ខេត្តសៀមរាប ៖ អណ្ដាតភ្លើងស្នេហ៍ដែលឆេះសន្ធោសន្ធៅជិត២ឆ្នាំ ក៏បានរលត់បន្សល់ទុកតែផ្សែង ដោយសារតែការរស់នៅមិនចុះសម្រុងនឹងគ្នា ក៏បែកបាក់គ្នាលែងអាលោះអាល័យ ។ តែសម្រាប់ភាគីបុរសនៅតែរលឹកស្នេហ៍ចាស់ ហើយបានព្យាយាមសុំជានាវិញ បែរជាខាងស្រីបដិសេធ ធ្វើឱ្យខាងប្រុសខកបំណង ក៏ទាញយកកាំបិ.តកា.ប់ជាច្រើនកាំបិ.ត បណ្តាលឱ្យភាគីស្ត្រីរបួសធ្ងន់ ចំណែកភាគីខាងប្រុសក៏រត់គេចខ្លួនទៅពួនសម្ងំនៅផ្ទះម្តាយមីង ស្ថិតក្នុងស្រុកជីក្រែង។
ប៉ុន្តែក៏បានត្រូវសមត្ថកិច្ចឃាត់ខ្លួនបញ្ជូនទៅកាន់តុលាការ ហើយត្រូវបានលោក អាំង សុភា ចៅក្រមស៊ើបសួរនៃសាលាដំបូងខេត្តសៀមរាប សម្រេចចេញដីកាឃុំខ្លួនដាក់ពន្ធនាគារជាបណ្តោះអាសន្ន នៅព្រឹកថ្ងៃទី២៨ ខែសីហា ឆ្នាំ២០២៣នេះ។ ហេតុការណ៍ឃាត់ខ្លួនបុរសជាអតីតប្ដីរូបនេះ បានកើតឡើងកាលពីវេលាម៉ោង១៧និង៣០នាទី ថ្ងៃទី២៧ ខែសីហា ឆ្នាំ២០២៣ នៅចំណុចផ្ទះម្តាយមីង ស្ថិតក្នុងភូមិតាងួន ឃុំល្វែងឫស្សី ស្រុកជីក្រែង ខេត្តសៀមរាប ។
តាមប្រសាសន៍របស់លោកវរសេនីយ៍ឯក សុខ ម៉េងអ៊ាង បានប្រាប់ភ្នាក់ងារកោះសន្តិភាពឱ្យដឹងថា បន្ទាប់ពីទទួលបានព័ត៌មានភ្លាម ពាក់ព័ន្ធនឹងបទល្មើសជាក់ស្តែងប៉ុនប៉ងឃា.តក.ម្ម កាលពីវេលាម៉ោង២៤និង៣០នាទី ឈានចូលថ្ងៃទី២៧ ខែសីហា ឆ្នាំ២០២៣ នៅចំណុចផ្ទះស្ត្រីជនរងគ្រោះ ស្ថិតក្នុងភូមិវាល សង្កាត់គោកចក ក្រុងសៀមរាប លោកក៏បានបញ្ជាឱ្យសមត្ថកិច្ចជំនាញចុះអន្តរាគមន៍ឃាត់ខ្លួនជនដៃដល់ភ្លាមៗផងដែរ។ ជនដៃដល់រូបនេះ មានឈ្មោះ ស៊ុំ ឈង់ ភេទប្រុស អាយុ៤៤ឆ្នាំ មុខរបរលក់នំបញ្ជុក ទីកន្លែងកំណើតនៅភូមិក្រសាំងរលើង ឃុំសៀមរាប ស្រុកសៀមរាប ខេត្តសៀមរាប ទីលំនៅបច្ចុប្បន្ននៅភូមិវាល សង្កាត់គោកចក ក្រុងសៀមរាប ។
