កម្លាំងជំនាញនៃស្នងការដ្ឋាននគរបាលខេត្តព្រះសីហនុ បានទទួលព័ត៌មានថា មានជនសង្ស័យមួយក្រុមជិះរថយន្ត៣គ្រឿងធ្វើសកម្មភាពចូលចាប់បុរសជាជនជាតិចិនម្នាក់ ខណៈចេញពីផ្ទះវីឡាមួយ
ខេត្តព្រះសីហនុ ៖ បើតាមសេចក្តីរាយការណ៍បានឱ្យដឹងថា កាលពីយប់ថ្ងៃទី២៧ ខែសីហា ឆ្នាំ២០២៣ កម្លាំងជំនាញនៃស្នងការដ្ឋាននគរបាលខេត្តព្រះសីហនុ បានទទួលព័ត៌មានថា មានជនសង្ស័យមួយក្រុមជិះរថយន្ត៣គ្រឿងធ្វើសកម្មភាពចូលចាប់បុរសជាជនជាតិចិនម្នាក់ ខណៈចេញពីផ្ទះវីឡាមួយកន្លែង ដែលមានទីតាំងស្ថិតនៅភូមិ៥ ក្នុងសង្កាត់៤ ក្រុង-ខេត្តព្រះសីហនុ។
បន្ទាប់ពីទទួលបានព័ត៌មាននេះភ្លាម កម្លាំងជំនាញផែនការងារនគរបាលព្រហ្មទណ្ឌ បានសហការជាមួយកម្លាំងអធិការដ្ឋាននគរបាលក្រុងព្រះសីហនុ និងកម្លាំងអធិការដ្ឋាននគរបាលស្រុកព្រៃនប់ ចុះធ្វើការស្រាវជ្រាវយ៉ាងយកចិត្តទុកដាក់ រហូតដល់វេលាម៉ោងម៉ោង២២និង៣០នាទីយប់ថ្ងៃដដែល ទើបទទួលព័ត៌មានថា ជនរងគ្រោះត្រូវក្រុមជនសង្ស័យដោះលែងវិញហើយ តែត្រូវរងរបួសស្នាមបន្តិចបន្តួច ហើយកំពុងសម្រាកព្យាបាលនៅមន្ទីរពេទ្យថៃខាង។
ពេលនោះ កម្លាំងសមត្ថកិច្ចក៏បានទៅជួបជនរងគ្រោះ ហើយជនរងគ្រោះបានរៀបរាប់ឲ្យថា «គាត់ត្រូវបានក្រុមជនសង្ស័យចាប់រុ.ញដាក់ចូលក្នុងរថយន្ត និងដកហូតយកទូរស័ព្ទដៃរបស់គាត់ចំនួន២គ្រឿង ព្រមទាំងវេរលុយចេញពីគណនីធនាគារ «ហួយហ័ង» របស់គាត់អស់ថែមទៀតផង»។
ជនរងគ្រោះបន្តថា «បន្ទាប់មក ជនសង្ស័យបាននាំរូបគាត់ (ជនរងគ្រោះ) ទៅផ្ទះវីឡាមួយកន្លែង ស្ថិតនៅម្តុំអូរ២ ក្នុងភូមិ៥ សង្កាត់៤ ក្រុង-ខេត្តព្រះសីហនុ បានប្រហែល១០នាទី ក៏នាំរូបគាត់ (ជនរងគ្រោះ) ទៅអគារមួយកន្លែងទៀតនៅខាងក្រោយសណ្ឋាគារ «ណានហៃ» ស្ថិតនៅភូមិ១ ក្នុងសង្កាត់៣ ក្រុង-ខេត្តព្រះសីហនុ រួចបង្ខាំងទុកក្នុងបន្ទប់មួយ។ ក្រោយមក ក្រុមជនសង្ស័យក៏បានវា.យធ្វើបា.ប ដោយប្រើដំបងឆក់ រហូតដល់យប់ជ្រៅបន្តិច ទើបដោះលែងវិញ រួចជនសង្ស័យក៏ដឹករូបគាត់យកទៅទម្លាក់ចោលនៅតាមផ្លូវ នៅជិតកាស៊ីណូ «តាស៊ីកាង»តែម្ដង»។
បន្ទាប់ពីបានស្តាប់ការបំភ្លឺរបស់ជនរងគ្រោះហើយ កម្លាំងសមត្ថកិច្ចជំនាញផែនការងារនគរបាលព្រហ្មទណ្ឌ បានសហការជាមួយកម្លាំងអធិការដ្ឋាននគរបាលក្រុងព្រះសីហនុ ចុះទៅធ្វើការត្រួតពិនិត្យនៅផ្ទះវីឡាដែលនៅម្តុំអូរ២ តែនៅក្នុងផ្ទះមិនមានមនុស្សនោះទេ ប៉ុន្តែពេលនោះក៏មានបុរសជនជាតិចិនម្នាក់បានបើករថយន្ត១គ្រឿង ម៉ាក ALPHARD ពណ៌ខ្មៅ ផ្លាកលេខៈ 2BW-1986 មកដល់។
ដោយសារបុរសរូបនោះ ក៏ស្នាក់នៅបន្ទប់មួយក្នុងបរិវេណផ្ទះវីឡានោះដែរ រួចក៏នាំគ្នាចូលត្រួតពិនិត្យ ស្រាប់តែរកឃើញជញ្ជីងថ្លឹងគ្រឿ.ងញៀ.នចំនួន២គ្រឿង និងថង់សម្រាប់វេចខ្ចប់មួយចំនួននៅក្នុងបន្ទប់របស់ជនជាតិចិនម្នាក់នោះ បន្ទាប់មកសមត្ថកិច្ចក៏បានស្នើសុំទៅស្ថាប័នអយ្យការអមសាលាដំបូងខេត្ត ដើម្បីធ្វើការឃាត់ខ្លួនយកទៅសាកសួរ និងបន្តនីតិវិធីទៅកាន់តុលាការ៕
ចែករំលែកព័តមាននេះ