ខេត្តស្វាយរៀង ៖ ប្រជាពលរដ្ឋជាអ្នកចិញ្ចឹមសត្វគោ-ក្របីមានការត្អូញត្អែថា ឈ្មួញវៀតណាមឈប់មកទិញគោ-ក្របីផ្ទាល់ ហើយបើមកទិញគឺទម្លាក់តម្លៃទាបជាងពីមុន ។ ករណីនេះកើតឡើងកាលពីរសៀលស្ងៃទី២៨ សីហា ២០២៣ នៅស្រុកស្វាយជ្រំ។…
ខេត្តស្វាយរៀង ៖ ប្រជាពលរដ្ឋជាអ្នកចិញ្ចឹមសត្វគោ-ក្របីមានការត្អូញត្អែថា ឈ្មួញវៀតណាមឈប់មកទិញគោ-ក្របីផ្ទាល់ ហើយបើមកទិញគឺទម្លាក់តម្លៃទាបជាងពីមុន ។ ករណីនេះកើតឡើងកាលពីរសៀលស្ងៃទី២៨ សីហា ២០២៣ នៅស្រុកស្វាយជ្រំ។
បើតាមបុរស់ម្នាក់ឈ្មោះកែវ កុសល អាយុ៦០ឆ្នាំ រស់នៅភូមិត្រោក ឃុំកំពង់ចម្លង ស្រុកស្វាយជ្រំ បានប្រាប់កោះសន្តិភាពថា គាត់ចិញ្ចឹមក្របីចំនួន០៦ក្បាល ហើយប្រជាពលរដ្ឋក្នុងភូមិត្រោក ក៏បាននាំគ្នាដេញក្របីមកឃ្វាលនៅតាមបន្ទាត់ព្រំដែននេះដែរ មានក្របីប្រមាណ២០០ក្បាល បានដេញក្របីមកឃ្វាលរាល់ថ្ងៃ គឺព្រឹកម៉ោង៨ និង១០នាទីដេញចេញពីភូមិមកឃ្វាល លុះម៉ោង៤រសៀលទើបដេញក្របីត្រឡប់ទៅផ្ទះវិញ។
បុរសខាងលើ និងអ្នកឃ្វាលក្របីបានត្អូញត្អែរថា ចាប់តាំងពីខែមសា២០២៣មក វៀតណាមឈប់មកទិញក្របីពីប្រជាពលរដ្ឋខ្មែរផ្ទាល់ដូចមុន ដោយសមត្ថកិច្ចខាងវៀតណាមគេបិទឈប់ឲ្យនាំក្របីចូលប្រទេសវៀតណាម។
បច្ចុប្បន្ន មានតែឈ្មួញខ្មែរដើរប្រមូលទិញយកទៅប្រោះទុក(យកទៅបំប៉ន) ក៏ប៉ុន្តែឈ្មួញកណ្តាលខ្មែរយើងទិញថោកក្របីធំ ១ក្បាលតម្លៃ២លានរៀលប៉ុណ្ណោះ បើប្រៀបធៀបកាលពីឆ្នាំមុននិងដើមឆ្នាំ២០២៣ ក្របីធំឬក្របីឡើង.ក ក្នុង១ក្បាលតម្លៃ៣,០០០,០០០រៀល ទៅ៣លាន២សែនរៀល ក្របីញី២លាន៨សែន ទៅ៣លានរៀល ។
ក៏ប៉ុន្តែបច្ចុប្បន្នវៀតណាមលែងចូលមកទិញផ្ទាល់ឈ្មួញខ្មែរមកប្រមូលទិញឲ្យតម្លៃថោក ហើយប្រាប់ថា វៀតណាម គេផ្អាកទិញក្របី ដោយសត្វក្របីស្រុកខ្មែរ ខេត្តស្វាយរៀង ផ្ទុះជំងឺដុំពកលើស្បែកនិងកើតជំងឺអុតក្តាម ចាប់ពីខែមេសា ២០២៣ មក ហើយឈ្មួញខ្មែរដើរប្រមូលទិញយកទៅប្រោះទុកព្យាបាល និងបំប៉ន រួចបាននាំចេញទៅវៀតណាម ដោយសមត្ថកិច្ចវៀតណាមគេពិនិត្យលើសុខភាពសត្វ គ្មានជំងឺទើបឲ្យនាំចូលទៅប្រទេសគេ។
បើតាមបុរសម្នាក់ មានវ័យ៧១ឆ្នាំ រស់នៅភូមិតានូ ឃុំចំបក់ស្រុកស្វាយជ្រំ ក៏បានប្រាប់កោះសន្តិភាពដែរ គាត់ចិញ្ចឹមសត្វគោចំនួន២៥ក្បាល បានដេញគោមកឃ្វាលនៅជិតព្រំដែនដែរ គាត់ចិញ្ចឹមគោក្តាម កាលពីឆ្នាំមុន និងដើមឆ្នាំ២០២៣ គោឈ្មោលលក់បាន១ក្បាល១លាន ២សែនរៀល បច្ចុប្បន្ន លក់បានតែ៨សែនរៀល១ក្បាល។
ចំពោះសត្វគោញីមេក្រមុំ ឬមេកូន១ក្បាល១លានរៀល បច្ចុប្បន្ន លក់បានតែ៧សែនទៅ៨សែនរៀលប៉ុណ្ណោះក្នុង១ក្បាល ហើយគ្មានអ្នកទិញទៀត គឺមានតែអ្នកទិញកាប់សាច់លក់ក្នុង១ថ្ងៃ១ក្បាល២ក្បាលប៉ុណ្ណោះ ។ ប្រភពបន្តទៀតថា អ្នកចិញ្ចឹមគោក្របី បច្ចុប្បន្ន ខាតធន់ដោយការចិញ្ចឹមចំណាយច្រើនកន្លែងឃ្វាលចង្អៀត ខ្វះស្មៅ ត្រូវទិញចំបើងពីប្រទេសវៀតណាម យមមកឲ្យសត្វគោក្របីស៊ី ហើយចំបើង១ដុំតម្លៃ៥ពាន់រៀល ទៅ៧ពាន់រៀល ។
ហើយពេលជួបបញ្ហា ផ្ទុះជំងឺដុំពកលើស្បែកឬ សាទឹកអុតក្តាមត្រូវការ ចំណាយប្រាក់ ហៅពេទ្យសត្វឲ្យមកព្យាបាល បច្ចុប្បន្ន វៀតណាមឈប់មកទិញផ្ទាល់ទៀត គឺពិបាករកទីផ្សារគោក្របីខ្លាំងណាស់៕
ចែករំលែកព័តមាននេះ