លោកបញ្ជាក់ពីអតីតប្ដីប្រពន្ធនេះ ឱ្យដឹងថា នៅអំឡុងឆ្នាំ២០១៩ ឈ្មោះ ស៊ុំ ឈង់ ភេទប្រុស អាយុ៤៤ឆ្នាំ (ជនដៃដល់) មានទំនាក់ទំនងស្នេហាជាមួយជនរងគ្រោះឈ្មោះ គង់ ដានី ភេទស្រី អាយុ៤៨ឆ្នាំ ហើយពួកគាត់ទាំងពីរនាក់បានរួមរស់ជាមួយគ្នាជាប្តី-ប្រពន្ធ ដោយមិនបានរៀបការនោះទេ គឺស្រឡាញ់គ្នាដោយចិត្តនិងចិត្ត ក្រោយមកពួកគាត់ទាំងពីរនាក់ក៏មានទំនាស់ជាមួយគ្នាជាបន្តបន្ទាប់ ។
លោកបញ្ជាក់បន្តថា ហើយនៅថ្ងៃទី០៥ ខែសីហា ឆ្នាំ២០២៣ ឈ្មោះ ស៊ុំ ឈង់ បានចុះចេញពីលំនៅឋាននៅវេលាម៉ោង២២និង៣០នាទី ថ្ងៃទី២៦ ខែសីហា ឆ្នាំ២០២៣ ខណៈពេលជនរងគ្រោះឈ្មោះ គង់ ដានី កំពុងដេកនៅផ្ទះរបស់ខ្លួន ស្ថិតនៅភូមិវាល សង្កាត់គោកចក ក្រុងសៀមរាប ស្រាប់តែឈ្មោះ ស៊ុំ ឈង់ បានមកដល់ ហើយសួរនាំរឿងទំនាក់ទំនងរបស់ពួកគេទាំង២នាក់ និងសុំជនរងគ្រោះត្រូវគ្នាវិញ ប៉ុន្តែជនរងគ្រោះមិនព្រម ទើបមានទំនាស់ពាក្យសម្តីជាមួយគ្នា។ បន្ទាប់មកជនដៃដល់ឈ្មោះ ស៊ុំ ឈង់ បានដើរចេញពីផ្ទះមួយសន្ទុះ លុះដល់វេលារំលងអធ្រាត្រម៉ោង២៤និង៣០នាទី ឈានចូលថ្ងៃទី២៧ ខែសីហា ឆ្នាំ២០២៣ ជនសង្ស័យប្រដាប់ដោយកាំបិ.តប៉័ងតោក្នុងដៃ រួចដើរចូលទៅមកក្នុងផ្ទះ ហើយកា.ប់ទៅលើជនរងគ្រោះត្រូវចំចង្កា១កាំបិ.ត ចំ.កផ្នែកខាងឆ្វេង១កាំបិ.ត និងចំថ្ពាល់ផ្នែកខាងឆ្វេង១កាំបិ.ត បណ្តាលឱ្យជនរងគ្រោះរងរបួសធ្ងន់ធ្ងរ ហើយត្រូវក្រុមគ្រួសារបញ្ជូនទៅសង្គ្រោះនៅមន្ទីរពេទ្យបង្អែកខេត្តសៀមរាប ។ ចំណែកជនបង្កវិញ រត់គេចខ្លួនបាត់ស្រមោលតែម្ដង។
បន្ទាប់ពីទទួលបានពាក្យបណ្តឹងរបស់ក្រុមគ្រួសារស្ត្រីជនរងគ្រោះ និងស្តាប់ការបំភ្លឺពីសាក្សីនៅកន្លែងកើតហេតុ កម្លាំងជំនាញបានចុះធ្វើការស្រាវជ្រាវ រហូតដល់វេលាម៉ោង១៧និង៣០នាទី ថ្ងៃទី២៧ ខែសីហា ឆ្នាំ២០២៣ ទើបឈានទៅធ្វើការឃាត់ខ្លួនជនសង្ស័យ នៅចំណុចភូមិតាងួន ឃុំល្វែងឫស្សី ស្រុកជីក្រែង ខេត្តសៀមរាប ដើម្បីយកមកសួរនាំនៅការិយាល័យនគរបាលព្រហ្មទណ្ឌកម្រិតធ្ងន់ នៃស្នងការដ្ឋាននគរបាលខេត្តសៀមរាប រួចរៀបចំកសាងសំណុំរឿងបញ្ជូនបន្តទៅតុលាការ ។
