ភ្នំពេញ៖ នៅយប់ថ្ងៃអាទិត្យ ទី២៧ ខែសីហា ឆ្នាំ២០២៣ នេះ អយ្យការអមសាលាដំបូង រាជធានីភ្នំពេញ បាន​ចេញសេចក្ដីប្រកាសព័ត៌មាន ពាក់ព័ន្ធនឹងការសម្រេចដោះលែងទណ្ឌិត សំប៊ុន យ៉ានី ឱ្យមានសេរីភាពវិញ។ មូលហេតុ ដោយសារតែ​អ្នកស្រី សំប៊ុន យ៉ានី ដែលមាន​រឿង​ក្តី​ ដោយសារតែលួចលុយជំនួយរបស់អង្គការ​​មណ្ឌលព័ត៌មានស្ត្រីកម្ពុជា គឺ​ជាមនុស្សចាស់ជរា មាន​អាយុ ៦៦ឆ្នាំ និងមានជំងឺប្រចាំកាយ ហើយ​ការសម្រេចផ្តន្ទាទោស​ទណ្ឌិតរូបនេះ ក៏ធ្វើឡើង​ដោយការ​ព្យួរទោស​។

តំណាងអយ្យការអមសាលាដំបូងរាជធានីភ្នំពេញ បានចេញដីកាបង្គាប់​ឱ្យចាប់ខ្លួនលើទណ្ឌិត ឆ្មោះ សំប៊ុន យ៉ានី ភេទស្រី ដើម្បីបង្ខំ​ដល់រូបកាយទារ​សំណងទៅដើមបណ្តឹងរដ្ឋប្បវេណី ដែលជា​មណ្ឌលព័ត៌មានស្ត្រីកម្ពុជា​។ រហូតដល់ថ្ងៃទី២៤ ខែសីហា ឆ្នាំ២០២៣ វេលាម៉ោង ៧ និង៣០នាទី កម្លាំងសមត្ថកិច្ច នៃនាយកដ្ឋាន​នគរបាលព្រហ្មទណ្ឌ ក្រសួងមហាផ្ទៃ បានអនុវត្តតាមដីកាបង្គាប់ឱ្យចាប់ខ្លួនទណ្ឌិតឈ្មោះ សំប៊ុន យ៉ានី ភេទស្រី នៅសង្កាត់ដង្កោ រាជធានីភ្នំពេញ ដើម្បីបញ្ជូន​មកអយ្យការអមសាលាដំបូងរាជធានីភ្នំពេញ ចាត់ការតាមនីតិវិធី។

សេចក្តីប្រកាស បន្តថា ក្រោយពីបាន​ធ្វើការសាកសួរទណ្ឌិត និងបន្ទាប់ពីបាន​ពិនិត្យផ្ទៀងផ្ទាត់​ឡើងវិញ ដោយយកចិត្តទុកដាក់ តំណាងអយ្យការ​អមសាលាដំបូងរាជធានីភ្នំពេញ ពិនិត្យឃើញថា៖

១-ការសម្រេចផ្តន្ទាទោសដោយតុលាការគ្រប់ជាន់ថ្នាក់ នៅក្នុងករណីនេះ ជាការសម្រេច​ផ្តន្ទាទោសដាក់ពន្ធនាគារ​ ដោយការព្យួរទោស ដោយយោងតាមមាត្រា ១០៧ នៃក្រមព្រហ្មទណ្ឌ។ ដូចនេះ ទណ្ឌិត នឹងមិន​ត្រូវអនុវត្ត​ទោសរបស់ខ្លួន នៅពន្ធនាគារឡើយ លើកលែង​តែបំពាន​លក្ខខណ្ឌ​ ដូចមានចែង​ក្នុងក្រមព្រហ្មទណ្ឌ សម្រាប់​ការដកហូតការព្យួរទោស​។

២-ទណ្ឌិត ជាស្ត្រីមានជំងឺប្រចាំកាយ និងមានវ័យ​ចាស់ជរា អាយុ ៦៦ឆ្នាំ គិតត្រឹមថ្ងៃចាប់ខ្លួន ដោយយោងតាម​មាត្រា ៥៣១ នៃក្រមនីតិវិធីព្រហ្មទណ្ឌ ការបង្ខំដល់​រូបកាយ មិនអាច​ធ្វើទៅលើស្ត្រី​ ដែលមានអាយុចាប់ពី ៦៥ឆ្នាំ ឡើងទៅ​។

