដែរថា «កាលណារឿងអត់ទាន់ចប់ នគរបាលមិនអាចឲ្យភាគីណាមួយយកវត្ថុតាងនោះចេញពីកន្លែងរក្សាទុកបានឡើយ បើក្នុងដំណាក់កាលចរចាដែលមិនទាន់ទទួលសំណងគឺមន្ត្រីនគរបាលមិនអាចប្រគល់វត្ថុតាងឲ្យយកចេញតែម្ខាងបានដែរ តែបើរឿងនេះបញ្ជូនដល់តុលាការជាឆន្ទានុសិទ្ធិរបស់តុលាការ និយាយរួមកាលបើលោកអធិការរង ឯកស៊ាងហន ហ៊ានធ្វើឯកសារយកឡានចេញពីប៉ុស្តិ៍ហើយប្រគល់ឡានទៅឲ្យភាគីម្ចាស់ឡាននោះយកទៅប្រើប្រាស់វិញរឿងនេះគឺខុសនីតិវិធីទាំងស្រុង»។
តាមប្រភពបន្តថា រឿងនេះ ភាគីអ្នករងគ្រោះអាចស្នើសុំឲ្យសមត្ថកិច្ចយកវត្ថុតាងនោះត្រឡប់មកវិញ ហើយបញ្ចូនសំណុំរឿងនិងវត្ថុតាងទៅតុលាការដើម្បីតុលាការសម្រេចទើបត្រូវនីតិវិធីច្បាប់។ តែបើលេងផ្លូវកាត់ដូចលោក ឯក ស៊ាងហន អធិការរងនគរបាលស្រុកព្រះស្ដេចធ្វើនេះគឺខុសនីតិវិធីទាំងស្រុងហើយបើទោះបីជាអនុញាតិឲ្យយកម៉ូតូចេញមុនឡានក៏ខុសដែរ។
តាមប្រភពដដែលបន្តថារឿងនេះមិនមែនសុខៗលោកឯកស៊ាងហន ហ៊ានធ្វើនិងអត្តនោម័តដោយខ្លួនឯងបានទេ អាចមានការយល់ព្រមពីសំណាក់ថ្នាក់ដឹកនាំណាមួយទើបគាត់ហ៊ានធ្វើម្យ៉ាងទៀតគាត់ធ្វើប៉ូលីសយូរដែរហើយគាត់មិនមែនមិនដឹងពីនីតិវិធីនោះទេ។
ទាក់ទិនករណីនេះដែរតែញាតិជនរងគ្រោះក៏បានបង្ហើបប្រាប់ផងដែរថារឿងគ្រោះថ្នាក់ចរាចរណ៍នេះដំបូងឡើយភាគីរថយន្តសុំសងតែ 200 ដុល្លារទេមកភាគីម៉ូតូ តែដោយសារការចរចាមិនត្រូវគ្នា ភាគីម៉ូតូក៏បានស្នើសុំបញ្ជូនរឿងនេះទៅកាន់ការិយាល័យនគរបាលចរាចរណ៍ខេត្តដើម្បីដោះស្រាយដោយទុកវត្ថុតាងទាំងពីរនៅប៉ុស្តិ៍នគរបាលរដ្ឋបាលរំចេក អំឡុងពេលចរចានៅខេត្តនាថ្ងៃទី 2 ខែសីហាឆ្នាំ 2023 ភាគីរថយន្តបានបន្ថែមឲ្យបានចំនួន 2 លានរៀលខណៈភាគីម៉ូតូស្នើសុំ 8 លានរៀលតែមិនត្រូវគ្នា បន្ទាប់មកភាគីរថយន្តបានឡើងដល់ 5 លានរៀល។
ក្រោយមក ស្រាប់តែភាគីម៉ូតូបានទទួលដំណឹងថាលោកវរៈសេនីយ៍ទោ ឯក ស៊ាងហន បាននាំកូនចៅក្រោមឱវាទធ្វើដំណើរទៅកាន់ប៉ុស្តិ៍នគរបាលរដ្ឋបាលរំចេក ហើយធ្វើឯកសារយកឡានចេញពីប៉ុស្តិ៍បាត់ទៅហើយ ដោយប្រាប់ខាងប៉ុស្តិ៍ថាយកទៅទុកនៅការិយាល័យនគរបាលចរាចរណ៍ខេត្ត។