លោកបន្ថែមទៀតថា តាមការសារភាពរបស់ជនសង្ស័យថា «នៅអំឡុងឆ្នាំ២០១៩ រូបខ្លួន និងជនរងគ្រោះឈ្មោះ គង់ ដានី ភេទស្រី អាយុ៤៨ឆ្នាំ បានរួមរស់ជាមួយគ្នាជាប្ដី-ប្រពន្ធ ហើយចាប់តាំងពីចុងឆ្នាំ២០២០មក ខ្លួនតែងតែមានទំនាស់ជាមួយជនរងគ្រោះជាបន្តបន្ទាប់ គឺឈានដល់ការមិនចុះសម្រុងគ្នា»។
តាមការចោទរបស់បុរសរូបនេះថា «ជនរងគ្រោះមានទំនាក់ទំនងស្នេហាជាមួយមនុស្សប្រុសផ្សេងទៀត ។ លុះនៅថ្ងៃទី០៥ ខែសីហា ឆ្នាំ២០២៣ ខ្លួនបានចុះចេញពីលំនៅឋាននៅភូមិវាល សង្កាត់គោកចក ទៅស្នាក់នៅផ្ទះជាមួយឪពុកបង្កើត ស្ថិតនៅភូមិក្រសាំងរលើង សង្កាត់សៀមរាប ខេត្តសៀមរាប ហើយក៏ព្យាយាមទំនាក់ទំនងមកប្រពន្ធតាមទូរស័ព្ទ តែគាត់មិនព្រមនិយាយជាមួយនោះទេ។ លុះនៅយប់ថ្ងៃទី២៦ ខែសីហា ឆ្នាំ២០២៣ ខ្លួនបានយកកាំបិ.តប៉័ងតោ១ដើមដាក់តាមម៉ូតូ បើកចេញពីផ្ទះនៅភូមិក្រសាំងរលើង សង្កាត់សៀមរាប មករកជនរងគ្រោះនៅផ្ទះ ស្ថិតក្នុងភូមវាល សង្កាត់គោក ក្រុងសៀមរាប ដើម្បីសុំត្រូវគ្នាវិញ»។
តាមការចោទរបស់បុរសរូបនេះបន្តទៀតថា «ជាក់ស្តែងពេលមកដល់ ខ្លួនបាននិយាយលួងលោមសុំត្រូវគ្នាវិញ ប៉ុន្តែជនរងគ្រោះមិនព្រមនោះទេ ទើបមានកំហឹងដោយសារភ្លើងប្រចណ្ឌ ខ្លួនក៏បានកា.ប់ទៅលើជនរងគ្រោះចំនួន៣កាំបិ.តប៉័ងតោ ដូចបានរៀបរាប់ករណីខាងលើតែម្តង។ ក្រោយធ្វើសកម្មភាពរួច ខ្លួនបានយកកាំបិ.តទៅបោះចោលនៅក្រោយផ្ទះជនងរងគ្រោះចម្ងាយប្រហែល១០០ម៉ែត្រ លុះដល់វេលាម៉ោង៣និង០០នាទីទៀបភ្លឺ ក៏បានជិះម៉ូតូគេចខ្លួនទៅផ្ទះម្តាយមីង ស្ថិតនៅភូមិតាងួន ឃុំល្វេងឫស្សី ស្រុកជីក្រែង ខេត្តសៀមរាប ក៏ត្រូវសមត្ថកិច្ចចាប់ខ្លួនតែម្តង»៕
ចែករំលែកព័តមាននេះ