ផ្នែកលើមូលដ្ឋានខាងលើ តំណាងអយ្យការអមសាលាដំបូងរាជធានីភ្នំពេញ បានសម្រេចដោះលែងទណ្ឌិតឈ្មោះ សំប៊ុន យ៉ានី ភេទស្រី ឱ្យមានសេរីភាពឡើងវិញ។​

អ្នកស្រី សំប៊ុន យ៉ានី ជា​អ្នកគ្រប់គ្រងហិរញ្ញវត្ថុនៃអង្គការ​មណ្ឌលព័ត៌មានស្ត្រីកម្ពុជា ចាប់ពីឆ្នាំ២០០៩ ដល់ឆ្នាំ២០១៣។ ក្នុងអំឡុងពេលនេះ អ្នកស្រី សំប៊ុន យ៉ានី ត្រូវបានរកឃើញថា បានលួចយកប្រាក់អស់ជាង ២០ម៉ឺនដុល្លារ​។

ក្នុងរឿងរ៉ាវលួចលុយរបស់អង្គការមណ្ឌលព័ត៌មានស្ត្រីកម្ពុជានេះ ត្រូវបានប្តឹងផ្តល់នៅតុលាការ ហើយទីបំផុតតុលាការកំពូល បានចេញសាលដីកាស្ថាពរ ចុះថ្ងៃទី១១ ខែវិច្ឆិកា ឆ្នាំ២០២១ និងដីកាបង្គាប់ឱ្យចាប់ខ្លួន ចុះថ្ងៃទី៩ ខែធ្នូ ឆ្នាំ២០២២។ ប៉ុន្តែនៅថ្ងៃទី២៤ ខែសីហា ឆ្នាំ២០២៣ ទើបសមត្ថកិច្ច ចាប់ខ្លួនបានអ្នកស្រី សំប៊ុន យ៉ានី។

ចៅក្រមតុលាការសាលាដំបូងរាជធានីភ្នំពេញ បានសម្រេចផ្តន្ទាទោស អ្នកស្រី សំប៊ុន យ៉ានី ដាក់ពន្ធនាគារ​រយៈពេល ១ឆ្នាំ ពីបទរំលោភលើសេចក្តីទុកចិត្ត។ ប៉ុន្តែទោសត្រូវបានព្យួរ តែត្រូវសងលុយ ដែលបានលួចដល់អង្គការមណ្ឌលព័ត៌មានស្ត្រីកម្ពុជា​​វិញ។

អង្គការមណ្ឌលព័ត៌មានស្ត្រីកម្ពុជា បានប្តឹងជំទាស់នឹងការសម្រេចរបស់តុលាការសាលាដំបូង​ខាងលើ ហើយ​នៅតុលាការ​សាលាឧទ្ធរណ៍ បានសម្រេច​ផ្តន្ទាទោស អ្នកស្រី សំប៊ុន យ៉ានី ឱ្យជាប់ពន្ធនាគាររយៈពេល ២ឆ្នាំ និងសងលុយជាង ២០ម៉ឺនដុល្លារ ដែលបានលួចពីអង្គការ​មណ្ឌលព័ត៌មានស្រ្តីកម្ពុជា ដោយគ្មានពាក្យថា «ព្យួរទោស​ឡើយ» និងសងថ្លៃសេវាច្បាប់ ១ម៉ឺន​ដុល្លា​រ​។

មេធាវី​របស់​អ្នកស្រី សំប៊ុន យ៉ានី មិនយល់ស្របនឹងការ​សម្រេចរបស់តុលាការសាលាឧទ្ធរណ៍ ក៏បាន​ប្ដឹងសារទុក្ខ ទៅតុលាការកំពូល។ តុលាការកំពូល បានសម្រេចតម្កល់សាលក្រម​របស់សាលាឧទ្ធរណ៍ កាលពីថ្ងៃទី២១ ខែកញ្ញា ឆ្នាំ២០២០ ទុកជាបានការដដែល​៕