បន្ទាប់ពីទទួលបានដំណឹងថាលោកវរសេនីយ៍ទោ ឯក ស៊ាងហន យកឡានចេញពីកន្លែងរក្សាទុកនៅប៉ុស្តិ៍មក ភាគីម៉ូតូបានទំនាក់ទំនងសួរទៅលោកវរសេនីយ៍ត្រី សួន ពន្លក នាយរងការិយាល័យនគរបាលចរាចរណ៍ខេត្តថាមានបានឃើញរថយន្តដែលខាងស្រុកព្រះស្ដេចយកទៅទុកនៅខេត្តដែរឬទេពេលនោះលោកវរសេនីយ៍ត្រី សួនពន្លក បានប្រាប់មកវិញថារថយន្តគេមិនបានយកមកទុកនៅខេត្តនោះទេគឺយកទៅទុកនៅស្រុកព្រះស្ដេចឯណោះ។
ដោយមិនអស់ចិត្ត ភាគីម៉ូតូបានទៅជួបជាមួយលោកវរៈសេនីយ៍ត្រី អឹម សុភាព នាយប៉ុស្តិ៍នគរបាលរដ្ឋបាលរំចេកដោយលោកបានប្រាប់ថា កាលពីកន្លះខែមុនលោកវរសេនីយ៍ទោ ឯក ស៊ាងហន បាននាំកម្លាំងក្រោមឱវាទមកធ្វើឯកសារយករថយន្តទៅរក្សាទុកនៅអធិការដ្ឋានស្រុកបាត់ហើយ ដោយប្រាប់លោកថាការចរចាបានត្រូវគ្នាហើយ។ព្រោះតែមានការសង្ស័យភាគីម៉ូតូបានទូរស័ព្ទជួបជាមួយលោកវរសេនីយ៍ត្រី សួនពន្លក ដោយលោកបានបញ្ជាក់ប្រាប់ថាឡានយកទៅរក្សាទុកនៅអធិការដ្ឋាននគរបាលស្រុកព្រះស្ដេចស្របពេលនោះផងដែរភាគីម៉ូតូក៏បានធ្វើដំណើរទៅកាន់អធិការដ្ឋាននគរបាលស្រុកព្រះស្ដេចតែពុំបានឃើញរថយន្តនៅទីនោះទេ ។ ពេលដែលដឹងថាភាគីម៉ូតូបានទៅដល់អធិការដ្ឋាននគរបាលស្រុកព្រះស្ដេចលោកវរសេនីយ៍ទោឯក ស៊ាងហន ស្ទុះស្ទាចាប់ទូរស័ព្ទ ហើយហៅឲ្យម្ចាស់រថយន្តបើករថយន្តយកមកទុកនៅជិតកន្លែងបន្ទប់របស់លោកស្នាក់នៅទៅវិញ។
ក្នុងពេលនោះផងដែរ លោកឯក ស៊ាងហន បានតឿនឲ្យអ្នកបើកបររថយន្តបើករថយន្តយកមកទុកនៅក្នុងអធិការស្រុកឲ្យលឿនជាទីបំផុត។តែទោះបីជាធ្វើយ៉ាងនេះក៏ដោយកភាគីសាច់ញាតិម៉ូតូបានផ្តិតយករូបភាពទាំងការបើករថយន្តចូលនិងបើកយកមកចតតាំងពីមុខផ្លូវថ្នល់រហូតដល់ក្នុងបរិវេណអធិការដ្ឋាននគរបាលស្រុកព្រះស្ដេច ។មានការលើកឡើងជាសំណួរថារឿងនេះប៉ះលើគ្រួសារអ្នករាជការដែរចុះបើប៉ះលើប្រជាពលរដ្ឋតូចតាចតើពួកគាត់មានការឈឺចាប់បែបណា? ពេលនោះហើយដែលបង្កើតឲ្យមានកំហឹងខឹងដល់ថ្នាក់ដឹកនាំ មួយវិញទៀតបើរឿងនេះធ្លាក់ប៉ះចំលើគ្រួសារអស់លោកវិញ តើអស់លោកមានការឈឺចាប់ដែរឬទេ? អស់លោកត្រូវចាំថាកម្មពារមានពិតមិនចាំជាតិក្រោយឡើយ។
ក្នុងករណីនេះផងដែរ សាច់ញាតិជនរងគ្រោះគ្រោងនឹងដាក់ពាក្យប្ដឹងគោរពចូលនាយឧត្តមអគ្គស្នងការនគរបាលជាតិផងដែរ ដើម្បីចង់បាននូវភាពយុត្តិធម៌ត្រឹមត្រូវនៅពេលដែលមន្ត្រីថ្នាក់ក្រោមអនុវត្តខុសនីតិវិធីបែបនេះ តើត្រូវទទួលពិន័យបែបណាដែរ? ក្នុងនោះផងដែរសាច់ញាតិជនរងគ្រោះក៏បានស្នើសុំឲ្យបញ្ជូនសំណុំរឿងនិងវត្ថុតាងទាំងពីរទៅតុលាការដើម្បីទុកឲ្យតុលាការសម្រេចនិងបន្តនីតិវិធី។
ដោយឡែកលោកវរសេនីយ៍ត្រី សួនពន្លក នាយរងការិយាល័យនគរបាលចរាចរណ៍ខេត្តបានប្រាប់សាច់ញាតិជនរងគ្រោះថា សូមបញ្ចប់រឿងត្រឹមហ្នឹងទៅ ហើយព្រមទទួលយកសំណងប្រាំលានរៀលនិងចុះមិនបាច់បន្តទៅណាវែងឆ្ងាយទេព្រោះរឿងនេះលោកស្នងការជាអ្នកបញ្ជាឲ្យដោះលែងរថយន្តនោះ។
សូមរំលឹកថា ហេតុការណ៍គ្រោះថ្នាក់ចរាចរណ៍មួយបានកើតឡើងកាលពីវេលាម៉ោង៣និង១០នាទីរសៀលថ្ងៃទី២ ខែកក្កដា ឆ្នាំ២០២៣ កន្លងទៅនេះ ស្ថិតនៅចំណុចចន្លោះបង្គោលគីឡូម៉ែត្រលេខ ៧៦-៧៧ តាមបណ្ដោយផ្លូវជាតិលេខ ១ ភូមិស្រះ ឃុំរំចេក ស្រុកព្រះស្តេច ខេត្តព្រៃវែង ។
យុវជនទាំង២នាក់ ក្នុងនោះ១-ឈ្មោះ ទេព ពន្លឺ ភេទប្រុស អាយុ១៩ឆ្នាំ រស់នៅភូមិសម្លឆៅ ឃុំចន្ទ្រា ស្រុករមាសហែក ខេត្តស្វាយរៀង និង២-ឈ្មោះ ឡន ប៊ុនឡូ ភេទប្រុស អាយុ១៤ឆ្នាំ រស់នៅភូមិវត្តពោធិ៍ ឃុំរាម ស្រុករមាសហែក ខេត្តស្វាយរៀង បានជិះម៉ូតូមួយគ្រឿងម៉ាកហុងដាឌ្រីម C125 ពណ៌ខ្មៅ ពាក់ផ្លាកលេខ ស្វាយរៀង 1T-4291 បានប៉ះជាមួយរថយន្តបែនមួយគ្រឿងម៉ាកហ៊ីយ៉ាន់ដាយ ពណ៌ខៀវ ពាក់ផ្លាកលេខ កំពង់ចាម 3A-9482 បណ្ដាលឱ្យភាគីខាងម៉ូតូរងរបួសទាំង ២នាក់ យុវជនទាំង ២នាក់ ត្រូវបានទៅសង្គ្រោះព្យាបាលនៅមន្ទីរពេទ្យបង្អែកស្រុកព្រះស្ដេច ចំណែកអ្នកបើកបររថយន្តបែន បានរត់គេចខ្លួនបាត់ស្រមោល រីឯវត្ថុតាងម៉ូតូ និងរថយន្ត យកមករក្សាទុកនៅប៉ុស្តិ៍នគរបាលរដ្ឋបាលរំចេក រង់ចាំដោះស្រាយបន្តតាមនីតិវិធី ៕
ចែករំលែកព័តមាននេះ